1, 2. (a) Ano an koneksyon han gugma ngan pagtoo? (b) Ano nga mga pakiana an aton hihisgotan?

HINIGUGMA naton hi Jehova “kay una hiya nga naghigugma ha aton.” (1 Juan 4:19) Sugad nga pagpakita han iya gugma, hiya an siyahan nga naghimo hin paagi basi makakarawat hin bendisyon an iya maunungon nga mga surugoon. Samtang naghihilarom an aton gugma ha Dios, mas nagigin marig-on an aton pagtoo nga naeksister hiya ngan ginbabalosan niya an mga nahigugma ha iya.​—Basaha an Hebreo 11:6.

² An paghatag hin balos ha mga surugoon ni Jehova importante nga bahin han iya personalidad, ngan makikita ito ha iya mga ginbubuhat. An aton pagtoo magigin bug-os la kon kombinsido gud kita nga babalosan han Dios an mga sinsero nga nag-aalagad ha iya, kay “an pagtoo amo an marig-on nga pagsarig nga matutuman an ginlalaoman.” (Heb. 11:1) Oo, an pagtoo nangangahulogan hin pagin sigurado nga tutumanon han Dios an iya iginsaad nga mga bendisyon. Paonan-o nakakabulig ha aton an paglaom ha balos han Dios? Paonan-o ginbabalosan ni Jehova an iya mga surugoon hadto ngan yana? Hisgotan naton ito.

3. Ano an saad ni Jehova nga mababasa ha Malakias 3:10?

³ Hi Jehova nagsasaad nga babalosan niya an iya matinumanon nga mga surugoon, salit gin-aaghat kita niya nga mangalimbasog nga makarawat an iya bendisyon. Aton mababasa: “Sarihi ako yana . . . nasiring hi Jehova han mga kasondalohan, kon diri ko ba abrihan ngada ha iyo an mga tamboanan ha langit, ngan boboan kamo han bendision nga mawaray igo nga surudlan ha pagkarawat hini.” (Mal. 3:10) Iginpapakita naton an pagin mapasalamaton kon ginsusunod naton an mahigugmaon nga pag-aghat ni Jehova nga sarihan hiya.

4. Kay ano nga makakalaom kita ha pasarig ni Jesus ha Mateo 6:33?

⁴ Ginpasarig ni Jesus an iya mga disipulo nga kon uunahon nira an Ginhadian, bubuligan hira han Dios. (Basaha an Mateo 6:33.) Malalaoman gud an ginsiring ni Jesus kay maaram hiya nga gintutuman pirme ni Jehova an Iya mga saad; diri gud ito napapakyas. (Isa. 55:11) Salit makakasarig liwat kita nga kon ipapakita naton an marig-on nga pagtoo kan Jehova, tutumanon niya an iya saad: “Diri ko gud ikaw babayaan ngan diri ko gud ikaw papabay-an.” (Heb. 13:5) Ini nga saad konektado ha ginsiring ni Jesus mahitungod ha pag-una ha pagpamiling han Ginhadian ngan han katadongan han Dios.

5. Kay ano nga makaparig-on an baton ni Jesus kan Pedro?

⁵ Makausa, nagpakiana hi apostol Pedro kan Jesus: “Ginbayaan namon an ngatanan ngan sinunod ha imo. Ano an makakarawat namon?” (Mat. 19:27) Imbes nga sawayon hi Pedro tungod han iya ginyakan, ginsidngan ni Jesus an iya mga  disipulo nga babalosan gud an ira mga pagsakripisyo. An mga apostol ngan an iba pa nga matinumanon nga mga surugoon magmamando kaupod niya ha langit. Pero bisan yana, nagpapahimulos na hin mga balos an mga magsiringba ni Jehova. Hi Jesus nagsiring: “Bisan hin-o nga binaya ha ira mga balay o kabugtoan o tatay o nanay o mga anak o katunaan tungod ha akon ngaran makarawat hin mas damu pa gud hito ngan makakapanunod han kinabuhi nga waray kataposan.” (Mat. 19:29) An mga bendisyon nga makakarawat han iya mga disipulo labaw pa ha anoman nga sakripisyo nga bangin ira ginhimo. Diri ba an pagkaada mga tatay, nanay, anak, ngan kabugtoan ha espirituwal mas birilhon kay ha anoman nga butang nga aton ginbayaan o iginsakripisyo para ha Ginhadian?

6. Kay ano nga nagsaad hi Jehova nga babalosan niya an iya mga magsiringba?

⁶ An saad ni Jehova nga babalosan niya an iya mga magsiringba nabulig ha ira nga matipigan an ira integridad durante han mga pagsari. Bisan kon nagpapahimulos na yana hin hura nga espirituwal nga bendisyon an matinumanon nga mga surugoon ni Jehova nga Dios, ginpapamulat gud nira an mas daku nga balos ha tidaraon. (1 Tim. 4:8) Oo, an aton pagin bug-os nga kombinsido nga hi Jehova “nagbabalos ha mga sinsero nga nag-aalagad ha iya” mabulig ha aton nga matipigan an marig-on nga pagtoo.​—Heb. 11:6.

7. Kay ano nga an paglaom pariho hin angkla?

⁷ Ha Sermon ha Bukid ni Jesus, hiya nagsiring: “Magkalipay kamo ngan magrayhak, kay daku an iyo balos ha langit. Kay an mga propeta hadto gintimaraot liwat nira ha sugad nga paagi.” (Mat. 5:12) Labot hadton may langitnon nga balos, adton naglalaom nga mabuhi ha waray kataposan ha paraiso nga tuna may daku liwat nga rason basi ‘magkalipay ngan magrayhak.’ (Sal. 37:11; Luc. 18:30) Ha tuna man o ha langit an aton balos, ito nga paglaom nagigin sugad hin “angkla han kalag, nga sigurado ngan marig-on.” (Heb. 6:17-20) Sugad la nga an angkla nabulig nga diri ig-anod an barko durante han bagyo, an sigurado nga paglaom nabulig ha aton nga matipigan an maopay nga panhunahuna ngan marig-on nga emosyon ngan espirituwalidad. Maghahatag ito ha aton hin kusog basi makailob ha mga kakurian.

8. Paonan-o an paglaom nakakabulig nga maibanan an aton kabaraka?

⁸ An aton basado ha Biblia nga paglaom nakakabulig nga maibanan an aton kabaraka yana. An mga saad han Dios puropariho hin haplas nga nakakapakalma han aton naguguol nga kasingkasing. Nakakaliaw gud hibaroan nga mahimo naton ipasa kan Jehova an aton mga kabaraka kay bubuligan kita niya! (Sal. 55:22) Makakasarig gud kita nga ‘mas damu pa an mahihimo han Dios kay ha ngatanan nga butang nga aton maaaro o mahuhunahuna.’ (Efe. 3:20) Hunahunaa la​—diri la kay damu kondi “mas damu pa” an mahihimo han Dios para ha aton!

9. Paonan-o kita makakasiguro nga makakarawat naton an bendisyon ni Jehova?

⁹ Basi makarawat an balos, kinahanglan naton ipakita an marig-on nga pagtoo kan Jehova ngan magin masinugtanon ha iya mga giya. Ginsidngan ni Moises an nasud han Israel: “Hi Jehova ha pagkamatuod magbibendision ha imo ha tuna nga ihahatag ha imo ni Jehova nga imo Dios, sugad nga panorondon ha pagtag-iya hini, kon ikaw ha mainuyatmon mamati la han tingug ni Jehova nga imo Dios, ha pagbantay ngan ha pagtuman han bug-os hini nga sogo nga akon igsosogo ha imo hini nga adlaw. Kay hi Jehova nga imo Dios magbibendision ha imo, sugad han iginsaad niya ha imo.” (Deut. 15:4-6) Nasarig ka ba hin bug-os nga bibendisyonan ka ni Jehova kon padayon ka nga magigin matinumanon ha pag-alagad ha iya? May maopay ka gud nga rason nga buhaton ito.

10, 11. Paonan-o ginbalosan ni Jehova hi Jose?

¹⁰ An Biblia iginsurat para ha aton kapulsanan. Mababasa dida hito an damu nga asoy kon paonan-o  ginbalosan han Dios an iya matinumanon nga mga surugoon. (Roma 15:4) Usa han maopay nga ehemplo hito amo hi Jose. Tungod kay iginbaligya hiya han iya kabugtoan ngan ha urhi gin-akusaran han asawa han iya agaron, napriso hiya ha Ehipto. Ginpabay-an ba hiya han Dios? Waray gud! “Hi Jehova upud kan Jose, ngan nagpahayag hin kalooy ha iya, . . . ginupdan hiya ni Jehova; ngan an iya ginbubuhat, ginpapauswag ni Jehova.” (Gen. 39:21-23) Durante hiton magkuri nga panahon, mapailubon nga naghulat hi Jose ha iya Dios.

¹¹ Paglabay hin mga tuig, ginpagawas hi Jose han Paraon ngan ginhimo inin ubos nga uripon nga ikaduha ha magmarando han Ehipto. (Gen. 41:1, 37-43) Han nagkaada hi Jose duha nga anak, iya “ginngaranan an suhag kan Manases; kay siniring hiya: Ginpakalimot ako han Dios han akon mga kabudlay, ngan han ngatanan nga panimalay han akon amay.” Ngan iya ‘ginngaranan an ikaduha nga Epraim: kay an Dios nagpabunga ha akon ha tuna han akon kakurian.’ (Gen. 41:51, 52) Tungod kay nagpabilin hi Jose nga maunungon ha Dios, ginbendisyonan hiya ngan nagresulta ito han katalwasan han mga Israelita ngan mga Ehiptohanon. Matin-aw, nasabtan gud ni Jose nga ginbalosan ngan ginbendisyonan hiya ni Jehova.​—Gen. 45:5-9.

12. Ano an nakabulig kan Jesus nga magpabilin nga matinumanon bisan pa han mga pagsari?

¹² Hi Jesu-Kristo nagpabilin liwat nga masinugtanon ha Dios bisan pa han damu nga pagsari han iya pagtoo, salit ginbendisyonan hiya. Ano an nakabulig ha iya? An Pulong han Dios nasiring: “Tungod han kalipay nga iginbutang ha iya atubangan gin-ilob niya an pasakitan nga kahoy, ginbalewaray an pakaalo.” (Heb. 12:2) Nalipay gud hi Jesus ha pagbaraan han ngaran han Dios. Dugang pa, nakarawat niya an pag-uyon han iya Amay ngan an damu nga makalilipay nga pribilehiyo. An Biblia nasiring nga hiya “liningkod ha too han trono han Dios.” Mababasa liwat naton: “Iginbutang hiya han Dios ha hitaas nga posisyon ngan mahigugmaon nga gintagan hiya hin ngaran nga labaw han ngatanan nga ngaran.”​—Fil. 2:9.

13, 14. Ano an inaabat ni Jehova ha aton mga ginbubuhat para ha iya?

¹³ Makakasarig kita nga gin-aapresyar ni Jehova an aton mga pangalimbasog ha pag-alagad ha iya. Nasasabtan niya kon inaabat naton nga nawawad-an kita hin kompyansa ha kalugaringon o nagruruhaduha ha aton mga abilidad. Napaid hiya ha aton kon nakukurian kita tungod han mga problema ha pinansyal o kon nalilimitahan an aton pag-alagad tungod han sakit o depresyon. Ngan makakasiguro gud kita nga ginpapabilhan ni Jehova an ngatanan nga ginbubuhat han iya mga surugoon basi makapabilin nga matinumanon ha iya.​—Basaha an Hebreo 6:10, 11.

¹⁴ Tigamni liwat nga makakadaop kita ha Parapamati han pag-ampo, ngan makakasarig kita nga babatunon kita niya. (Sal. 65:2) “An Amay han mahigugmaon nga kalooy ngan an Dios han ngatanan nga pagliaw” maghahatag ha aton han emosyonal ngan espirituwal nga bulig nga aton ginkikinahanglan, bangin pinaagi han aton mga igkasi-tumuroo. (2 Cor. 1:3) Nalilipay hi Jehova kon napaid kita ha iba. ‘Hiya nga may pagbati han kablas naalayon kan Jehova, ngan han iya maopay nga buhat Iya hiya pagbabayaran liwat.’ (Prob. 19:17; Mat. 6:3, 4) Salit kon mahigugmaon nga ginbubuligan naton an mga nanginginahanglan, gintatagad ito ni Jehova nga utang niya ha aton. Ngan nagsasaad hiya nga babalosan niya an aton iginpakita nga pagkabuotan.

15. Ano nga balos an imo ginlalaoman? (Kitaa an retrato ha tinikangan hini nga artikulo.)

¹⁵ An dinihogan nga mga Kristiano may paglaom nga makarawat an “korona han pagkamatadong sugad nga premyo, nga ha itinanda nga adlaw ihahatag . . . han Ginoo, an matadong nga hukom.” (2 Tim. 4:7, 8) Pero kon iba nga  paglaom an iginhatag ha imo han Dios, diri karuyag sidngon nga minos an imo bili ha iya. Minilyon han “iba nga mga karnero” ni Jesus an nagpapamulat gud han balos nga kinabuhi nga waray kataposan ha paraiso nga tuna diin “maglilipay hira tungod han kahuraan han kamurayaw.”​—Juan 10:16; Sal. 37:11.

16. Ano nga pagliaw an aton mababasa ha 1 Juan 3:19, 20?

¹⁶ Usahay, bangin inaabat naton nga gutiay la an aton nahihimo o diri nalilipay hi Jehova ha aton mga pangalimbasog. Bangin naghuhunahuna pa ngani kita nga diri kita takos kumarawat hin anoman nga balos. Sadang naton hinumdoman nga “an Dios mas daku kay ha aton kasingkasing ngan maaram hiya han ngatanan nga butang.” (Basaha an 1 Juan 3:19, 20.) Ginbabalosan ni Jehova an ngatanan naton nga pangalimbasog kon ginbubuhat naton ito tungod han aton pagtoo ngan gugma ha iya, bisan kon para ha aton baga hin gutiay la an bili han aton ginbubuhat.​—Mar. 12:41-44.

17. Ano an pipira han mga balos nga aton napapahimulosan yana?

¹⁷ Bisan hinin kataposan nga mga adlaw han maraot nga sistema ni Satanas, ginbibendisyonan ni Jehova an iya katawohan. Ginsisiguro niya nga mag-uswag an espirituwal nga paraiso nga naieksperyensyahan han iya tinuod nga mga magsiringba, diin nagpapahimulos hira hin hura nga espirituwal nga mga tagana. (Isa. 54:13) Sugad han iginpasarig ni Jesus, ginbabalosan kita yana ni Jehova pinaagi ha pagin bahin ha bug-os-kalibotan nga pamilya nga ginkukompwesto han mahigugmaon nga kabugtoan ha espirituwal. (Mar. 10:29, 30) Dugang pa, adton sinsero nga nag-aalagad ha Dios ginbabalosan hin waray kapariho nga kamurayawan ha hunahuna, katagbaw, ngan kalipay.​—Fil. 4:4-7.

18, 19. Ano an inaabat han mga surugoon ni Jehova may kalabotan ha mga balos nga ira nakakarawat?

¹⁸ An mga surugoon ni Jehova ha bug-os nga kalibotan makakagpamatuod nga nakakarawat nira an makalilipay nga balos tikang ha iya. Pananglitan, hi Bianca nga taga-Alemanya nagsiring: “Nagpapasalamat gud ako kan Jehova kay ginbubuligan niya ako ha akon mga problema ngan ginmamangnoan niya ako kada adlaw. An kalibotan masamok ngan waray kasigurohan. Pero samtang nag-aalagad ako kan Jehova, inaabat ko nga talwas ako ha iya pagmangno. Kon nagsasakripisyo ako para ha iya, ginbabalosan niya ako hin usa ka gatos ka pilo.”

¹⁹ Tagda liwat an 70 anyos nga hi Paula nga taga-Canada. Nalilimitahan an iya pag-alagad tungod han spina bifida (sakit ha butagtok). Hiya nagsiring: “An pagkaada limitasyon ha kahimsog diri nagpapasabot hin limitado nga ministeryo. Ginpapahimulosan ko an iba-iba nga pamaagi ha pagsangyaw, sugad han pagsangyaw ha telepono ngan diri pormal nga pagsangyaw. Basi maparig-on ako, may-ada ako notbuk nga may mga teksto ngan makapadasig nga mga pulong tikang ha aton mga publikasyon, ngan ginkikita ko ito ha panapanahon. Gintawag ko ito nga ‘Akon Notbuk han Katalwasan.’ An panluya temporaryo la kon nakapokus kita ha mga saad ni Jehova. Andam pirme hi Jehova ha pagbulig ha aton anoman an aton kahimtang.” Bangin diri pariho kanda Bianca o Paula an imo sitwasyon. Pero posible nga may mahunahuna ka nga mga kahimtang diin inabat mo nga ginbalosan ka ni Jehova pati an mga duok ha imo. Maopay gud nga pamalandungon kon paonan-o ka ginbabalosan ni Jehova yana ngan paonan-o ka niya babalosan ha tidaraon!

20. Ano an aton malalaoman kon padayon kita nga mag-aalagad kan Jehova hin bug-os-kalag?

²⁰ Tigamni nga an imo sinsero nga mga pag-ampo ‘may daku nga balos.’ Makakasiguro ka nga ‘katapos mo buhaton an kaburut-on han Dios, makakarawat mo an katumanan han saad.’ (Heb. 10:35, 36) Salit yana, padayon naton nga parig-unon an aton pagtoo ngan bug-os-kalag nga mag-alagad kan Jehova. Ha pagbuhat hini, makakasarig kita nga babalosan kita ni Jehova.​—Basaha an Colosas 3:23, 24.