IVAKAMACALA NI TIKINIVOLATABU
Joni 14:27—“Au sa Laiva Vei Kemudou na Vakacegu”
“Au sa solia vei kemudou na vakacegu, au solia vei kemudou na noqu vakacegu. Au sega ni solia vei kemudou ena kena ivalavala e solia o vuravura. Dou kua ni lomaleqa, dou kua tale ga ni rere.”—Joni 14:27, iVakadewa ni Vuravura Vou.
“Au sa laiva vei kemudou na vakacegu; au sa solia vei kemudou na noqu vakacegu: au sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.”—Joni 14:27, American Standard Version.
iBalebale ni Joni 14:27
Na vosa e cavuta qori o Jisu vei ratou nona yapositolo, e vukei ratou me ratou kua ni leqataka vakasivia na veika dredre. Me vakataki koya ga, e rawa ni ratou vakila na vakacegu ena veivuke ni Kalou.
Na vakacegu cava e solia o Jisu vei ratou nona yapositolo? E solia vei ratou na vakacegu vata ga e vakila tiko. E sega ni kena ibalebale qori ni na sega ni sotavi na veika rarawa se veiba. (Joni 15:20; 16:33) O Jisu mada ga e vakararawataki me yacova nona mate, ia e vakila tu ga na vakacegu. (Luke 23:27, 28, 32-34; 1 Pita 2:23) E lomavakacegu ni kila ni lomani koya, qai vakadonui koya na Tamana o Jiova. a—Maciu 3:16, 17.
Na vakacegu e solia o Jisu vei ratou nona yapositolo, e vakaraitaka na nodrau loloma vakaveitamani kei na nodrau vakadonui ratou. (Joni 14:23; 15:9, 10; Roma 5:1) E yavutaki na vakacegu qori ena nodratou vakabauti Jisu ni Luve ni Kalou, e vukei ratou tale ga me ratou kua ni rere se lomaleqa. (Joni 14:1) Dina ni na sega ni tiko vata kei ratou o Jisu, ia e yalataka ni ratou na nuidei qai lomavakacegu ena veivuke ni yalo tabu ni Kalou. (Joni 14:25-27) E rawa nira vosota na nona imuri na veika dredre nira kila ni vakadonui ira o Jiova, e tokoni ira tale ga.—Iperiu 13:6.
Ni se bula e vuravura o Jisu, e levu era dau cavuta na vosa ni veivakalougatataki ni vakacegu nira veikidavaki. (Maciu 10:12, 13) Ia o Jisu e sega ni cakava qori vei ratou na nona yapositolo, e solia sara ga vei ratou na vakacegu. Na vakacegu tale ga e solia vei ratou e duidui mai na vakacegu e solia o vuravura. b O vuravura e solia na vakacegu ena sala ni veiwekani, iyau, rogo se itutu. Ia o Jisu e sega ni yavutaka na vakacegu ena so tale na ka. E solia ga na vakacegu dina qai tawamudu.
Tikina Wavolita na Joni 14:27
E tukuna o Jisu na vosa qori vei ratou nona yapositolo yalodina ena bogi ni bera nona mate. A kaya vei ratou ni na vakarau biuti ratou. (Joni 13:33, 36) Dua na ka nodratou rarawa na nona yapositolo. (Joni 16:6) Sa qai vakacegui ratou gona o Jisu, ni tukuna me ratou kua ni leqataka e dua na ka ni sa na sega ni tiko vata kei ratou.
E rawa tale ga ni vakayaloqaqataki ira na lotu vaKarisito nikua na ka e tukuna qori o Jisu. Oya ni rawa tale ga nira vakila na vakacegu. (2 Cesalonaika 3:16) Nida tisaipeli i Jisu, eda kila ni rau lomani keda qai vakadonui keda tale ga o Jisu kei Jiova. (Kolosa 3:15; 1 Joni 4:16) E sega kina nida lomaocaoca vakasivia. Na vuna? Ni tokoni keda tiko na Kalou.—Same 118:6; Filipai 4:6, 7; 2 Pita 1:2.
Sarava na ivakamacala lekaleka ni ivola i Joni.
a E tukuni ena iVolatabu ni yaca ni Kalou o Jiova. (Same 83:18) Raica na ulutaga, “O Cei o Jiova?”
b Na vosa “vuravura” e vakaibalebaletaki vei ira na tawayalododonu, ra qai yawaka na Kalou.
Rawa ni o Wilika Tale ga
JISU—NA SALA, NA DINA, NA BULA
Jisu—Na Sala, na Dina, na Bula
Vakavulica o Jisu na ka dina me baleta na sala me torovi kina na Kalou.
ESSENTIAL BIBLE TEACHINGS
Na Cava a Mate Kina o Jisu?
E raica vakabibi na iVolatabu na mate i Jisu. Vakacava, e tiko na inaki ni nona mate?
VAKAMACALATAKI NA TIKINIVOLATABU
iVakamacala ni Filipai 4:6, 7—“Moni Kua ni Lomaocaocataka e Dua na Ka”
Na ivakarau ni masu cava ena vukei keda meda kua ni lomaleqa qai vakila na vakacegu?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
