IBUKINI kaekaan te titiraki anne, ti na kaatuui ara iango teutana te tai i aoni katoto aika uoua ibukin ana motikitaeka te Atua n te Baibara ni kaineti ma te Ieka n ana bong Noa ao tiringaia kaaini Kanaan.

AIA TAEKA TABEMAN: “E ribuaka te Atua ngke e karokoa te ieka are kamaunaia aomata ni kabane ao e kamaiua Noa ma ana utu.”

TE BWAI AE TAEKINAKI N TE BAIBARA: E taku te Atua: “I aki kukurei ni maten te aomata ae buakaka; ma I tangira te aomata ae buakaka ba e na rairaki mani kawaina ma ni maiu.” (Etekiera 33:​11, BG) Ngaia are bon akea kukurein te Atua ni kamaunaaia aomata aika buakaka n ana bong Noa. Ma bukin tera ngke e karaoa anne?

E kaekaaki anne n te Baibara bwa ngke e karokoi ana motikitaeka akanne te Atua i aoia aomata rimoa ake a aki karinea, e “kateia bwa te katoto ibukini baika a na roko ibukia aomata aika aki karinea.” (2 Betero 2:​5, 6) Tera te katoto are e kateia te Atua?

Te moan, e ataia te Atua bwa e ngae ngke e maraki ni kamaunaaia aomata ma e nori ribuakaia aomata ake a karikii rawawata ao n angania boon aia mwakuri. Imwin tabeua te tai, e na boni katoki ribuaka ao rawawata ni kabane.

Te kauoua, e kaotaki n ana katoto te Atua ni baike e karaoi ngkoa bwa e tatangira ao e boni kauringia aomata imwaini karaoan ana motikitaeka. Bon te tia uarongorongoa taekan te raoiroi Noa ma a aki kan ongora angiia aomata. E taekinaki ae kangai n te Baibara: “A aki muti ni karokoa rokon te ieka n uotiia nako ni kabane.”​—Mataio 24:39.

E karaoa te katoto naba anne te Atua? Eng. N te katoto, e kauringia ana aomata aika I-Iteraera bwa ngkana a a manga rairaki nakon ae buakaka n aroia te natannaomata ake a otabwaninia, e na kariaia aia kairiribai bwa a na taua abaia, a na kamauna kautun abaia ae Ierutarem ao ni kairiia nako bwa taenikai. A bon rairaki nakon ae buakaka I-Iteraera ao ni kareania naba natiia. Iai te bwai ae karaoia Iehova? Eng, ma e tii karaoia imwini kaokiokaia ana burabeti ni kauringia ana aomata bwa a na bitii aroaroia imwain ae a a oimwi. E taekina naba ae kangai: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.”​—Amota 3:​7, BG.

KO KANGA N IREKEREKE IAI: Ti karekea te kantaninga n te katoto are ti noria n ana motikitaeka Iehova  ngkoa. Ti kona n onimakina ana motikitaeka te Atua ibukia te koraki aika ribuaka ake a karikii rawawata. E taekinaki ae kangai n te Baibara: “A na teweaki nako taani kakaraoa ae buakaka: . . . Ma a na abana te aba akana nimamanei; ao a na kukurei ni kabatian te raoi.” (Taian Areru 37:​9-11, BG) Tera am iango n te motikitaeka ae kabebeteia aomata man te rawawata? E ribuaka iai ke e nanoanga?

AIA TAEKA TABEMAN: “Bon te buaka ae ribuaka ma n tiritiri kamaunaakia kaaini Kanaan bwa titeboo ma tiringan te reeti teuana ni boong aikai.”

TE BWAI AE TAEKINAKI N TE BAIBARA: “Bon te kaeti-taeka ae riai ana aro ni kabane [te Atua]: Bon te Atua ae kakaonimaki ae akea ana buakaka.” (Te Tua-Kaua 32:​4, BG) E aki kona ni kabotauaki ana mwakuri ni motikitaeka te Atua ma aia buaka botannaomata. Bukin tera? Ibukina bwa a kaokoro aomata ma te Atua bwa e kona n nori naano.

N te katoto, ngke e motiki taekani kaawa aika Totom ma Komora te Atua ao n iangoia bwa e na kamaunai, e tabeaianga te mwaane ae kakaonimaki ae Aberaam ibukin ana motikitaeka te Atua. E bon aki kantaningaa Atuana ae aki inanonano bwa e na “kamaunaia ake a raoiroi ma ake a buakaka.” E taotaona nanona te Atua ngke e karaua nanon Aberaam bwa ngkana iai tengaun aomata aika raoiroi i Totom, E na bon aki kamauna te kaawa anne ibukia. (Karikani Bwaai 18:​20-33, BG) E teretere bwa e ukeri nanoia aomata akanne te Atua ao e noriia bwa e korakora buakakaia.​—1 Rongorongo 28:9.

N aron naba anne, e motiki taekaia kaaini Kanaan te Atua ao e tua kamaunaakia. A kinaaki kaaini Kanaan n aroia n ribuaka n ikotaki naba ma kabuekaia natiia n te ai bwa aia karea. * (2 Uea 16:3) A ataia kaaini Kanaan bwa e a tia Iehova n tuangia tibun Iteraera bwa a na bwaina te aba anne ni kabane. Ma te koraki ake a motinnanoia bwa a na tiku i abaia ao ni buaka, a a boni karitei tiaki tii nakoia tibun Iteraera ma nakon Iehova naba are e a tia n angania te bwai ni kakoaua ae teretere raoi bwa e boni memena irouia ana aomata.

Irarikin anne, e karababaa nako ana nanoanga Iehova nakoia kaaini Kanaan ake a kitan aroia aika buakaka ao ni butimwaei ana kaetieti ibukin te aroaro ni maiu ae riai. N te katoto, e kamaiuaki Raaba ae te kabekaau are kaaini Kanaan ma ana utu. Ngke a ukoukora nanoangaaia kaaini Kanaan n te kaawa ae Kibeon, a boni kamaiuaki naba ma natiia ni kabane.​—Iotua 6:25; 9:​3, 24-26.

KO KANGA N IREKEREKE IAI: Ti kona ni karekea reireiara ae rangi ni kakawaki mani motikan taekaia kaaini Kanaan. Ti a rangi ni kaan ma te bwai are e a kaman taekinaki ae “te bong ni motikitaeka ao bongini kamaunaaia aomata ake a aki karinea te Atua.” (2 Betero 3:7) Ngkana ti tangira Iehova, ti na boni kakabwaiaaki ngkana e katoki rawawataia aomata rinanoni kamaunaaia te koraki ake a rawa nakon ana tautaeka ae akea te inanonano iai.

E tatangira Iehova ngkai e kauringira bwa a na bon rotaki naati n aia motinnano aia karo. E taekinaki ae kangai n Ana Taeka te Atua: “Ko na rinea te maiu, ba ko aonga ni maiu, ngkoe ma am kariki; ba ko na tangira Iehova ae Atuam, ma ni kan ongo bwanana, ma n nimtia.” (Te Tua-Kaua 30:​19, 20, BG) E koaua bwa akanne ana taeka te Atua ae ribuaka ke te Atua ae tangiriia aomata ao n tangiria naba bwa a na karaoi aia motinnano aika eti?