Ihinula kan Bibliya na sa huring mga aldaw magkakaigwa nin mga epidemya, kaiba na an paglakop nin mga hilang sa manlain-lain na nasyon na inaapod na pandemya. (Lucas 21:11) An siring na mga pandemya bakong padusa hali sa Diyos. An totoo, paagi sa saiyang Kahadian madali nang halion nin Diyos an gabos na problema sa salud, kaiba na an mga pandemya.

•  Nakahula daw sa Bibliya an mga pandemya?

•  Pinapadusahan daw nin Diyos an mga tawo paagi sa mga hilang?

•  An mga pandemya daw na nangyayari ngunyan padusa hali sa Diyos?

•  Matatapos pa daw an mga pandemya?

•  Mga bersikulo sa Bibliya manungod sa hilang

 Mayong ihinula an Bibliya manungod sa espesipikong mga pandemya o mga hilang, arog kan COVID-19, AIDS, o trangkaso Española. Pero ihinula kaiyan an manungod sa mga “epidemya” asin ‘nakakagadan na damat.’ (Lucas 21:11; Kapahayagan 6:8) An mga pangyayaring ini parte kan tanda kan “huring mga aldaw” na inaapod man na “pagtatapos kan sistema nin mga bagay.”—2 Timoteo 3:1; Mateo 24:3.

 May mababasa kita sa Bibliya na sa pirang pagkakataon ginamit nin Diyos an hilang para padusahan an mga tawo. Halimbawa, may pirang indibidwal na pinadusahan niya nin leproso. (Bilang 12:1-16; 2 Hade 5:20-27; 2 Cronica 26:16-21) Pero an mga pangyayaring ini bako man pandemya na nakaapektar pati sa mga inosenteng tawo. Imbes, espesipikong padusa iyan sa mga tawong nagrebelde sa Diyos.

 Dai. May mga nagsasabi na ginagamit nin Diyos an mga pandemya asin iba pang hilang tanganing padusahan an mga tawo ngunyan. Pero bako iyan an sinasabi kan Bibliya. Paano ta iyan naaraman?

 An mga nagsasamba sa Diyos—kaidto asin ngunyan—nagkakaigwa nin hilang. Halimbawa, an maimbod na lalaking si Timoteo ‘parating nagkakahilang.’ (1 Timoteo 5:23) Pero dai sinasabi kan Bibliya na an pagkakahilang niya tanda na dai na siya inuuyunan nin Diyos. Sa ngunyan, nagkakahilang man an maimbod na mga lingkod nin Diyos asin sa parati nangyayari iyan sa sainda huling nagkanurungod sana.—Parahulit 9:11.

 Saro pa, itinutukdo kan Bibliya na an panahon para padusahan nin Diyos an mga maraot dai pa nag-aabot. Imbes, nabubuhay kita ngunyan “sa aldaw nin kaligtasan”—iyan an panahon kun sain iniimbitaran nin Diyos an gabos na tawo na rumani sa saiya asin maligtas. (2 Corinto 6:2) An sarong paagi na ginigibo niya iyan iyo an gibuhon na paghuhulit sa bilog na kinaban na may positibong mensahe—an ‘maugmang bareta kan Kahadian.’—Mateo 24:14.

 Iyo, ihinula kan Bibliya na maabot an panahon na mayo na nin magkakahilang. Sa pamamahala kan kahadian nin Diyos, hahalion niya an gabos na problema sa salud. (Isaias 33:24; 35:5, 6) Hahalion niya an pagsakit, kulog, asin kagadanan. (Kapahayagan 21:4) Asin bubuhayon niya an mga nagadan, magkakaigwa sinda nin marahay na salud asin mabubuhay sa Paraiso digdi sa daga.—Salmo 37:29; Gibo 24:15.

 Kapahayagan 6:8: “Uya! nahiling ko an sarong malungsing kabayo, asin an nakasakay diyan igwa nin pangaran na Kagadanan. Asin an Lulubngan nagsusunod sa likudan niya. Asin tinawan sinda nin awtoridad . . . tanganing gumadan paagi . . . sa nakakagadan na epidemya.”

 Buot sabihon: Ipinaparisa kan propesiya manungod sa apat na parakabayo sa Apocalipsis na an mga pandemya mangyayari sa satong panahon.