Ihe Ime Mmụọ
Dị ka e kwuru n’isiokwu nke mbụ n’akwụkwọ a, ọtụtụ ndị kwetara na Baịbụl bụ akwụkwọ dị nsọ na-ekwu banyere Chineke. Ha chọpụtara na ha gụọ Baịbụl, ọ na-eme ka ha bịaruo Chineke nso, ha aghọtakwa ihe mere Chineke ji kee anyị.
Na Baịbụl, a na-ekwukarị okwu bụ́ “ihe ime mmụọ” ma e kwuwe banyere otú mmadụ si ebi ndụ ma ọ bụ otú mmadụ si ele ihe anya. (Jud 18, 19) Ihe na-akakarị onye anụ ahụ́ na-achị mkpa bụ ihe gbasara onwe ya. Ma, onye ji ihe ime mmụọ kpọrọ ihe anaghị eji ihe Chineke kwuru egwu egwu.—Ndị Efesọs 5:1.
INWE OLILEANYA
IHE BAỊBỤL KWURU: “Ì nwewo obi ịda mbà n’ụbọchị ahụhụ? Ike gị ga-adị ntakịrị.”—Ilu 24:10.
IHE Ọ PỤTARA: Ịda mbà n’obi nwere ike ime ka o siere anyị ike idi nsogbu. Ma, ọ bụrụ na anyị nwere olileanya, ọ ga-enyere anyị aka idi nsogbu. Ọ ga-emekwa ka anyị na-ele ọtụtụ nsogbu anyị nwere anya ka ihe ga-emecha kwụsị. Ihe ọma nwedịrị ike isi na ha pụta.
IHE I NWERE IKE IME: Na-eche banyere ihe ọma ndị ga-eme n’ọdịnihu. Kama ịna-echegbu onwe gị banyere ihe ndị nwere ike ime ma ọ bụkwanụ ichere ka ihe niile dịchaa mma, gbaa mbọ na-eme ihe ndị i bu n’obi ime ná ndụ. Ma, “ihe a na-atụghị anya ya” nwekwara ike ime. (Ekliziastis 9:11) Ma, nke bụ́ eziokwu bụ na ọtụtụ oge, ihe anaghị adịcha njọ otú anyị chere na ọ ga-adị. Ọ bụ ya mere Baịbụl ji kwuo, sị: “Ghaa mkpụrụ gị n’ụtụtụ, ekwekwala ka aka gị zuo ike ruo n’anyasị; n’ihi na ị maghị ebe ọ ga-eme nke ọma, ma ọ̀ bụ n’ebe a ma ọ bụ n’ebe ahụ, ma ọ̀ bụ na ha abụọ ga-adịcha mma.”—Ekliziastis 11:6.
ỊMATA AZỊZA AJỤJỤ NDỊ NA-ECHU ANYỊ ỤRA
IHE BAỊBỤL KWURU: “Mee m ka m nwee nghọta . . . Okwu gị dum bụ eziokwu.”—Abụ Ọma 119:144, 160.
IHE Ọ PỤTARA: Baịbụl na-aza ajụjụ ọtụtụ ndị na-ajụkarị. Dị ka ihe atụ, ọ na-aza ajụjụ ndị dị ka
-
Olee ebe anyị si bịa n’ụwa?
-
Gịnị mere anyị ji nọrọ n’ụwa a?
-
Gịnị na-eme mmadụ ma ọ nwụọ?
-
Mmadụ nwụọ, nke ya ọ̀ gaala?
Ndụ ọtụtụ nde mmadụ bi n’ụwa akala mma n’ihi na ha mụtara ihe Baịbụl na-akụzi banyere ajụjụ ndị a na ajụjụ ndị ọzọ.
IHE I NWERE IKE IME: Jiri aka gị chọpụta ihe Baịbụl na-akụzi. Gwa otu n’ime Ndịàmà Jehova ka o nyere gị aka ịghọta Baịbụl. Gaa na jw.org, ma ọ bụkwanụ gị agaa ọmụmụ ihe anyị, onye ọ bụla nwekwara ike ịga ya. A naghị ana ndị bịara ọmụmụ ihe anyị ego.
IHE NDỊ ỌZỌ BAỊBỤL KWURU
Gaa na jw.org/ig lee vidio bụ́ Olee Uru Ịmụ Baịbụl Ga-abara Gị? Ọ dị n’ihe karịrị asụsụ 880
MARA MKPA IME MMỤỌ GỊ.
“Obi ụtọ na-adịrị ndị maara mkpa ime mmụọ ha.”—MATIU 5:3.
MỤTAKWUO BANYERE CHINEKE.
“Chọọ Chineke . . . ma chọta ya n’ezie . . . ọ nọghị n’ebe dị anya n’ebe onye ọ bụla n’ime anyị nọ.”—ỌRỤ NDỊOZI 17:27.
GỤỌ MA TỤGHARỊA UCHE N’OZI DỊ NA BAỊBỤL.
“Iwu Jehova * na-atọ ya ụtọ, ọ na-agụkwa iwu ya n’olu dị ala ehihie na abalị. . . . Ihe ọ bụla ọ na-eme ga-aga nke ọma.”—ABỤ ỌMA 1:2, 3.
^ par. 23 Baịbụl kwuru na aha Chineke bụ Jehova.
Isiokwu A Nwekwara Ike Ịmasị Gị
ỤLỌ NCHE
Olee Otú Baịbụl Nwere Ike Isi Nyere M Aka ná Ndụ?
Akwụkwọ a e dere n’oge ochie kwuru ọtụtụ ihe ga-abara gị uru.
