Ayinamẹ lẹ Na Ayajẹ Whẹndo Tọn

Kọdetọn Dagbe Tintindo to Owhe Tintan Alọwle Tọn Mẹ

Dawe de dọmọ: “E paṣa mi nado mọdọ yẹn po asi ṣie po gbọnvona mídelẹ taun! Di apajlẹ, n’yiwanna nado nọ fọ́n domẹwhenu to afọnnu, ṣigba ewọ yiwanna nado nọ dẹn to ozàn ji. N’ma nọ yọ́n nuhewutu numọtolanmẹ etọn nọ yawu diọ! Podọ nudevo wẹ yindọ—eyin n’to nudà, e nọ mọhodọdo go e sinsinyẹn, titengbe eyin n’súnsún alọ do avọ̀ he yè do nọ súnsún panu lẹ go.”

Asi etọn dọmọ: “Asu ṣie ma nọ jlo na dọho susu. Ṣigba whẹndo he mẹ n’wá sọn ma to mọ. Yé nọ dọho taun, titengbe to núdùdù whenu. Podọ eyin asu ṣie to nudà, e nọ yí avọ̀ dopolọ do súnsún panu po alọ etọn po! Enẹ nọ hẹn homẹgble mi! Naegbọn sunnu lẹ do vẹawu sọmọ? Nawẹ gbẹtọ lẹ nọ wagbọn do tindo kọdetọn dagbe to alọwle mẹ?”

EYIN hiẹ ṣẹṣẹ wlealọ wẹ, be a ko pehẹ avùnnukundiọsọmẹnu mọnkọtọn lẹ ya? Be a wá mọ to ajiji mẹ dọ alọwlemẹ towe tindo awugbopo kavi madogán he e ma tindo to whenue mì to họntọn mẹ lẹ wẹ ya? Etẹwẹ hiẹ sọgan wà nado de nuyiwadomẹji ‘nukunbibia to agbasalan mẹ he alọwlemẹ lẹ na tindo’ tọn lẹ pò?—1 Kọlintinu lẹ 7:28.

Tintan whẹ́, ma donukun dọ hiẹ po alọwlemẹ towe po ko yọ́n azọ́n do gbẹzan alọwle tọn ji, na mì wlealọ poun wutu blo. Hiẹ sọgan ko wleawuna nugopipe lẹ gando lehe yè nọ yinuwa hẹ mẹdevo lẹ do go to whenue a tin to tlẹnmẹ, podọ yé na ko pọnte dogọ dile mì to họntọn mẹ. Ṣigba, alọwle na whlé nugopipe enẹlẹ pọ́n to aliho yọyọ mẹ podọ vlavo na biọ dọ hiẹ ni wleawuna nugopipe devo lẹ. Be a na ṣinuwa ya? Mọwẹ. Be a sọgan wleawuna azọ́nyinyọnẹn he a tindo nuhudo etọn lẹ ya? Gbau!

Aliho dagbe he mẹ mẹde nọ yọ́n azọ́n dogọ te wẹ nado dín ayinamẹ mẹhe yọ́n azọ́n do whẹho lọ ji tọn bo yí ayinamẹ etọn lẹ do yizan mẹ. Azọ́nyọnẹntọ daho hugan do whẹho alọwle tọn ji wẹ Jehovah Jiwheyẹwhe. To popolẹpo mẹ, ewọ wẹ Mẹhe dá mí po ojlo lọ po nado wlealọ. (Gẹnẹsisi 2:22-24) Pọ́n lehe Ohó etọn Biblu, sọgan gọalọna we nado duto avùnnukundiọsọmẹnu lẹ ji bo wleawuna azọ́nyinyọnẹn he a tindo nuhudo etọn nado tindo kọdetọn dagbe zẹ̀ owhe tintan alọwle towe tọn go do.

 AZỌ́NYINYỌNẸN 1. MÌ PLỌN NADO NỌ DÍN AYINAMẸ SỌN MÌDE SI

Etẹwẹ yin avùnnukundiọsọmẹnu lọ lẹ? Keiji, a asu de he nọ nọ̀ Japon, nọ wọn to whedelẹnu dọ nudide etọn lẹ nọ yinuwado asi etọn ji. E dọmọ: “N’ma nọ dọhodopọ hẹ asi ṣie whẹpo do nọ yigbena oylọ-basinamẹ lẹ. To godo mẹ, n’nọ wá mọdọ e nọ vẹawuna ẹn nado yì oylọ-basinamẹ lọ lẹ.” Allen, asu de to Australie dọmọ: “N’lẹndọ e ma sọgbe dọ sunnu ni dọhodopọ hẹ asi etọn gando nudide he na yin bibasi lẹ go.” E pehẹ avùnnukundiọsọmẹnu ehe na ninọmẹ he mẹ e whẹ́n te wutu. Ninọmẹ mọnkọtọn wẹ Dianne, he nọ nọ̀ Grande-Bretagne pehẹ. E dọmọ: “E ko yin aṣa ṣie nado nọ dín ayinamẹ sọn hagbẹ whẹndo ṣie tọn lẹ si. Enẹwutu, to tintan whenu n’nọ dọhodopọ hẹ yé to whenue n’jlo na basi nudide kakati nido yin asu ṣie.”

Etẹwẹ yin pọngbọ lọ? Flindọ Jehovah Jiwheyẹwhe nọ pọ́n sunnu po yọnnu po he wlealọ lẹ taidi “agbasalan dopo.” (Matiu 19:3-6) Haṣinṣan gbẹtọvi tọn depope ma yin nujọnu to nukun etọn mẹ sọ asu po asi po tọn! Eyin haṣinṣan enẹ na lodo, hodọdopọ dagbe yin dandannu.

Asu po asi po de sọgan plọn nususu gbọn dogbigbapọnna aliho he mẹ Jehovah Jiwheyẹwhe dọhodopọ hẹ Ablaham te dali. Di apajlẹ, jaale hia kandai hodọdopọ tọn he tin to Gẹnẹsisi 18:17-33 mẹ. Doayi e go dọ Jiwheyẹwhe doyẹyigona Ablaham to aliho atọ̀n mẹ. (1) Jehovah basi zẹẹmẹ nuhe e jlo na wà tọn. (2) E dotoai dile Ablaham to linlẹn etọn dọ. (3) Jehovah diọ pọndohlan etọn jẹ obá he mẹ e yọnbasi jẹ nado kọngbedopọ hẹ Ablaham. Nawẹ hiẹ sọgan wà nudopolọ to whenue a to hodọdopọ hẹ alọwlemẹ towe gbọn?

TẸ́N EHE PỌ́N: To whenue a to hodọdopọ hẹ alọwlemẹ towe do whẹho he gando ewọ go lẹ ji, (1) dọ nuhe a jlo na wà gando ninọmẹ lọ go, ṣigba ze linlẹn towe lẹ donukọnna ẹn taidi ayinamẹ, e ma yin nudide godo tọn lẹ gba; (2) biọ to alọwlemẹ towe si nado dọ linlẹn etọn, podọ kẹalọyi dọ alọwlemẹ towe tindo jlọjẹ nado tindo pọndohlan he gbọnvo; podọ (3) ‘gbọ lẹnpọn dagbenọ-yinyin towe ni yin yinyọnẹn’ gbọn pọndohlan towe didiọ to whedepopenu he e yọnbasi nado yinuwa sọgbe hẹ alọwlemẹ towe tọn lẹ dali.—Filippinu lẹ 4:5.

AZỌ́NYINYỌNẸN 2tọ. PLỌN NADO YÍ ZINZIN ZAN

Etẹwẹ yin avùnnukundiọsọmẹnu lọ? Na whẹndo kavi aṣa he mẹ a wá sọn wutu, hiẹ sọgan nọ dọ linlẹn towe lẹ to aliho sinsinyẹn mẹ, etlẹ yin po zinzin matindo po. Di apajlẹ, Liam he nọ  nọ̀ Europe dọmọ: “Gbẹtọ lẹ ma nọ do zinzin hia to hodidọ mẹ to fihe n’wá sọn. Aliho sinsinyẹn he mẹ n’nọ dọ linlẹn ṣie lẹ te nọ saba hẹn homẹgble asi ṣie. N’dona plọn nado jọmẹ dogọ.”

Etẹwẹ yin pọngbọ lọ? Ma lẹndọ alọwlemẹ towe nọ jlo dọ yè ni dọhona emi to aliho he hiẹ jẹakọ hẹ mẹ blo. (Filippinu lẹ 2:3, 4) Ayinamẹ he apọsteli Paulu na mẹdehlan de sọ yọ́n-na-yizan na mẹhe ṣẹṣẹ wlealọ lẹ. E wlan dọmọ: “E ma jẹ dọ afanumẹ Oklunọ tọn ni hoavùn, ṣigba ewọ dona nọ wà dẹẹdẹ.” To Glẹki dowhenu tọn mẹ, hogbe he yin lilẹdo “dẹẹdẹ” sọ sọgan yin lilẹdo “yí zinzin zan.” (2 Timoti 2:24) Zinzin yiyizan zẹẹmẹdo nugopipe lọ nado tunwun ninọmẹ he biọ mẹdehihọ́ bo yinuwa po lẹnpọn dagbe po matin awugblenamẹ.

TẸ́N EHE PỌ́N: To homẹgbigble do alọwlemẹ towe go whenu, mọ dewe di mẹhe to hodọna họntọn vivẹ́ de kavi azọ́nmẹyimẹdotọ towe. Be hiẹ na gbẹ́ zan kọnugbè dopolọ kavi hogbe dopolọ lẹ ya? Enẹgodo, lẹnnupọndo whẹwhinwhẹ́n lẹ he wutu e do jẹ dọ a ni yí sisi po zinzin po do dọhona alọwlemẹ towe hugan họntọn kavi azọ́nmẹyimẹdotọ towe ji.—Kọlọsinu lẹ 4:6.

AZỌ́NYINYỌNẸN 3tọ. PLỌN NADO JẸAKỌ HẸ AZỌNGBAN YỌYỌ TOWE LẸ

Etẹwẹ yin avùnnukundiọsọmẹnu lọ? To tintan whenu, asu de sọgan yí tatọ́-yinyin etọn zan to aliho he nọ gbleawuna asi etọn mẹ, kavi asi de sọgan gboawupo nado nọ yí zinzin do dọ linlẹn etọn lẹ. Di apajlẹ, Antonio he yin asu de to Italie dọmọ: “Otọ́ ṣie ma dọhodopọ hẹ onọ̀ ṣie pọ́n gando nudide whẹndo tọn lẹ go. Enẹwutu to tintan whenu, n’deanana whẹndo ṣie dile aṣẹglanglan-panamẹtọ de nọ wà do.” Debbie, asi de to Canada dọmọ: “N’nọ biọ po egblemaku po dọ asu ṣie ni nọ tito ji. Ṣigba, e taidi dọ nuyiwa aṣẹpanamẹ tọn ṣie hẹn ẹn zun tasinyẹntọ dogọ.”

Etẹwẹ yin pọngbọ lọ na asu de? Asu delẹ ma yọ́n vogbingbọn he tin to nuhe Biblu dọ gando taliliai asi tọn po tonusise ovi lẹ tọn na mẹjitọ yetọn lẹ po ṣẹnṣẹn go. (Kọlọsinu lẹ 3:20;  1 Pita 3:1) Ṣigba, Biblu dọ dọ asu de na “sẹbọdo asi etọn go, bọ yé omẹ awe lẹ na lẹzun agbasalan dopo”; e ma dọ nudopolọ gando mẹjitọ po ovi po go gba. (Matiu 19:5) Jehovah basi zẹẹmẹ asi tọn taidi alọgọtọ asu etọn tọn. (Gẹnẹsisi 2:18) Ewọ ma dọho gando ovi go taidi alọgọtọ mẹjitọ etọn tọn gba. Etẹwẹ hiẹ lẹn—eyin asu de nọ yinuwa hẹ asi etọn taidi ovi de, be e to gbégbòna tito alọwle tọn ya?

Na nugbo tọn, Ohó Jiwheyẹwhe tọn dotuhomẹna we nado nọ yinuwa hẹ asi towe to aliho he mẹ Jesu nọ yinuwa hẹ agun Klistiani tọn te. Hiẹ sọgan hẹn ẹn bọawuna asi towe nado nọ pọ́n we di tatọ́ etọn (1) eyin a ma donukun sọn e si nado do mẹglọnọ-yinyin etọn hia to afọdopolọji po nuṣiwa matindo po podọ (2) eyin a yiwanna ẹn taidi agbasa towe, etlẹ yin to whenue nuhahun lẹ fọ́n.—Efesunu lẹ 5:25-29.

Etẹwẹ yin pọngbọ lọ na asi de? Kẹalọyi dọ asu towe wẹ yin tatọ́ he Jiwheyẹwhe dena we todin. (1 Kọlintinu lẹ 11:3) Eyin hiẹ gbògbéna asu towe, Jiwheyẹwhe wẹ a gbògbéna. Eyin hiẹ gbẹ́ tatọ́-yinyin etọn dai, be nukun he a nọ yí do pọ́n asu towe gọna Jiwheyẹwhe po nubiọtomẹsi etọn lẹ po wẹ a dohia.—Kọlọsinu lẹ 3:18.

To whenuena hiẹ to hodọdo nuhahun sinsinyẹn de ji, plọn nado nọ na ayidonugo nuhahun lọ—e ma yin jijọ asu towe tọn. Di apajlẹ, Ahọsi Ẹsteli jlo dọ asu emitọn Ahọlu Ahasuelusi, ni jla nuyiwahẹmẹ agọ̀ de do. Kakati nado mọhodọdo asu etọn go, e yí zinzin do dọ linlẹn etọn. Asu etọn kẹalọyi ayinamẹ etọn bo wà nuhe sọgbe lọ. (Ẹsteli 7:1-4; 8:3-8) E yọnbasi taun dọ asu towe na plọn nado yiwanna we sisosiso (1) eyin a na ẹn dotẹnmẹ nado jẹakọ hẹ azọngban yọyọ etọn taidi tatọ́ whẹndo tọn de podọ (2) eyin a nọ yinuwa hẹ ẹ po sisi po, etlẹ yin to whenue e ṣinuwa.—Efesunu lẹ 5:33.

TẸ́N EHE PỌ́N: Kakati nado basi kandai nuhe mẹ a lẹndọ alọwlemẹ towe dona diọ te lẹ tọn, basi kandai nuhe mẹ a dona basi diọdo te lẹ tọn. Na asu lẹ: Eyin hiẹ hẹn homẹgble asi towe gbọn aliho he mẹ a yí tatọ́-yinyin towe zan kavi gboawupo nado yí i zan te dali, biọ to e si nado dọ lehe hiẹ sọgan basi vọjlado do bo kàn ayinamẹ lọ dai. Na asi lẹ: Eyin asu towe tindo numọtolanmẹ dọ a ma nọ do sisi hia emi, biọ to e si nado dọ lehe hiẹ sọgan basi vọjlado do bo basi kandai ayinamẹ lọ tọn.

Wleawuna Nukundido Lẹnpọn Dagbe Tọn

Pinplọn nado hẹn haṣinṣan alọwle tọn he gọ́ na ayajẹ bo to jlẹkaji de go taidi kẹkẹ afọ tọn kùnkùn pinplọn. Dile mẹde to kẹkẹ-kùnkùn plọn, e nọ donukun dọ emi na jai. Mọdopolọ, hiẹ dona donukun dọ a na basi nuṣiwa winyandomẹ tọn delẹ dile a to numimọ tindo to alọwle mẹ.

Hẹn ayajẹ towe go. Yí nukun nujọnu tọn do pọ́n nuhe nọ duahunmẹna alọwlemẹ towe, ṣigba plọn ma nado hẹn ayajẹ towe bu to whenue a ṣinuwa. Nọ yí dotẹnmẹ hundote lẹ zan nado hẹn alọwlemẹ towe jaya to owhe tintan alọwle towe tọn mẹ. (Deutelonomi 24:5) Hú popolẹpo, dike Ohó Jiwheyẹwhe tọn ni deanana alọwle towe. Eyin hiẹ to mọwà, alọwle towe na lodo dogọ to whemẹwhemẹ.

[Nudọnamẹ odò tọn]

KANSE DEWE DỌ . . .

▪ Be n’nọ dọ homẹ na alọwlemẹ ṣie ya, kavi n’nọ dín ayinamẹ sọn mẹdevo lẹ dè?

▪ To gànhiho 24 he wayi lẹ mẹ, etẹwẹ n’wà nado dohia dọ n’tindo owanyi po sisi po na alọwlemẹ ṣie?

[Apotin/Yẹdide to weda 11, 12]

Biblu Whlẹn Alọwle Mítọn

Toru po Akiko po yiwanna yede to whenue yé ṣẹṣẹ wlealọ. Ṣigba to osun ṣinatọ̀n poun godo, alọwlemẹ Japon-nu ehelẹ de nado basi gbẹdai. Yé dọ nuhe jọ.

Toru: “N’wá mọdọ yẹn po asi ṣie po ma sọgbe hẹ mídelẹ dile n’lẹn do dai. Di apajlẹ, eyin mí to televiziọn pọ́n, yẹn nọ yiwanna aihundida lanmẹyiya tọn, ṣigba ewọ nọ yiwanna sinima. N’nọ yiwanna tintọ́n, ṣigba ewọ yiwanna whégbè ninọ.”

Akiko: “Toru nọ wà nudepope he hagbẹ whẹndo etọn tọn lẹ biọ to e si, ṣigba e ma nọ dọho depope na mi. N’kanse e dọ, ‘Mẹnu wẹ yin nujọnu hugan na we, yẹn kavi onọ̀ towe?’ Podọ, obu nọ di mi do lehe Toru nọ slokọna nugbo do go. N’dọna ẹn dọ lalo de dido nọ hẹnmẹ jẹ lalo devo kọ̀n, podọ eyin e ma diọ, alọwle mítọn ma na zindonukọn.”

Toru: “N’jẹflumẹ bo dín ayinamẹ sọn azọ́nwatọgbẹ́ he to nukọn na mi to azọ́nmẹ de si gando lehe n’dona nọ yinuwa hẹ asi ṣie do go. E dọmọ: ‘Saa nọ dọna ẹn poun dọ ni bọnùdo. Eyin e dọho, gbànú e ji.’ To gbèdopo, n’hotómẹna Akiko bo bli tafo dlan. Enẹgodo, mí hoavùn sinsinyẹn bọ Akiko yì. N’wá yì plan ẹn lẹkọ sọn hotẹli de to Tokyo. To godo mẹ, mí de nado basi gbẹdai. To whenuena n’yì azọ́nmẹ to afọnnu enẹ, asi ṣie jẹ agbàn etọn lẹ bẹ ji.”

Akiko: “Ogàn ohọ̀n tọn dọnú dile n’to saki ṣie lẹ bẹ jei ohọ̀n kọho tọn ji. Nawe de to ote to finẹ. E yin dopo to Kunnudetọ Jehovah tọn lẹ mẹ. N’dọna ẹn dọ ni biọ họmẹ.”

Toru: “To whenuena n’jẹ azọ́nmẹ, n’jẹ ayihaawe tindo ji gando gbẹdai bibasi go, enẹwutu n’yawu lẹkọyi whégbè. Whenuena n’jẹ whégbè, n’mọ Akiko to hodọ hẹ yọnnu ehe. Yọnnu lọ dọna mi dọmọ: ‘Mì tindo nuhudo nude tọn he mì omẹ awe lẹ sọgan wà to pọmẹ. Be e jlo mì nado plọn Biblu ya?’ N’yigbe dọ, ‘Mọwẹ, nudepope he sọgan whlẹn alọwle mítọn!’”

Akiko: “Yọnnu lọ basi tito na mí nido plọn Biblu. Ninọmẹ lọ jẹ didiọ ji to whenue mí hia nuhe Biblu dọ do tito alọwle tọn ji. E dọmọ: ‘Enẹwutu wẹ sunnu na jo otọ́ po onọ̀ po do, bo na sẹbọdo asi etọn go: yé nasọ lẹzun olàn dopo.’”—Gẹnẹsisi 2:24.

Toru: “N’mọ fihe nuhahun lọ te to afọdopolọji. N’dọna mẹjitọ ṣie lẹ dọ, ‘Bẹsọn din, asi ṣie wẹ n’na nọ dọho hẹ whẹpo do basi nudide lẹ.’ N’sọ doalọtena ahànnunu zẹjlẹgo. Podọ to whenuena n’plọn dọ Jiwheyẹwhe gbẹwanna lalodido, n’tẹnpọn nado nọ dọ nugbo.”

Akiko: “Yẹnlọsu diọ. Di apajlẹ, n’nọ diọnukunsọ Toru dai. Ṣigba to whenue n’mọ lehe e to nunọwhinnusẹ́n Biblu tọn lẹ yí do yizan mẹ do, n’jẹ godonọna ẹn ji hugan lehe n’ko nọ wà do. (Efesunu lẹ 5:22-24) Todin, e ko lán to owhe 28 ji bọ mí yin ayajẹnọ to alọwle mítọn mẹ. Mí penugo nado duto nuhahun mítọn lẹ ji gbọn míde yinyọnẹn dogọ po ayinamẹ nuyọnẹn tọn he tin to Biblu mẹ lẹ hihodo po dali.”