‘Mulebelelana uluse nga umo ali ne ca kuilishanya ku munankwe.’—ABENA KOLOSE 3:13.

Bonse tulalufyanya. Tulakalifya abanensu kabili nabo bene balatukalifya. Kanshi bonse fye tulingile ukulabelelana uluse. Nga twaelela abanensu, tulaleka ukwenda ne cikonko ku mukoshi. Tatufwile ukulabwesesha “ububi pa bubi” nelyo ukwikalila fye ukulalanda pa fyo abanensu balufyanya. (Abena Roma 12:17) Inga ca kuti natumfwa sana ububi pa fyacitike kabili tulefilwa ukuleka ukutontonkanyapo? Nga caba ifyo, tufwile ukulanshanya no watukalifye mu mucinshi ninshi tuli fye babili. Ico twila mu kulanshanya no utukalifye kupanga umutende, te kuya mu kumulanga ukuti alilufyenye.—Abena Roma 12:18.

“Mwali-icefya pantu mumona bambi ukuti balimucila.”—ABENA FILIPI 2:3.

Bonse fye tulafwaya ukuba pamo na bantu aba mucinshi kabili abaicefya pantu tuleshiba ukuti bakulaba ne cikuuku kuli ifwe kabili te kuti batukalifye ku mufulo. Nomba nga tumona ukuti twalicila bambi kabili tulapampamina fye pa kucita ifyo tulefwaya, ninshi tukalapusana sana na bantu. Ne ci cikalenga  abantu bakaletutaluka kabili tatwakakwate ifibusa.

“Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—IMILIMO 10:34, 35.

Kabumba wesu tamona abantu bamo ukuti balicindama ukucila abanabo pa mulandu fye ne calo uko bafuma, ululimi balanda, inkanda yabo nelyo ifyuma ifyo bakwata. Baibolo itila: “Mu muntu umo e mo alengeele inko shonse isha bantunse.” (Imilimo 17:26) Kanshi fwe bantu fye bonse tuli lupwa. Nga tuli ne cikuuku no mucinshi ku bantu bonse, tulaba ne nsansa, tulalenga abantu ukuba ne nsansa kabili na Kabumba wesu alaba ne nsansa.

“Fwaleni. . . ukufuuka.”—ABENA KOLOSE 3:12.

Nga ca kuti tatwaba no bukali, abantu balatemwa ukuba na ifwe. Nga tatulekalipa bwangu cilangukila abantu ukulanda na ifwe nelyo ukutulungika. Nga ca kuti umuntu nakalipa e lyo ifwe tuli fye abatekanya, kuti calenga anashako ubukali. Pa Amapinda 15:1 patila: “Ukwasuka ukwafuuka kunasha ubukali, lelo amashiwi ya kukalifya yalenga umuntu ukukalipa.”

“Mwaba insansa ishingi mu kupeela ukucila ishaba mu kupokelela.”—IMILIMO 20:35.

Muno nshiku abantu abengi ni bakaitemwe. Lelo pa kuti tube ne nsansa sha cine cine, tulingile ukuba bakapekape. (Luka 6:38) Bakapekape balaba ne nsansa pantu balitemwa abantu ukucila ifyuma. Ifi batemwa abantu filalenga baletasha nga ca kuti babacitila ifisuma. (Abena Kolose 3:15) Yipusheni amuti, ‘Bushe nalitemwa ukuba pamo na bantu aba kaso kabili abashitasha nelyo natemwa ukuba pamo na bantu abatasha kabili bakapekape?’ Ico tulelandapo ca kuti, tulingile ukuba nga filya fine tufwaya abantu bambi babe.—Mateo 7:12.