Kwa yaka yejinji ŵandu aŵele ali mkukuwona kusangalalila kupagwa kwa Yesu kuŵa ndamo jaciklistu. Nambo misyungu jajikusatendekwa pandaŵiji jikusatutendekasya kusimonga ligongo lyakwe ŵajikamulenye ni kupagwa kwa Yesu.

Candanda, pana adisi jakusala ya Santa Claus [Mtati jwa Kilisimasi]. Yiwulili ya Santa Claus jwakwimbala, jwakola ndewu syeswela soni jwam’wale yakuwala yecejewu, yawandile mnope pandaŵi jele kampani jine jakupanganya yakumwa ku North America jayijambwile mu 1931. M’yaka ya m’ma 1950, ŵandu ŵane ku Brazil ŵalesile kamulicisya masengo yiwuli yakumanyikwa mnope kumangwawoko ya Grandpa Indian ni kutanda kamulicisya masengo yiwulili ya Santa Claus. Yakuyicisya yakwe, mundu jwine jamlijiganye mnope lina lyakwe Carlos E. Fantinati, ŵasasile kuti ŵandu ŵayinonyelaga mnope yiwulili ya Santa Claus kupunda ya Grandpa Indian, soni ya Yesu ali likandi. Yiwulili ya Santa Claus yatandite kwimila cindimba ca pa December 25. Nambo ana cakusawusya pangani jakusangalalila kupagwa kwa Yesu cilipe adisi jakusala ya Santa Claus? Kuti tujanje ciwusyoci, kwende tulole kaje yayatendekwaga mu ndaŵi ja Aklistu ŵandanda.

Buku ja Encyclopedia Britannica jasasile kuti, “M’yaka 200 Ciklistu cili citandite, ŵandu ŵasisyanaga mnope pangani jakusangalalila masiku gakupagwa ga ŵandu ŵaŵawulajikwe ligongo lya cikulupi cawo, mpela Yesu. Ligongo cici yeleyi yatendekwaga? Ligongo lyakuti Aklistu ŵakuwonaga kusangalalila lisiku lyakupagwa kuŵa msyungu wacikusa, waŵasosekwaga kuwuŵambala. Sonitu, m’Baibulo pangali paŵasasile lisiku liŵapagwile Yesu.

Pali papitile yaka yakupunda 300 ciwile Yesu, Calici Cakatolika catandisye kusangalalila kupagwa kwa Yesu, atamose kuti Aklistu ŵandanda ŵasisyaga mnope yeleyi. Calicici casakaga kuŵa cakumanyikwa mnope mwakutanda kutenda misyungu jacikusa ja dini jaciloma soni yindimba yawo yine. Buku jine jakolanjikwa Christmas in America, jaŵalembile Penne L. Restad jasasile kuti caka cilicose, kutandila pa December 17 mpaka pa January 1, “Aloma ŵajinji ŵatendaga yindimba soni mang’asi gakulekanganalekangana pakusaka kucimbicisya milungu jawo.” Pa December 25, Aloma ŵasangalalilaga kupagwa kwa lyuŵa lyangagomecekwa. Pakusaka kwakopa Aloma ŵajinji, Calici Cakatolika casagwile lisiku lyaŵasangalalilaga Aloma kupagwa kwa lyuŵa kuti liŵe lisiku lyakusangalalila kupagwa kwa Yesu. Buku jakusala ya Santa Claus, jaŵalembile Gerry Bowler jasasile kuti, “Alomawo ŵajendelecele kutenda yindimba yawo yacikusayo.”

M’yoyo, pelepa cakusawusya ni kusangalalila kupagwa kwa Yesu cili kuyatyocele. Buku ja The Battle for Christmas jaŵalembile Stephen Nissenbaum jasasile kuti kusangalalila kupagwa kwa Yesu kuli ndamo jacikusa jaŵajijinjisye mu dini ja Ciklistu. M’yoyo, kusangalalila kupagwa kwa Yesu kuli kunyosya Mlungu soni Mwanagwe, Yeu Klistu. Ngani jeleji jili jekulungwa. Baibulo jikusawusya kuti, “Ana pana unasi watuli pasikati pa cilungamo ni ungapikanila malamusi? Kapena paka kamulana kwatuli pasikati pa lilanguka ni cipi?” (2 Akolinto 6:14) Mpela citela cacipindice, kusangalalila kupagwa kwa Yesu kuli ndamo jepindimale ‘janganijiŵa jijongwece.’—Mlaliki 1:15.