NGANI JAKULIJIGANYA 17
NYIMBO NA. 111 Magongo Gakuŵela Ŵakusangalala
Akatyoka mu Paladaiso Jwausimu
“Mŵe ŵakusangalala ni ŵakondwa mpaka ndaŵi syangamala.”—YES. 65:18.
CHAKULINGA CHA NGANIJI
Chitukambilane yindu yambone yatukusapata ligongo lyakuŵa m’paladaiso jwausimu nambosoni yampaka tutende kuti twakamuchisye ŵane kuŵa m’paladaisoju.
1. Ana paladaiso jwausimu ali chichi soni tukusosekwa kuŵa ŵakusimichisya ya chichi?
MASIKU agano pachilambopa pana paladaiso jwajugumbile ni ŵandu ŵakutenda yindu yambone. Paladaisoju jugumbele ni ŵandu mamiliyoni gejinji ŵakusangalala ni mtendele usyesyene. Mwamti ŵandu ŵeleŵa ali ŵakusachilila kutama m’paladaisoju nambosoni kwakamuchisya ŵandu ŵajinji kuti asimanikwe m’paladaisoju. Ana paladaiso jweleju ni jwapi? Ali paladaiso jwausimu. a
2. Ana ni chindu chakusimonjesya chapi chatesile Yehofa pakulinganya paladaiso jwausimu?
2 Yehofa alinganyisye mwakusimonjesya paladaisoju pasikati pa ŵandu ŵakwaŵenga achimjawo, ŵakusakala, soni ŵakogoya ŵakusalongoleledwa ni Satana. (1 Yoh. 5:19; Chiw. 12:12) Mlungu jwetu jwachinonyelo akuyiwona yindu yakogoya yayikutendekwa pachilambopa. Mwamti jwalakwe akwakamuchisya ŵakutumichila ŵakwe kuŵa pamalo gambone soni kuŵa ŵakusangalala pakumtumichila jwalakwe. Maloŵe gakwe gakusajilondesya paladaiso jwausimuju kuŵa ‘malo gakutilila’ nambosoni “litimbe lya mesi gejinji.” (Yes. 4:6; 58:11) Yehofa akwakamuchisya ŵandu ŵali mu paladaisoju kuŵa ŵakusangalala soni akwaŵambasya ku yindu yakogoya atamose kuti akutama m’masiku gakumalisya gakusakalaga.—Yes. 54:14; 2 Tim. 3:1.
3. Ana yakulochesya yakuyisala pa Yesaya chaputala 65 yakwanilichikwe chamti uli mundaŵi ja Ayisalayeli?
3 Kupitila mwa jwakulochesya Yesaya, Yehofa jwalondesisye mwauchiŵela umi kwa ŵandu ŵakutama m’paladaiso jwausimuju. Mpaka ajipate nganiji pakuŵalanga Yesaya chaputala 65 chachikusalondesya kuti paladaiso jweleju jwakwanilichikwe kandanda mu 537 B.C.E. Pandaŵiji, Ayuda ŵaŵagalawiche mtima ŵagopoledwe mu ukapolo ku Babulo ni kuwujila kumangwawo. Yehofa ŵapele yindu yejinji yambone nambosoni ŵakamuchisye jemanjaji kuti ataŵesoni msinda wa Yelusalemu uwajonasiche ni nyumba ja Mlungu gagaliji malo gakumtumichilila Mlungu jwakuwona ku Isalayeli.—Yes. 51:11; Sak. 8:3.
4. Ana yakulochesya yayikusimanikwa pa Yesaya chaputala 65 yikwanilichikwa chamti uli masiku getu gano?
4 Kukwanilichikwa kwaŵili kwa yakulochesyayi kwatandite mu 1919 C.E., pandaŵi jele ŵakutumichila ŵa Yehofa ŵa masiku agano ŵagopoledwe mu ukapolo wa Babulo Jwamkulungwa. Kaneko paladaiso jwausimuju jwatandite kuwanda pachilambo chosope. Ŵakulalichila ya Uchimwene wa Mlungu ŵalipeleche mnope pakutamilikasya mipingo jijakwete ŵakulalichila ŵajinji ŵaŵatandite kulosya ndamo syele msimu wa Mlungu ukusamkamuchisya mundu kukola. Mwamti achalume ni achakongwe ŵaŵaliji ŵachiwawa, soni ŵaŵakwete mtima wauchinyama ŵatandite kuleka ndamo syawo ni ‘kuwala umundu wasambano wele wapanganyidwe mwakamulana ni yakusasaka Mlungu.’ (Aef. 4:24) Yili yisyene kuti yindu yejinji yaŵayisasile Yesaya yichikwanilichikwa m’chilambo chasambano. Atamose yili myoyo, apano pana yindu yejinji yambone yatukusangalala nayo. Sambano, kwende tukambilane yine mwa yindu yeleyi soni ligongo lyakwe ngatukusosekwa kutyoka m’paladaisoju.
UMI WA ŴANDU ŴALI M’PALADAISO JWAUSIMU
5. Mwakamula ni Yesaya 65:13, ana tukusangalala ni chichi m’paladaiso jwausimu?
5 Akwete yilu yambone soni ali ŵakusangalala. Yakulochesya ya Yesayayi yikusalekanganya pasikati pa umi wakwete ŵandu ŵali m’paladaiso jwausimu ni umi wa ŵandu ŵali kusa kwa paladaisoju. (Aŵalanje Yesaya 65:13.) Yehofa akusiŵapa ŵakutumichila ŵakwe yakusosechela yawo yausimu. Akusatupa msimu wakwe weswela, Baibulo nambosoni chakulya chausimu chejinji chakuti ‘tulye, . . . tumwe’ soni kusangalala nacho. (Alole Chiwunukuko 22:17.) Mwakulekangana ni yeleyi, ŵandu ŵali kusa kwa paladaiso jwausimuju ali ‘ŵasala . . . , ŵanjota . . . , [nambosoni] ŵasooni.’ Yili myoyo ligongo jemanjaji nganakola upile wakupata yakusosechela yawo yausimu.—Amo. 8:11.
6. Ana pa Yoweli 2:21-24 pakusala yindu yambone yapi yakusatupa Yehofa soni ana yeleyi yikusatukamuchisya chamti uli?
6 Mu yakulochesya yakwe, Yoweli jwakamulichisye masengo yakulya yakusosechela paumi wa mundu mpela tiligu, finyo nambosoni mawuta ga olifi pakulosya koloŵa makono kwa Yehofa pakwakamuchisya ŵandu ŵakwe ni yindu yakusosechela kupwatikapo yindu yausimu. (Yow. 2:21-24) Yehofa akusatupa chakulya chausimuchi kupitila m’Baibulo, mabuku gakulondesya Baibulo, misongano ja mpingo, ja dela soni ja chigawo. Mpaka tupindule ni chakulya chausimuchi lisiku lililyose yampaka yitutendekasyeje kuŵa ŵakusangalala nambosoni kukola umi wambone.
7. Ana ni yindu yapi yayikusatukamuchisya ‘kwimba mwakondwa’? (Yesaya 65:14)
7 Kuŵa ŵakusangalala soni ŵakwikutila. Ŵakutumichila ŵa Mlungu “akusajimba mwakondwa” ligongo lyakuti akwete yindu yakumyamichilila Yehofa. (Aŵalanje Yesaya 65:14.) Maloŵe gakulimbikasya gakusatusalila Yehofa kupitila m’Baibulo, soni chembecheyo chatukwete kupitila mu mbopesi jakutuwombola ja Klistu Yesu yikusatukamuchisya kuŵa ŵakusangalala mumtima. Kukambilana yeleyi ni ŵakulupilila achimjetu kukusatukamuchisya kuŵa ŵakusangalala yisyesyene.—Sal. 34:8; 133:1-3.
8. Ana ni yindu yiŵili yakusosekwa mnope yapi yayikusasimanikwa m’paladaiso jwausimu?
8 Chinonyelo nambosoni mkamulano wawupali pasikati pa ŵakutumichila ŵa Yehofa, yili yindu yiŵili yekulungwa mnope yayikusamanyikasya paladaiso jwausimu. “Chakwakamulanya ŵandu chambone mnope” chelechi chikusatukamuchisya kumanyilila mwawuchiŵela umi m’chilambo chasambano pandaŵi jele ŵakutumichila ŵa Yehofa chachisangalala ni kunonyelana nambosoni kukamulana yisyesyene kupunda mwakutendela masiku agano. (Akolo. 3:14) Mlongo jwine jwa Chiklistu pakulondesya yaŵayiweni pasikati pa ŵakutumichila ŵa Yehofa kwandaŵi jandanda jwatite, “Nganimanyililaga yampaka ndende kuti mbe jwakusangalala pajika nambosoni mwiŵasa mwangu. Nambo ndaŵi jandanda jinaweni ŵandu ali mkulosyana chinonyelo chisyesyene jili ndaŵi jinasimene ni ŵa Mboni sya Yehofa.” Jwalijose jwakusaka kuŵa jwakusangalala yisyesyene nambosoni kola mtima wakwikutila akusosekwa kuŵa mu paladaiso jwetu jwausimu. Kusala yisyene, mwangasamala kandu ni yakusati katuwone ŵandu kuchilamboku tukwete lina lyakuchimbichika, nambosoni mbili jambone pasikati pa ŵakutumichila achimjetu nambosoni pameso pa Yehofa.—Yes. 65:15.
9. Ana lilemba lya Yesaya 65:16, 17 likusala yamti uli pakwamba yakusawusya yatukusasimana nayo apano?
9 Akusaŵa ŵakutamilichika nganisyo soni ŵangatenganyika. Pa Yesaya 65:14 pakusasala kuti ŵandu ŵasagwile kuŵa kusa kwa paladaiso jwakuwanichisyaju ‘akusalila mnope ligongo lya usawuchi mumtima. Akusalila kwakukulungwa ligongo lyakupikana yakupweteka mumtima.’ Nambi wuli pakwamba ya yindu yayikusiyatendekasya ŵakutumichila ŵa Yehofa kupikana kupweteka nambosoni kulaga nayo? Mwapanandipanandi, yindu yeleyi ‘yichiliŵalichika nipo yichityosyedwa pameso’ pa Mlungu. (Aŵalanje Yesaya 65:16, 17.) Yehofa chachimasya yakusawusya yatukusimana nayo. Nambosoni mkupita kwandaŵi ngasitukumbuchila ata panandi yakusawusya yeleyi.
10. Ligongo chichi wawojo akuyiwona kuti uli upile wekulungwa kusimanikwa m’gulu ja Mlungu? (Alole chiwulili.)
10 Atamose mundaŵi ajino, tukusaŵa ŵakusangalala patusimanikwe pamisongano ja Chiklistu, ligongo pandaŵi jeleji tukusaliŵalila yakusawusya yatukusimana nayo m’chilambo chakusakalachi. Tukusalimbisya mtendele wawupali mu paladaiso jwausimuju mwakulosya chinonyelo, chisangalalo, mtendele, umbone mtima, nambosoni kufasa syasili ndamo syele msimu wa Mlungu ukusamkamuchisya mundu kukola. (Agal. 5:22, 23) Kusala yisyene uli upile wekulungwa kusimanikwa mu gulu ja Mlungu. Ŵandu ŵachachipitilisya kuŵape mu paladaiso jwausimuju chachikuwona kukwanilichikwa kusyesyene kwa yindu yasasile Mlungu pakwamba ya “chilambo cha kwinani kwasambano ni chilambo chapasi chasambano.”
Yili yakusangalasya kuŵa mbali ja liŵasa lya Mlungu m’paladaiso jwausimu (Alole ndime 10) c
11. Mwakamulana ni Yesaya 65:18, 19, ana paladaiso jwausimu jwalinganyisye Yehofa jukusatukwaya chamti uli?
11 Tukusayamichila soni kunyadila. Yesaya jwapitilisye kusala ligongo lyakwe tuli “ŵakusangalala ni ŵakondwa” mu paladaiso jwakuwanichisyaju. Ligongo Yehofa ni juŵatamilikasisye paladaisoju. (Aŵalanje Yesaya 65:18, 19.) Yili yangasimonjesya kuti Yehofa akutukamulichisya masengo m’weji pakwakamuchisya ŵandu kuti akopoche mu dini syawo syaunami ni kwinjila mu paladaiso jwausimuju. Myoyo tukusanyadila mnope ni yindu yambone yatukusasangalala nayo ligongo lyakuŵa mu gulu ja Mlungu yayikusatukamuchisyasoni kuti twasalileje ŵandu ŵane ya yindu yeleyi.—Yel. 31:12.
12. Ana akusapikana uli pakuganichisya maloŵe gagakusasimanikwa pa Yesaya 65:20-24, soni ligongo chichi?
12 Tukusayamichila soni kunyadila chembecheyo chatukwete ligongo lyakuŵa m’paladaiso jwausimu. Agambe ganichisya ya yindu yambone yatuchiyiwona nambosoni kutenda m’chilambo chasambano cha Mlungu. Baibulo jikusasala kuti, “Ŵanache ngasawasoni ali makandi, nipo ŵachekulupe wosope tachiŵa chijumi ndaŵi jawo josope.” Nambosoni ‘tuchitaŵa nyumba nipo tuchitamamo, tuchipanda migunda ja mipeleya tuchilya yisogosi yakwe.’ ‘Ngasitukamula masengo pachabe . . . ligongo AMBUJE tachitupa upile.’ Yehofa akutusalila kuti tuchiŵa pamalo gambone nambosoni tuchikola umi wambone. Jwalakwe tachimanyilila yakusosechela ya mundu jwalijose mkanamalisye kose kupopela mundujo, mwamti ‘tachichipa chachijumi chilichose chayikusaka.’—Yes. 65:20-24; Sal. 145:16.
13. Ana lilemba lya Yesaya 65:25 likusalondesya kuti ŵandu akusachenga chamti uli patandite kumtumichila Yehofa?
13 Kutama mwamtendele soni mwakuteteyeka. Ni chikamuchisyo cha msimu wa Mlungu, ŵandu wosope ŵaŵakwete ndamo syakusakala syauchinyama akombwele kuchenga umi wawo. (Aŵalanje Yesaya 65:25.) Jemanjaji alesile yitendo yawo yakusakala. (Alo. 12:2; Aef. 4:22-24) Yili yisyene kuti ŵandu ŵa Mlungu ali ŵangali umlama, mwamti chitupitilisyeje kulemwesya yindu yine ni yine. Nambope, Yehofa amkamuchisye “mundu jwalijose” kola mtima wakamulana ni achimjakwe mwakupitilisya kumnonyela Yehofa soni kunonyelana jwine ni mjakwe yayikusatukamuchisya kuti tuŵeje ŵakamulana nambosoni kuŵa pamtendele. (Tit. 2:11) Kusala yisyene yindu yeleyi yili yakusimonjesya yele mundu jwine nganaŵa akombwele kutenda nambo Yehofape basi.
14. Ana lilemba lya Yesaya 65:25 lyakwanilichikwe chamti uli pa mnyamata jwine?
14 Ana yili yisyene kuti mundu mpaka achenje ndamo jakwe? Aganichisye chakutendekwa achi. Mnyamata jwine jwa yaka 20 jwatamilaga kutaŵidwa ligongo lya ndamo syakwe syakusakala nambosoni kunonyela yindu yachiwawa. Jwalakwe jwataŵidwaga ligongo lya kwiŵa magalimoto, kwajiŵila ŵandu yindu mnyumba syawo, nambosoni magambo gane gakogoya. Mwamti jwaŵaga jwakoseka kutandisya yachiwawa ndaŵi jilijose. Nambo pajwapikene yisyesyene ya m’Baibulo kwandaŵi jandanda jwatandite kusimanikwa pamisongano ja Mboni sya Yehofa. Mwamti jwaŵele jwakusimichisya kuti apatile yindu yakusosekwa kwendela paumi wakwe kwakuli kumtumichila Yehofa m’paladaiso jwausimu. Panyuma pakuŵa jwa Mboni sya Yehofa jwam’batisidwe, jwatandite ganichisya mwalikumkwayila lilemba lya Yesaya 65:25. Mwamti jwakombwele kuchenga ndamo jakwe jijamtendekasyaga kuŵa jwakogoya mpela lisimba, nikuŵa mundu jwamtendele mpela ngondolo.
15. Ligongo chichi tukusosekwa kwaŵilanjila ŵane kuti ayiche m’paladaiso jwausimu, soni ana mpaka tutende chamti uli yeleyi?
15 Pa Yesaya 65:13 pakusatanda ni maloŵe gakuti, “AMBUJE akuŵecheta kuti.” Pele Baibulo ja Chilambo Chasambano ndime ja 25 jikusamalisya ni maloŵe gakuti, “akuti myoyo Yehofa.” Yakusasala Yehofa ndaŵi syosope yikusakwanilichikwa. (Yes. 55:10, 11) Mwamti paladaiso jwausimu jupali nditu. Yehofa akamuchisye kuti papagwe abale ni alongo ŵakamulana yisyesyene. Ŵatuli m’paladaiso jwausimuju tukusalipikana kuŵa pamtendele nambosoni kuŵa ŵakuteteyeka m’chilambo chakunonyela yindu yachiwawachi. (Sal. 72:7) Pa ligongo lyeleli, tuli ŵakusachilila kwakamuchisya ŵandu ŵajinji mwampaka tukombolele kuti asimanikwe m’paladaiso jwausimuju. Mpaka tutende yeleyi mwakupitilisya kukamula masengo gakupanganya ŵakulijiganya.—Mat. 28:19, 20.
YAMPAKA TUTENDE KUTI TWAKAMUCHISYE ŴANE KWINJILA M’PALADAISO JWAUSIMU
16. Ana ni chichi chachikusichakamuchisya ŵandu kola mtima wakusachilila kwinjila m’paladaiso jwausimu?
16 Jwalijose jwetuwe akwete udindo wakwakamuchisya ŵandu kwinjila m’paladaiso jwausimu. Mpaka tukwanilisye udindowu mwakumsyasya Yehofa. Jwalakwe jwangakanganichisyaga ŵandu kuti aŵe mu gulu jakwe. Nambo akusamwutila mundu jwalijose kwa jwalakwe mwachinonyelo. (Yoh. 6:44; Yel. 31:3) Ŵandu ŵakwete mitima jambone patandite kulijiganya ndamo syambone syakwete Yehofa nambosoni umundu wakwe wakusangalasya, yangasawusyaga kuŵa kumbali jakwe. Ana mpaka twakamuchisye chamti uli ŵandu kukola mtima wakusachilila kuŵa m’paladaiso jwausimu kupitila mu ndamo syetu syambone soni yitendo yetu?
17. Ana tukusosekwa kutenda chichi kuti twakamuchisye ŵane kukola mtima wakusachilila kwinjila m’paladaiso jwausimu?
17 Litala limo lyampaka tukuye pakwakamuchisya ŵandu kukola mtima wakusachilila kwinjila m’paladaiso jwausimu lili kwanonyela soni kwatendela yambone ŵakulupilila achimjetu. Ŵandu ŵasambano patandite kusimanikwa pamisongano tukusasaka kuti aŵecheteje mpela muŵaŵechetele ŵandu ŵangakulupilila ŵaŵasimanikwaga pamisongano ku mpingo wakala wa ku Kolinto. Jemanjaji ŵayikene pakusala kuti, “Nditu Mlungu ali ni jemanja.” (1 Akoli. 14:24, 25; Sak. 8:23) Myoyo, kwende tupitilisye kukuya malangiso gakuti, “Mtameje mwamtendele pasikati penu.”—1 Ates. 5:13.
18. Ana chichi champaka chatendekasye ŵandu kukola mtima ŵakusaka kwinjila m’gulu ja Mlungu?
18 Tukusosekwa kulimbichila kuti twawoneje Aklistu achimjetu mpela yakusati Yehofa pakwawona jemanjaji. Mpaka tukombole kutenda yeleyi mwakulola yindu yambone yakusatenda jemanjajo mmalo mwakulola yakulepela yawo yele mkupita kwandaŵi yichiŵa kuti ngakutenda soni yiliŵaliche. Mpaka tumasye ungakamulana wetu naga mwachinonyelo tukuŵa “ŵambone kwa ŵane, ŵakutendelana chanasa soni ŵakuluchilana ni mtima wosope.” (Aef. 4:32) Kutenda yeleyi kuchakamuchisya ŵandu kukola mtima wakusachilila kwinjila m’paladaiso jwausimu kuti nombe nawo atendeledweje yakulandanayo. b
AKATYOKA M’PALADAISO JWAUSIMU
19. (a) Mwakamulana ni libokosi lyakuti, “ Ŵajilesile Gulu ja Mlungu Nambo Kaneko Ŵawujilesoni,” ana ŵandu ŵane asasile yamti uli panyuma pakuwujilasoni m’paladaiso jwausimu? (b) Ana tukusosekwa kuŵa ŵakusimichisya kutenda chichi? (Alole chiwulili.)
19 Kusala yisyene tuli ŵakuyamichila mnope ligongo lya paladaiso jwausimuju. Juli jwakusangalasya kupundana ni kalakose. Mugumbele ŵakutumichila ŵa Yehofa ŵajinji kupundana ni kalakose. Kwende tupitilisye kuyamichila paladaiso jwatulinganyichisye Yehofaju. Jwalijose jwakusaka kuŵa jwakusangalala, jwakwikutila, jwangatenganyika nambosoni kuŵa pa malo gambone akusosekwa kwinjila mu paladaiso jwausimuju nambosoni ngatyoka. Tuŵejesoni ŵakusamala ligongo lyakuti Satana akutenda yampaka akombole kuti atutyosye m’paladaisoju. (1 Pet. 5:8; Chiw. 12:9) Nambope tukakunda kuti yeleyi yitutendechele. Myoyo, kwende ndaŵi syosope tuŵambaleje yindu yampaka yisokonasye kusalala soni mtendele wawupali m’paladaiso jwausimuju.
Ŵandu ŵele ŵakupitilisya kuŵa m’paladaiso jwausimu jwakuwanichisyaju chachisangalalasoni m’paladaiso jusyesyene (Alole ndime 19)
ANA MPAKA AJANJE ULI?
-
Ana paladaiso jwausimu ali chichi?
-
Ana ni yindu yambone yapi yatukusasangalala nayo m’paladaiso jwausimuju?
-
Ana mpaka tutende yamti uli kuti twakamuchisye ŵandu kwinjila m’paladaiso jwausimu?
NYIMBO NA. 144 Meso Gawo Gaŵeje pa Mboto!
a NGOPOLELO JA MALOŴEGA: Maloŵe gakuti “paladaiso jwausimu” gakusasala yindu yambone yakusasangalala nayo ŵandu ŵakusamtumichila Yehofa. Mu paladaiso jwausimuju tukusasangalala ni kuŵa pamkamulano wamtendele ni Yehofa nambosoni ŵakutumichila achimjetu.
b Alolele fidiyo pa jw.org ja mtwe wakuti, Ana Apano Alikwapi? Alena Žitníková: Ana Chakulinga Changu Chakwanilichikwe Chamtuli, ni alole yindu yambone yajwapatile mlongoju ligongo lyakuŵa m’paladaiso jwausimu.
c KULONDESYA CHIWULILI: Ŵandu ŵajinji pakusangalala kunguluka ni achimjawo pamisongano ja mpingo, m’bale jwine akuŵa pajika.
