ELIYA nyɛɛ kɛ gu Yordan Dɔgba a mi. E je Horeb Yoku ɔ nɔ nɛ e kɛ e hɛ mi tsɔɔ yiti je. E nyɛɛ otsihi abɔ. Amlɔ nɛ ɔ, e ba su e ma mi ngɛ Israel. E na kaa tsakemihi fuu ba ngɛ e ma a mi. Hiɔmi nɛ nɛ́ be kɛkɛɛ ɔ ha nɛ níhi puɛ, se amlɔ nɛ ɔ, hiɔmi bɔni nɛmi, nɛ níhi tsake. Gbo nyu je sisi, nɛ ngmɔ huli bɔni ngmɔ peemi. Eko ɔ, enɛ ɔ ha nɛ gbalɔ ɔ ná bua jɔmi. Se nihi nɛ a ngɛ ma a mi ɔ a he nɛ e ngɛ susue titli. Huɛ bɔmi kpakpa ko be a kɛ Yehowa a kpɛti. Loloolo ɔ, Baal jami pɔhe ngɛ ma a mi, nɛ Eliya ngɛ nítsumihi fuu nɛ e ma tsu. *

Ngɛ Abel Mehola ma a kasa nya a, Eliya na ngmɔ ngua ko nɛ a ngɛ pee. E na na kuhi 24 nɛ a bla mɛ enyɔɔnyɔ kɛ ngɛ hue. Nyumu ko ngɛ na kuuhi enyɔ nɛ kpɛ se ɔ kudɔe. Eliya ngɛ jamɛ a nyumu ɔ hlae. Nyumu ɔ biɛ ji Elisha. Lɛ nɛ Yehowa hla kaa e ba ye Eliya se. Eko ɔ, Eliya suɔ wawɛɛ kaa e maa na nyumu nɛ ɔ, ejakaa be ko ɔ, e susu kaa lɛ nɔ kake too pɛ nɛ e ngɛ Mawu anɔkuale yee.—1 Matsɛmɛ 18:22; 19:14-19.

Anɛ e dɔ Eliya kaa e maa ngɔ e nítsumi ɔmɛ eko kɛ wo nɔ ko dɛ, aloo e dɔ lɛ kaa hwɔɔ se ko ɔ, nɔ kpa ko ma ba ye e se lo? Wa li, nɛ wa be nyɛe maa tsɔɔ hu kaa eko ɔ, e susu jamɛ a ní ɔmɛ a he. Ngɛ anɔkuale mi ɔ, “nɔmlɔ adesa ji lɛ kaa wɔ nɔuu.” (Yakobo 5:17) Baiblo ɔ de ke: “Eliya je e tade klɔii ɔ ngɛ e he, nɛ e ngɔ wo Elisha.” (1 Matsɛmɛ 19:19) Eko ɔ, a kɛ jijɔ aloo apletsi he womi nɛ pee Eliya tade klɔii ɔ nɛ. Eliya tade klɔii tsɔɔ kaa Yehowa hla lɛ, nɛ e kɛ nítsumi klɛdɛɛ ko wo e dɛ. Tade ɔ nɛ Eliya ngɔ wo Elisha a hɛɛ sisi numi pɔtɛɛ ko. Eliya je e tsui mi nɛ e kplɛɛ fami nɛ Yehowa fã lɛ kaa e ya hla Elisha konɛ e ye e se ɔ nɔ. Eliya ngɛ hɛ kɛ nɔ fɔmi ngɛ Mawu mi nɛ e bu lɛ tue.

Niheyo ɔ hu suɔ wawɛɛ kaa e maa ye bua gbalɔ nɔmoyo ɔ. Elisha ba yi Eliya se amlɔ nɔuu. Mohu ɔ, e ba e he si nɛ e piɛɛ Eliya he kɛ tsu ní. Pee se ɔ, a ba le lɛ kaa “Eliya tsɔlɔ.” (2 Matsɛmɛ 3:11) Hyɛ bɔnɛ Eliya bua maa jɔ ha kaa e na tsɔlɔ ko nɛ maa ye bua lɛ! Eko ɔ, nyumu enyɔ nɛ ɔmɛ ba pee huɛmɛ nɛ nyu bi ngɛ a kpɛti. Atsinyɛ jemi ko be he kaa he wami nɛ a wo a sibi ɔ ha nɛ a nyɛ da ní yayahi nɛ nihi pee ngɛ ma a mi ɔ nya. Nɔ́ nɛ hí pe kulaa ji kaa Matsɛ Ahab yiwutso ní peepee ɔ ya hɛ mi.

Anɛ nɔ ko ye mo sane nɛ dɛ hyɛ lo? Akɛnɛ wa ngɛ je yaya nɛ ɔ mi heje ɔ, nihi pee wa ti nihi fuu nɔ́ yaya hyɛ. Ke o ná huɛ ko nɛ e suɔ Mawu ɔ, e ma nyɛ maa ye bua mo konɛ o nyɛ nɛ o da ní yayahi nɛ nihi peeɔ ɔ a nya. Jehanɛ se hu ɔ, o ma nyɛ maa kase níhi fuu kɛ je hemi kɛ yemi nɛ Eliya je kpo kɛ da ní yayamihi a nya a mi.

Eliya kɛ Elisha bɔ mɔde wawɛɛ kaa a ma ha nɛ huɛ bɔmi kpakpa nɛ hi ma mi bimɛ ɔmɛ kɛ  Mawu a kpɛti. E ngɛ heii kaa a tsɔse gbali kpahi. Eko ɔ, a to sukuu ko he blɔ nya ha mɛ. Se pee se ɔ, Yehowa ha Eliya nítsumi kpa. Yehowa de lɛ ke: “Tee si nɛ o ya Matsɛ Ahab ngɔ ngɛ Samaria.” (1 Matsɛmɛ 21:18) Mɛni Ahab pee?

Matsɛ ɔ ji hemi kɛ yemi kualɔ momo, nɛ e pee ní yayamihi kulaa pe Israel matsɛmɛ nɛ a sɛ e hlami ɔ. E ngɔ Yezebel, nɛ e ha nɛ Baal jami he si ngɛ ma a mi. Matsɛ ɔ nitsɛ hu kɛ e he wo Baal jami ɔ mi. (1 Matsɛmɛ 16:31-33) Ke a ngɛ Baal jae ɔ, kusumi komɛ nɛ a peeɔ ɔ kɔɔ fɔmi, ajuama bɔmi, kɛ jokuɛwi nɛ a kɛ mɛ sãa afɔle ɔ he. Jehanɛ se hu ɔ, lingmi nɛ ɔ pɛ nɛ Ahab gbo Yehowa nɔ tue. E kpataa we Siria matsɛ yiwutsotsɛ Benhadad hɛ mi kaa bɔnɛ Yehowa fã lɛ kaa e pee ɔ. E ngɛ heii kaa sika nɛ Ahab ma ná heje nɛ e bui Yehowa tue ɔ nɛ. (1 Matsɛmɛ, yi 20) Ahab kɛ Yezebel hɛ kɔ̃ɔ, nɛ a dii helo nya níhi fuu a se, nɛ a yi mi hu wa. Se amlɔ nɛ ɔ lɛɛ, a ní peepee ɔ hí kalemi.

Ahab ngɛ matsɛ we ngua ko ngɛ Samaria! E ngɛ matsɛ we ɔ eko hu ngɛ Yezreel. Kɛ je Samaria kɛ ya lejɛ ɔ kɛmi maa pee si tomi 23. Nabot pee wai ngmɔ ko ngɛ Ahab we ɔ kasa nya haa. Ahab hɛ kɔ̃ jamɛ a zugba a. Ahab tsɔ ya tsɛ Nabot kɛ ba e ngɔ nɛ e de Nabot kaa e jua wai ngmɔ ɔ ha lɛ, aloo e ma ha lɛ zugba kpa kɛ to nane mi. Se Nabot de lɛ ke: ‘Yehowa ngmɛ́ blɔ kaa ma ngɔ ye nɛmɛ a gbosi ní ɔ ngɔ ha mo.’ (1 Matsɛmɛ 21:3) Anɛ enɛ ɔ tsɔɔ kaa Nabot bui nɔ lo? Anɛ e susuu we níhi a he kɛ yɛ tsitsaa lo? Nihi fuu susu jã. Ngɛ anɔkuale mi ɔ, e kɛ Yehowa Mlaa a tsu ní. Yehowa Mlaa a ngmɛ́ blɔ kaa Israelbi nɛ a jua a weku gbosi ní kɛ ha nɔ ko konɛ e pee nɔ ɔ nɔ́ kulaa. (3 Mose 25:23-28) Nabot susu kaa e sɛ nɛ e gbo Mawu Mlaa a nɔ tue. E ngɛ hemi kɛ yemi kɛ kã, ejakaa e le kaa Ahab ma nyɛ maa gbe lɛ.

Ngɛ anɔkuale mi ɔ, Ahab susuu we Yehowa Mlaa a he. E je kɛ ho we mi ya kɛ “mi mi la, kɛ aywilɛho,” ejakaa e nine sui nɔ́ nɛ e ngɛ hlae ɔ nɔ. Wa kaneɔ ke: “E ho ya hwɔ si ngɛ e sa nɔ, nɛ e plɛ e hɛ mi ngɔ kpee gbogbo, nɛ e kua ní yemi.” (1 Matsɛmɛ 21:4) Benɛ Yezebel na kaa e huno ɔ mi mi fu ɔ, e to ga oya nɔuu konɛ e ha nɛ e nine nɛ su nɔ́ nɛ e ngɛ hlae ɔ nɔ. Enɛ ɔ ha nɛ e kpata weku ko nɛ peeɔ dami ní ɔ hɛ mi.

Ke o kane blɔ nɔ nɛ e gu kɛ ha nɛ Ahab nine su zugba nɛ ɔ nɔ ɔ, o maa na kaa e ji yo yiwutsotsɛ nitsɛnitsɛ. Manyɛ Yezebel le kaa Mawu Mlaa a tsɔɔ kaa ja a nu odase yeli enyɔ a nya mi munyu loko a ma nyɛ maa bu nɔ ko fɔ. (5 Mose 19:15) Enɛ ɔ he ɔ, e ngma sɛ womi ngɛ Ahab biɛ mi ya ha ma nimeli nɛ a ngɛ Yezreel ɔ konɛ a ya hla nimli enyɔ nɛ a ye odase kɛ si Nabot kaa e bɔ musu, lɔɔ he ɔ, e sa gbenɔ. E ga tsɔmi ɔ ye manye. “Yaka nimli enyɔ” ye odase kɛ si Nabot, nɛ a fiaa lɛ tɛ nɛ a gbe lɛ. Pi Nabot pɛ nɛ a gbe, a gbe e binyumu ɔmɛ hulɔ! * (1 Matsɛmɛ 21:5-14;  3 Mose 24:16; 2 Matsɛmɛ 9:26) Ahab ha nɛ e yo ɔ kpɔ he blɔ nɛ e ngɛ kaa wekuyi ɔ ngɛ e dɛ, nɛ e ha nɛ a gbe nihi nɛ a pee we yayami ko.

Mo susu bɔnɛ Eliya maa pee e ní ha benɛ Yehowa ha nɛ e le nɔ́ nɛ matsɛ ɔ kɛ manyɛ ɔ pee ɔ he nɛ o hyɛ. Ke yiwutsotsɛmɛ ngɛ nihi nɛ a pee we nɔ́ ko a hɛ mi kpatae ɔ, e ngɛ dɔmi wawɛɛ. (La 73:3-5, 12, 13) Mwɔnɛ ɔ, wa naa ní gbeyegbeyehi nɛ nihi peeɔ. Be komɛ ɔ, nihi nɛ a peeɔ ní yayami nɛ ɔmɛ ji nihi nɛ a deɔ ke a ji Mawu nanemi dali nɛ a he biɛ. Se eko ɔ, munyu nɛ ɔ maa wo wa bua. Baiblo ɔ ha nɛ wa le kaa Yehowa naa nɔ́ tsuaa nɔ́ nɛ ngɛ nɔ yae ɔ. Wa be nyɛe maa pee nɔ́ ko kɛ laa lɛ. (Hebribi 4:13) Mɛni e peeɔ ngɛ yiwutso ní peepeehi nɛ e naa a he?

Yehowa tsɔ Eliya kɛ ho Ahab ngɔ ya. Mawu gba mi kpoo nɛ e de Eliya ke: “O maa na lɛ ngɛ Nabot wai ngmɔ ɔ mi.” (1 Matsɛmɛ 21:18) Benɛ Yezebel de Ahab kaa amlɔ nɛ ɔ wai ngmɔ ɔ peeɔ e nɔ́ ɔ, Ahab te si amlɔ kɛ ho ngmɔ ɔ mi ya. E li kulaa kaa Yehowa ngɛ lɛ hyɛe. Eko ɔ, benɛ e ngɛ ngmɔ ɔ mi nyɛe ɔ, e ngɛ bɔnɛ e ma plɛ kɛ dla ngmɔ ɔ kɛ pee abɔɔ nɛ ngɛ fɛu ngɛ e matsɛ we ɔ kasa nya ha a he susue. Se tlukaa a, Eliya ba hia si ngɛ lejɛ ɔ! Ahab hɛ mi tsake, nɛ e kɛ abofu bi Eliya ke: “Ye he nyɛlɔ, pe o nuu mi nɛ ɔ?”—1 Matsɛmɛ 21:20.

Nɔ́ nɛ Ahab de ɔ tsɔɔ níhi enyɔ nɛ e pee nɛ juɛmi be mi. Kekleekle ɔ, e bi Eliya ke, “Pe o nuu mi nɛ ɔ?” Jamɛ a munyu ɔ nɛ Ahab tu ɔ tsɔɔ kaa e susuu we Yehowa he. Yehowa “nuu” lɛ momo. Yehowa na kaa Ahab kɛ he blɔ nɛ e ngɛ kaa e peeɔ nɔ́ nɛ lɛ nitsɛ e suɔ ɔ tsu we ní ngɛ blɔ nɛ da nɔ, nɛ e bua jɔ Yezebel yiwutso ga tsɔmi ɔ he. Mawu na kaa Ahab bua jɔ helo nya níhi a he mohu pe nɛ e ma je mɔbɔ nami kpo, nɛ e maa ye dami sane, aloo nɛ e mi mi maa sã lɛ ngɛ nihi a he. Nɔ́ nɛ ji enyɔ ɔ, e tsɛ Eliya ke, “Ye he nyɛlɔ!” Enɛ ɔ tsɔɔ kaa Ahab ná ninyɛ kɛ ha Eliya. Eliya ji Yehowa Mawu huɛ nɛ e ma nyɛ maa ye bua Ahab konɛ e tu hɛ mi kpatami nɛ ma a nya fo.

Wa ma nyɛ maa kase nɔ́ ko kɛ je ní yayahi nɛ Ahab pee ɔ mi. E sa nɛ wa kai kaa Yehowa Mawu naa nɔ́ tsuaa nɔ́ nɛ wa peeɔ ɔ. Akɛnɛ e ji Tsɛ nɛ ngɛ suɔmi heje ɔ, ke wa ngɛ nɔ́ nɛ dɛ pee ɔ, e naa nɛ e suɔ kaa e maa ye bua wɔ nɛ wa tsake wa blɔ ɔ mɛ. E guu adesahi anɔkualetsɛmɛ nɛ a ji e huɛmɛ a nɔ kɛ yeɔ bua wɔ. Kaa bɔnɛ Eliya  pee ɔ, jamɛatsɛmɛ ɔmɛ hu ngɔɔ Mawu munyu ɔ kɛ ya haa a nyɛmimɛ adesahi. E sɛ nɛ waa bu Mawu huɛmɛ kaa a ji wa hɛ nyɛli kɔkɔɔkɔ!—La 141:5.

Eliya ha Ahab heto ke: “Ee, i nuu mo.” E le kaa Ahab ji julɔ, kɛ nɔ gbelɔ, nɛ e tsɔ Yehowa Mawu hɛ mi atua. Eliya ná kã loko e nyɛ da nyumu yiwutsotsɛ nɛ ɔ hɛ mi! Eliya de Ahab ke Mawu ma kpata e hɛ mi ngɛ nɔ́ nɛ e pee ɔ heje. Yehowa le níhi nɛ ya nɔ ɔ tsuo. E na kaa Ahab weku ɔ yiwutso ní peepee ɔ ngɛ nihi sãe. Enɛ ɔ he ɔ, Eliya de Ahab ke, Mawu ma ‘kpata e hɛ mi,’ nɛ e be hae nɛ e bi ko nɛ ba ye tsɛ ngɛ e se hu. Yezebel hu a ma kpata e hɛ mi.—1 Matsɛmɛ 21:20-26.

Eliya susu kaa ke nihi pee yiwutso ní ɔ, a ma nyɛ maa ye a he. Mwɔnɛ ɔ, nihi fuu hu susuɔ jã. Baiblo ɔ mi amaniɛ bɔmi nɛ ɔ ha nɛ wa na kaa Yehowa Mawu naa nihi tsuo nɛ yaa nɔ ɔ, nɛ e tsuɔ he ní ngɛ be nɛ sa mi. E Munyu ɔ maa nɔ mi kɛ haa wɔ kaa be ko maa ba nɛ Mawu maa po ní yayamihi tsuo a se! (La 37:10, 11) Se eko ɔ, o ma bi ke: ‘Anɛ nihi a tue pɛ nɛ Mawu gblaa lo? Anɛ e naa nɔ mɔbɔ lo?’

Eko ɔ, Eliya nya kpɛ e he ngɛ bɔnɛ Ahab pee e ní ngɛ Mawu kojomi sɛ gbi ɔ he ha a he. Baiblo ɔ de ke: “Benɛ Ahab nu munyu nɛ ɔmɛ ɔ, e hía e tade ɔmɛ, nɛ e bu kpekpe ya bo. E ha hwɔ, nɛ e kɛ kpekpe ya bo ɔ hwɔɔ si; nɛ ke e ngɛ nyɛe ɔ, e peeɔ kaa nɔ ko nɛ e nini je e nɔ.” (1 Matsɛmɛ 21:27) Anɛ Ahab tsake e tsui lo?

Ke e hí kulaa a, wa ma nyɛ ma de ke e pee tsakemi kpakpahi ngɛ e si himi mi. Ke nɔ ko woɔ e he nɔ, nɛ e peeɔ e he gbɔɔ kaa nɔ ko ji lɛ ɔ, e yee haa jamɛatsɛ ɔ kaa e maa ba e he si, se Ahab lɛɛ e ba e he si. Anɛ lɔɔ tsɔɔ kaa e pia e he niinɛ lo? Ha waa ngɔ nɔ́ nɛ Matsɛ Manase pee ɔ kɛ to nɔ́ nɛ Ahab pee ɔ he nɛ waa hyɛ. Manase ba ye tsɛ ngɛ Ahab gbenɔ se. Manase pee ní yayami nguanguahi pe Ahab. Benɛ Yehowa gbla Manase tue ɔ, Manase ba e he si nɛ e tsɛ Yehowa konɛ e ye bua lɛ. Manase pee ní kpahi hu kɛ piɛɛ he. E tsake e je mi bami, nɛ e ywia amagahi tsuo nɛ e puɛ ɔ. E bɔ mɔde kaa e ma sɔmɔ Yehowa, nɛ e wo nihi he wami konɛ mɛ hu a pee jã. (2 Kronika 33:1-17) Anɛ Ahab hu pee jã lo? Ohoo, e pee we jã.

Anɛ Yehowa na kaa Ahab kɛ e ní peepee tsɔɔ kaa nɔ́ nɛ e pee ɔ dɔ lɛ lo? Yehowa de Eliya ke: “O na bɔnɛ Ahab ba e he si ha mi ɔ? Akɛnɛ e pee nɔ́ nɛ ɔ heje ɔ, i be hae nɛ haomi ɔ nɛ ba e nɔ ngɛ e wami be mi; e binyumu ɔ yinɔ nɛ ma ngɔ haomi kɛ ba Ahab we ɔ nɔ!” (1 Matsɛmɛ 21:29) Anɛ Yehowa kɛ Ahab yayami ɔ pa lɛ lo? Ohoo. Ja Ahab pia e he kɛ je e tsui mi loko Yehowa maa na lɛ mɔbɔ. (Ezekiel 33:14-16) Se akɛnɛ Ahab pia e he bɔɔ ko heje ɔ, Yehowa hu na lɛ mɔbɔ bɔɔ ko. Ahab be gbenɔ yeyee nɛ maa ba e weku ɔ tsuo nɔ ɔ nae.

Loloolo ɔ, Yehowa to e yi mi kaa e ma kpata Ahab we ɔ hɛ mi. Pee se ɔ, Yehowa kɛ e bɔfo ɔmɛ mɛ kpe nɛ a susu blɔ nɛ hi pe kulaa nɛ a ma nyɛ maa gu nɔ kɛ mlɔɔ Ahab ɔ he. A mlɔɔ lɛ nɛ e ya ta ko nɛ e ya gbo ngɛ ta a nya. E kɛ we kulaa nɛ Yehowa kpata Ahab hɛ mi. Ahab plaa ngɛ ta a mi, nɛ muɔ dɛ kɛ je e pa a mi hluu kɛ ya si e gbo ngɛ e ta zugba lɛ ɔ mi. Baiblo ɔ de hu ke: Benɛ a fɔ ta zugba lɛ ɔ he ɔ, gbehi ya lɔ Ahab muɔ ɔ. Nɔ́ nɛ ɔ nɛ ya nɔ ngɛ ma hɛ mi ɔ ha nɛ nɔ́ nɛ Yehowa de Ahab kɛ gu Eliya nɔ ɔ ba mi. Yehowa de ke: “He nɛ gbe ɔmɛ lɔ Nabot muɔ ngɛ ɔ, lejɛ ɔ nɔuu a ma lɔ mo hu o muɔ ngɛ.”—1 Matsɛmɛ 21:19; 22:19-22, 34-38.

Ahab gbenɔ ɔ ha nɛ Eliya, kɛ Elisha, kɛ Mawu webi anɔkualetsɛmɛ kpahi ná nɔ mi mami kaa Yehowa hɛ ji kã kɛ hemi kɛ yemi nɛ Nabot je kpo ɔ nɔ. Mawu nɛ yeɔ dami sane ɔ gblaa yayami peeli a tue. E nyɛɔ peeɔ enɛ ɔ amlɔ nɔuu, nɛ e nyɛɔ peeɔ jã pee se hulɔ. E naa nɔ mɔbɔ ke e na kaa e he hia kaa e pee jã. (4 Mose 14:18) Eliya kase nɔ́ ko nɛ he hia wawɛɛ kɛ je munyu nɛ ɔ mi, ejakaa e na nɔ́ saminya ngɛ matsɛ yiwutsotsɛ nɛ ɔ dɛ mi! Anɛ nɔ ko ye mo sane ko nɛ dɛ lo? Anɛ o ngɛ blɔ hyɛe konɛ Mawu nɛ tsu sane ɔ he ní lo? Ke jã a, lɛɛ e sa nɛ o kase Eliya hemi kɛ yemi ɔ. E kɛ Elisha, e huɛ anɔkualetsɛ ɔ ya nɔ nɛ a fiɛɛ Mawu sɛ gbi ɔ, nɛ a ha we nɛ ní yayahi nɛ ya nɔ ɔ nɛ jɔ̃ a kɔni mi!