SALUDSOD DAGITI AGTUTUBO
Rumbeng Kadi nga Agsinakamin? (Paset 1)
No dadduma, adda pagsayaatan ti panagsina. Usigem ti kapadasan ni Jill. “Idi damo,” kunana, “maragsakanak ta kanayon a maseknan ti nobiok no sadino ti ayanko, no ania ti ar-aramidek, ken no siasino ti kaduak. Ngem dimteng iti punto nga isuna laengen ti pakikadkaduaak. Agimon payen no kaduak ti pamiliak—nangruna ken ni tatangko. Idi nakisinaak iti nobiok, nabang-aranak unay!”
Kasta met laeng ti napasamak ken Sarah. Napaliiwna a mananginsulto, naturay, ken awan modo ti nobiona a ni John. “Naminsan,” malagip ni Sarah, “tallo oras a naladaw idi dinagasnak iti balaymi! Dina man la pinagunian ni nanangko idi inlukatanna iti ridaw. Kalpasanna, kinunana: ‘Intan. Naladawtan.’ Saan a ‘Naladawak,’ no di ket ‘Naladawtan.’ Nagpadispensar koma wenno nangted iti eksplanasion. Kangrunaan iti amin, rinaemna koma ni nanangko!”
Siempre, saan met ketdi nga umdas a pagsinaan ti maysa a makapadismaya nga aramid wenno kababalin. (Salmo 130:3) Ngem idi naamiris ni Sarah a talaga nga awan modo ni John, nagdesision a makisinan.
Kasano ngay no kas kada Jill ken Sarah, maamirismo a ti nobiom ket saan a maitutop a pakiasawaam? No kasta, ipangagmo ti riknam! Nupay nasakit, nalabit ti kasayaatan ket pagpatinggaemon ti relasionyo. Masirib wenno “nasaldet daydiay nakakita iti didigra ket rugianna ti aglemmeng,” kuna ti Proverbio 22:3.
Wen, mabalin a saan a nalaka ti makisina. Ngem inggat’ tungpal biag ti panagasawa. Nasaysayaat laengen ti masaktan iti apagbiit ngem ti agbabawi iti unos ti panagbiag!