Dọnsẹpọ Jiwheyẹwhe

“Ze Visunnu Towe”

2 AHỌLU LẸ 4:8-37

OVI de hinhẹnbu to okú mẹ yin dopo to awufiẹsa daho he gbẹtọ sọgan tindo numimọ etọn lẹ mẹ. Jehovah Jiwheyẹwhe tindo huhlọn nado gọ̀ mẹhe kú lẹ wá ogbẹ̀. Mí yọnẹn dọ ehe yin nugbo, na ewọ na huhlọn sunnu delẹ to ojlẹ Biblu tọn mẹ nado fọ́n oṣiọ lẹ sọnku. Nujijọ dopo yin kinkandai to 2 Ahọlu lẹ 4:8-37 mẹ gando fọnsọnku visunnu jọja de tọn go gbọn yẹwhegán Eliṣa dali.

Nujijọ lọ wá aimẹ to tòdaho Ṣunẹmi tọn mẹ. Nawe wẹnsinọ de po asu etọn po nọ do homẹdagbe hia Eliṣa bo nọ na ẹn núdùdù po adọtẹn po to gbesisọ mẹ. To gbèdopo, yẹwhegán he gọ́ na pinpẹn-nutọn-yinyọnẹn lọ dọna nawe lọ dọmọ: “To osaa he mẹ, whenuena ojlẹ wá sọ, hiẹ na dọ̀n visunnu de dakọ́n.” E ma lẹndọ emi na jivi pọ́n gbede, etomọṣo dile Eliṣa dọ do, e ji visunnu de. Ṣigba, e blawu dọ ayajẹ etọn ma dẹn-to-aimẹ. To owhe vude godo, ota jẹ visunnu lọ dù ji sinsinyẹn to whenue e tin to ogle mẹ bọ e yin zize yì whégbè to fie e kú te to “oklò [onọ̀ etọn tọn] lẹ ji.” (wefọ 16, 19, 20) Onọ̀ he to aluẹmẹ lọ ze oṣiọ ovi etọn tọn bo tẹ́ ẹ do adọzan he yẹwhegán lọ nọ saba mlọn ji.

E biọgbè asu etọn bo yawu basi gbejizọnlin na nudi kilomẹtlu 30 yì Osó Kalmẹli kọ̀n nado mọ Eliṣa. To whenuena e mọ Eliṣa, e ma jo ede na awubla kavi avi kavi aliho devo he mẹ yè nọ do aluẹmẹninọ sinsinyẹn hia te. Be e sè dọ yẹwhegán he Eliṣa jẹ otẹn etọn mẹ, yèdọ Elija fọ́n visunnu asuṣiọsi de tọn sọnku wutu wẹ ya? (1 Ahọlu lẹ 17:17-23) Be Ṣunaminu lọ tindo yise dọ Eliṣa sọgan wà nudopolọ na visunnu emitọn wẹ ya? Depope he whẹho lọ yin, e gbẹ́ dọ emi ma jei whé adavo Eliṣa yigbe nado yì po emi po.

To whenuena Eliṣa jẹ Ṣunẹmi, ewọ kẹdẹ biọ abò he mẹ e nọ saba nọ bo mọ oṣiọ lọ to “adọzan etọn” ji. (wefọ 32) Yẹwhegán lọ dọnsẹpọ Jiwheyẹwhe to odẹ̀ he sọgan yin yiylọdọ ovẹvivẹ sinsinyẹn de mẹ. Enẹgodo, dile Eliṣa gbò ovi lọ fán, “agbasalan ovi lọ tọn sọ [jẹ gbigblọ ji].” Ahun ovi lọ tọn he ko doalọte jẹ hihò ji whladopo dogọ! Eliṣa ylọ onọ̀ ovi lọ tọn bo dọho de he na diọ awufiẹsa etọn zun ayajẹ he yè ma sọgan glọnalina dọmọ: “Ze visunnu towe.”—Wefọ 34, 36.

Kandai fọnsọnku visunnu nawe Ṣunaminu lọ tọn yin asisa todido po homẹmimiọn po tọn. Jehovah nọ mọnukunnujẹ awubla mẹjitọ he hẹn ovi de bu to okú mẹ lẹ tọn mẹ. Humọ, e to jijlo vẹkuvẹku nado hẹn mẹhe kú lẹ gọwá ogbẹ̀. (Job 14:14, 15) Azọ́njiawu fọnsọnku tọn he Eliṣa po mẹdevo lẹ po wà to ojlẹ Biblu tọn mẹ yin apajlẹ nuhe Jehovah na wà to aliho he gbloada to aihọn yọyọ dodowiwa tọn etọn he ja mẹ tọn. a

Opagbe Biblu tọn gando fọnsọnku go ma nọ de awufiẹsa he mẹyiwanna de hinhẹnbu to okú mẹ nọ hẹnwa sẹ̀. Sunnu Klistiani nugbonọ de he hẹn ovi dopo gee he e tindo bu to okú mẹ dọmọ: “Awufiẹsa ṣie ma na vọ̀ mlẹnmlẹn kakajẹ whenue n’na wá gbò visunnu ṣie fán whladopo dogọ.” Yí nukun homẹ tọn do pọ́n todido lọ nado mọ mẹyiwanna towe he kú lẹ whladopo dogọ. Linlẹn lọ poun dọ hiẹ na penugo nado gbò yé fán sọgan hẹn ẹn bọawuna we nado doakọnna awufiẹsa towe. Be e ma jlo we nado plọnnu susu gando Jiwheyẹwhe he na mí todido họakuẹ ehe go ya?

[Nudọnamẹ odò tọn]