YOSEFA BORO ARIMATAYA ainongo nga ko aima du na wingbaduse ka ndu fuo gu banyaki nangia ga aRomo te. Aboro aini Pondio Pirato ni gu boro naima du na nyakarii ni kerehe. Ono tie, tipa ka kpisido Yesu rogo iriiri gene, si aaida boro sana Pirato asana tipa ko idi pa kangba Yesu. Awa si amangi, gu fugodagbase naadu dagba Yosefa na Pirato aadunga ni kpakarakpakaraha wa gu Yosefa arengbe ka berãha nga si nika du te. Fuo ino Pirato gupai ngba banyaki nga Yesu ima kpi, ko aidi pa kangba Yesu. Sidu, Yosefa mbuko kindi rogo kere gberãrago azubo berewe koyo i aimi Yesu ni.​—Mk. 15:​42-​45.

• Da nangia Yosefa Boro Arimataya?

• Gini pagume naadu dagbako na Yesu?

• Tipagine si aida gako pangbanga ngba ti ni tiro?

Gu Kitabu Wene Pangbanga nga ga Marako ga Mbori toro adu kugiipa kehe nayamba Yosefa nga “irisiirisi bororondo,” nga gu rondo nangia ga aYudo bakerepa rondo nga ga gumba-ngbanga na ki ngia gu rondo naangerakurii apai. (Mk. 15:​1, 43) Yosefa angia boro sa dagba abangbembatayo nga ga gako aboro, sidu, gere naundo rani ani ini wai ko arengbe ka ndu ka fura na banyaki nga ga aRomo ko. Si airiwongo te nga Yosefa angia kumukokumuko kumba a.​—Mt. 27:57.

Ga aYudo aboro rondo anaasoga Yesu asoga wa i adu ni badona yo. I ataburo tipa i imiko. Ono tie, i naya tipa Yosefa wẽ ko adu ‘ni weneringiko na ni ruruko.’ (Rk. 23:50) Ko aadunga wa badungu gu kura ga aYudo aboro rondo te, ko angia irarengo, gako mangaapai kidu ni wenehe, na ko kini mangi bakere asadatise kaa irisa ga Mbori arugute. Ko ‘aangera tipa ga Mbori ngbi a,’ na gere nayugo ndu gupai ko ada ti ni ni ga Yesu bawiriki. (Mk. 15:43; Mt. 27:57) Si nawira gupai nga ko aima kpinyemu ga Yesu pangbanga, bambiko rengo gbiati ruru sarangbanga aima du na nyanyakipaha fuko.

Yoane 19:38 nape gupai nga Yosefa angia “ga Yesu bawiriki . . . ni gbuko bambiko gunde aYudo.” Ginipai Yosefa aagunde behe? Ko aima ino gupai nga aYudo anaasoga Yesu asoga na ko aima ino pa gayo diaberã ka do ai gu boro bambutiria yo kusayo kaa du na idapase kutiko. (Yo. 7:​45-​49; 9:​22) Gu boro i anido ni kusayo bambutiria yo, aYudo anaasoga ni, kini kparatiyo ti ni, na kini bi ni ni kere gbegberẽ boro. Sidu, Yosefa aduadu dindikodindiko ka pe gupai gbaiga nga ko ima ida kuti Yesu. Ka ko amangihe wo, ka ko aima zanga gako bangiriba gbiati gu irisa ko anaagbiaha.

Anga kina Yosefa sa naadu rogo gi kpakarapai re te. Ringbisihe kuti Yoane 12:​42, ‘dungu aboro aidi pa [Yesu] dagba abazogo aboro yo; ono ka i agumba nga ha ya bambiko aFarusi, i ka kusa yo bambutiria yo.’ Gu kura boro berewe naadu rogo gu bangisa kpakarapai re angia gu ga aYudo boro rondo nangia Nikodemo.​—⁠Yo. 3:​1-​10; 7:​50-​52.

Wa si avura du nga Yosefa angia bawiriki, ko aarengbanga ka pehe gbaiga te. Gupai re aima du ni kerepai ringbisihe kuti agu afugo Yesu nga: “Gu ni nikakusa pa re ku bara bangiri aboro, mi akúsa pa ni a tigimi ku bara bangiri Buba du ngbangbaturũ yo. Ono gu ni ka oro rimore ku bara bangiri aboro, mi aóra rimoni ku bara bangiri Buba du ngbangbaturũ yo.” (Mt. 10:​32, 33) Yosefa aaoronga rimo Yesu aora nga ko aainongo ko te te, ono ko aadunga a na wingbaduse ka idapa ko te. Ya mo mo na wingbaduse ka ida pako?

Ziazia Kekeapai nape gupai nga gu wenepai Yosefa amangihe angia ko aasongodanga gu buro nangia ga ga aYudo aboro rondo tipa Yesu te. (Rk. 23:51) Si nawira gupai a nga Yosefa aadunga ho ti gu regbo i aasarangbanga  Yesu te, a wa kura aboro naapehe. Ka si vura du nga kina ginipai naadu, rago aima gberã ni kerehe ti Yosefa ho ko abi gu iraira sarangbanga ni re, ono pai ho ka ko arengbe ka mangaha tipa ka rugusaha te!

Ti gu regbo Yesu akpi, si nawira gupai nga Yosefa aima diabe gako gunde na ki diberã ka undo apefuo Yesu. Gu diaberã ko amangihe re ni yuguyuguhe rogo agu afugo yo du rogo Marako 15:43 nga gu naya: ‘Yosefa ki rimi arima zukazuka koyo du Pirato ni, ki sana ko tipa kangba Yesu.’

Si nawira gupai nga Yosefa adu kinaho ti gu regbo Yesu akpi. Nirengo, ko aima ino pakpio Yesu mbata fu Pirato inihe. Sidu, ho Yosefa asanahe ni tipa kangba Yesu, si “airiwo airiwo” ti gu banyaki re singia ko aima kpi. (Mk. 15:44) Ka si du nga Yosefa aima bi Yesu rogo imisiri ti ngbunduru ngua-rungosi, ya mo bi gu kerepai re aima fõngbadu ko yo ko wisigi sangbakpotokoyo na ki mangi diaberã ni yangaraha ka manga rengo? Si ima rengba kadu wo. Ka si vura du nga kina ginipai naadu, Yosefa aima diaberã awere ka mangapai. Ko aarengbanga kadu berewe ni bawiriki rogo gbuko yo te.

Gu ndiko nangia ga aYudo anaape gupai nga agu aboro i asarangbanga yo sa kpio, i naakpisido yo mbata fu ti uru. (Pa Rug. 21:​22, 23) Ono tie, tipa aRomo tigayo, i anaambu kangba amangi gbegberẽpai ti ngua si ziri watadu i anaaba ha kusayo. Ono anga gupai re naadu berã Yosefa yo tipa Yesu te. Ga Yosefa vovo murö nga ga siimbia adu  kinaho mbembedi yo i aimi Yesu ni. I aakpisidongo boro mbata rogo gu murö re te, si nayugo gupai nga Yosefa ayego Arimataya yo * ku Yerusarema yo barambeda na ko ambakadihe tipa kaa kpisido agumeko rogoho. (Rk. 23:53; Yo. 19:41) Kpisido Yosefa Yesu rogo gako murö aima yugo gupai nga ko angia boro weneringise, na si adigisi gu sangbanebi nga i akpisido Masiya “na airakumuko.”​—⁠Yes. 53:​5, 8, 9.

Akitabu Wene Pangbanga dunduko biama nape gupai nga fuo dia yo kangba Yesu ti ngua, Yosefa akãihe na gigiri remu, na ki pigihe ku rogo gako vovo murö. (Mt. 27:​59-​61; Mk. 15:​46, 47; Rk. 23:​53, 55; Yo. 19:​38-​40) Gu boro peyo pani sa nga ni aundo Yosefa angia Nikodemo, nga guko naaye na wene fuo anzeme tipa kpisido Yesu. Wa duhe nga agi akumba ue re angia agu aboro naadu na payo ni nyanyakihe, si arengbanga kadu nga i atindi kangba Yesu nitiyo te. Si nawira gupai gbe nga i amangisunge na kura amoyambu i tindi kangbako na ki kpisidihe. Ono ka si vura du nga wo si amangi, gu sunge agi akumba ue re amangihe aadunga ni taata sunge te. Ai gu boro naanizadi kangba, ni anidu ni bibiriko ni tipa arame saba, na agu ahe dunduko ni anaazadaha anidu ni bibirikoho. (Geda 19:11; Agai 2:13) Gipai re arengbe ka sa gupai nga ka aboro naambedanga na ni ya rogo gu poso nga ga Pumbo Susiri na ni kpa Pumbo Susiri na agu apai naadu tipaha dunduko. (Geda 9:⁠6) Sidu, ho Yosefa amangi mbakadapai ni tipa kpisido Yesu, akurako aima rengba ka tona zanga kodatiyo na ko. Ono tie, ti gi regbo re, ko aima du na nyemu ka gbia agu asangbanapai dunduko narengbe ka kura mbiko kpisido ko Yesu ngba iriiri gene na mbiko yugoko tiko gbaiga ni ga Kristo bawiriki.

Fuo nyasa agu apangbanga du tipa kpisido Yesu, Ziazia Kekeapai afuranga berewe tipa Yosefa boro Arimataya te, na gipai re naye kuti gu sanahe nga: Ginipai namangi tipa ko? Gu rengo duho nga ani ainongo ho te. Ono tie, nibi gupai i napekehe re, si nawira gupai awira gbe nga ko aima yugo tiko ni Kristano gbaiga. Gu kurapai berewe nga, ti regbo aˈasada na akpakarapai, gako idapase gbiati wingbaduse aakio kina kumbatayo angianga kaa zera ya. Gure aayugo pa wenepai kumbatayo tipa ko.

Gi pangbanga re nakusa sanahe nga gu si aida ani berẽkuriihe wadu ani dunduko nga: Ya mo he ho, singia bangiriba, sunge marã, aũkumuko, nyemuse tipa aborokporo, watadu gaani ranirii nga gu ani abihe na nyanyakipaha gbe kisusi gaani pagume na Yekova?