?OL MAN OLI TALEM WANEM?

Sam man oli ting se Paradaes i wan kastom stori nomo. Sam narafala man oli bilif se paradaes i wan naesfala garen we ol gudfala man oli stap long hem, oli laef olwe, mo oli harem gud long gudfala wok blong olgeta.

?BAEBOL I TALEM WANEM?

Plante taem, tok ya “paradaes” i minim garen blong Iden we fas man mo woman, tufala i stap long hem. (Jenesis 2:7-15) Baebol i tokbaot ples ya se hem i wan tru ples we Adam mo Iv, tufala i bin stap long hem fastaem. Long ples ya, tufala i no sik mo tufala i no save ded. (Jenesis 1:27, 28) Be from we tufala i no obei long God, tufala i no moa save stap long paradaes ya. Paradaes ya i lus. Nating se i olsem, plante profet tok long Baebol oli soemaot se, long fiuja, wol bambae i kam paradaes bakegen, mo ol man bambae oli save harem gud long hem.

?FROM WANEM SAVE YA I IMPOTEN?

God i lavem ol man. Taswe i stret nomo we hem i givim gudfala laef long Paradaes long ol man we oli wosipim hem. Mo i stret nomo we hem i talemaot samting we ol man ya oli mas mekem blong hem i glad long olgeta. Baebol i talem se yu save mekem God i glad sipos yu traem save hem, mo yu obei long ol tok blong hem.—Jon 17:3; 1 Jon 5:3.

“Long wan ples we nem blong hem Iden, Hae God i mekemrere wan gudfala ples, mo i tekem man ya we i bin mekem, i putum hem i stap long hem.”—Jenesis 2:8.

?OL MAN OLI TALEM WANEM?

Sam man oli bilif se Paradaes i stap long heven, mo sam man oli talem se bambae hem i stap nomo long wol ya long fiuja.

?BAEBOL I TALEM WANEM?

Fas paradaes we God i mekem, i stap long wol. Taem God i mekem wol ya, hem i mekem we i wan gudfala ples blong man i save laef long hem oltaem. Baebol i talem se God i mekem wol ya blong i save stap olwe. (Ol Sam 104:5) Baebol i talem tu se: “Heven i ples blong Hae God nomo, be wol ya, hem i givim long man.”—Ol Sam 115:16.

Taswe, Baebol i talem se God bambae i mekem paradaes long wol ya bakegen. Long paradaes ya, God bambae i mekem we ol man oli save laef gogo i no save finis. Bambae oli joen gud mo oli stap long pis. Bambae oli no moa sik mo oli no moa harem nogud. Mo bambae oli save harem gud long olgeta gudgudfala samting we God i mekem long naesfala wol ya.—Aesea 65:21-23.

“God i mekem ples blong hem wetem ol man, . . . nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:3, 4.

?OL MAN OLI TALEM WANEM?

Plante skul oli talem se ol gudfala man nomo bambae oli go long Paradaes. Be plante man oli no save stret se “gudfala man” i minim wanem. Sam man oli ting se wan gudfala man hemia man we i stap go long jos oltaem mo i stap prea.

?BAEBOL I TALEM WANEM?

Baebol i talem se ol “stret man” bambae oli stap long Paradaes. ?Be wanem kaen man nao we i stret man long fes blong God? Maet wan man i traehad blong folem ol samting we jos blong hem i talem, be hem i no mekem ol samting olsem we God i talem. Baebol i talem se: “?Wanem nao we Hae God i wantem moa? ?Hem i wantem blong yumi obei long tok blong hem, no blong yumi mekem sakrefaes long hem? I tru we hem i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.” (1 Samuel 15:22) Yes, ol “stret man” ya we bambae oli laef olwe long Paradaes, hemia olgeta we oli obei long ol tok blong God long Baebol.

?YU SAVE MEKEM WANEM?

Taem yu obei long God, hemia i no min se yu go long jos nomo. Ol fasin we yu mekem evri dei, oli save mekem God i glad no i harem nogud. Sipos yu stadi long Baebol, yu save lanem plante samting we God i wantem yu blong mekem. Mo i no had tumas blong mekem God i glad. Baebol i talem se “ol tok blong hem i no strong tumas blong folem.” (1 Jon 5:3) Sipos yu obei long God, bambae hem i glad long yu mo i letem yu yu laef long Paradaes.

“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.