LISA se di ting we did mek shi lov di chuut iina di fos plies, a di wie di breda an sista dem did kain tu ar. * An a did kain-a di siem ting fi Anne, kaaz shi se, “Fi mi, a no jos wa dem did tiich, bot a di wie ou dem did chriit mi kain wa mek mi tek di chuut.” Dem tuu sista ya did api fi riid di Baibl an fi tingk bout wa it a se. Bot wa mek dem fiil it iina dem aat di muos a kaaz di breda an sista dem did kain tu dem.

Ou wi kyan kain tu di piipl dem we de roun wi, we kyan mek dem fiil it iina dem aat? Mek wi luk pan tuu a di wie dem we wi kyan kain tu piipl. Wi kyan kain tu dem wid wa wi se, an wid di sitn dem we wi du. Afta dat wi a-go taak bout uu an uu wi fi kain tu.

Di gud waif we Pravorbz 31 taak bout did kain tu piipl so shi taak tu dem iina wan nais wie “laik se a wan laa shi a fala”. (Pr. 31:26) Kaaz a dis, shi wach wa shi a se tu piipl an shi mek shuor se shi se tingz iina wan wie we soun gud. An di faada dem fi mek shuor se dem a du di siem ting tu. Nof mada an faada wel an nuo se ef dem taak tu di pikni iina wan rof wie, it a-go mek di pikni fiil a wie an dem mait-a no waahn du wa dem se. So ef dem waahn di pikni dem fi du wa dem se an waahn fi de roun dem, dem fi taak tu dem iina wan nais wie.

Aal ef yu na’av no pikni, a wan kain sitn yu a du wen yu mek shuor se yu a taak tu piipl iina wan gud an nais wie. Pravorbz 31:26 mek wi si ou wi kyan dwi’it. It se: “Wen shi uopm ar mout, eniting wa shi se mek sens, kaa shi waiz.” Dat miin tu se, bifuo wi se sitn tu sumadi, wi a-go tingk bout wa wi a-go se an ou wi a-go se it. So it wuda gud ef wi sidong an aks wiself se, ‘Wa mi a-go se tu da sumadi ya, it a-go mek dem beks ar gwaan bad? Ar ef dem a gwaan bad, wa mi se gweehn kaam dem dong?’ (Pr. 15:1) Ye man, it mek sens fi tingk bout dis bifuo yu taak.

Wan neda paat iina Pravorbz se: “Wen piipl se tingz we ort yu it komiin laik wen sumadi a stab yu op wid wan suod.” (Pr. 12:18) Wen wi tingk bout ou wa wi se, an ou wi se it, an si ou it kyan ort piipl, wi wi si wa mek wi fi tek wi taim an tingk bout wa wi a-go se bifuo wi se it. So, a wan kain sitn wi du wen wi taak tu piipl ‘iina wan gud an nais wie laik a wan laa wi a fala’, it wi mek wi no taak tu piipl rof an se tingz we a-go tier dem dong, ar we a-go ort dem. (Ifii. 4:31, 32) Insted-a tingk bad bout piipl, ar tel dem at-wod, wi a-go tingk gud bout dem an taak tu dem iina wan nais wie we gweehn mek dem fiil gud. Jeuova shuo wi ou fi du dis wid di wie ou im did taak tu im sorvant we niem Ilaija. Ilaija did fraitn bad, so Jeuova sen im ienjel fi kom taak tu im iina wan nais, kaam wie. (1 Ki. 19:12) Bot a no jos fi taak tu sumadi iina wan gud an nais wie, wi afi du tingz fi dem iina wan gud an nais wie tu. Ou wi kyan du dat?

Wen wi a du laik Jeuova, wi no onggl a-go taak tu piipl iina wan nais wie, bot wi a-go du nais tingz fi dem tu. (Ifii. 4:32; 5:1, 2) Lisa, we wi did taak bout aredi, did mek wi nuo wa som Jeuova Witnis did du fi ar. Shi se, “Wen wi lan laad did tel wi se wi afi kom outa di ous kwik, tuu sista an dem ozban we de iina di kanggrigieshan tek taim fram dem wok fi kom elp wi pak op wi sitn dem. An dem taim de, mi nat iivn did staat stodi di Baibl yet!” Kaaz a wa dem breda an sista ya did du, it mek Lisa staat fi tek iin di chuut muo.

Anne, we wi did taak bout aredi, se shi did lov ou di Jeuova Witnis dem kain tu ar. “Bikaaz a ou di worl stie rait ya nou, mi no chos piipl. So wen mi miit di Jeuova Witnis dem, mi did a wanda wa mek dem a du wa dem a du. So mi staat fi wanda a wa mek dem kier bout mi so moch. Bot kaa mi si se di sumadi we a stodi di Baibl wid mi did riili kain fram ar aat, den mi staat fi chos ar. An kaaz a dis, mi staat tek wa mi a lorn siiros.”

 Yu si se Lisa an Anne did fiil it iina dem aat wen di breda an sista dem fram di kanggrigieshan did kain tu dem, an a dat mek dem tek di chuut siiros.

Kaaz a we som piipl kom fram an ou dem gruo, dem mait-a fain it iizi fi sumail an taak gud tu piipl, an it nais se dem du dat. Bot ef a onggl dat aluon mek dem dwi’it, it no miin tu se a Gad dem a fala an a dwi’it di wie ou im waahn dem fi dwi’it.​—Luk pan Aks 28:2.

A Gad spirit kaaz piipl fi kain di wie ou im waahn dem fi kain. (Gya. 5:22, 23) So fi kain di rait wie miin se wi fi kain di wie ou Gad spirit waahn wi fi kain, an dat wi mek wi kain laik Jeuova an Jiizas. An chuu wi a Kristiyan, wi lorn fi kier bout ada piipl. So wi kyan se, di ting we push wi fi kain tu ada piipl a kaaz wi lov Jeuova Gad an wi lov piipl tu. So wi kain tu piipl kaa it a kom fram wi aat an Jeuova api wid dat.

It no aad fi kain tu piipl we kain tu wi an fi kain tu di wan dem we wi nuo gud gud. (2 Sam. 2:6) Wan wie wi du dat a wen wi tel dem tangks. (Kol. 3:15) Bot wa ef yu fiil se sumadi no dizorv it?

Tingk bout dis: Nobadi no kain tu piipl we no dizorv it laka Jeuova, an iina di Baibl im tiich wi se a so wi fi kain tu. Iina di paat a di Baibl we rait iina Griik, it tel wi uol iip a taim se Gad kain tu wi “iivn duo wi no dizorv it.” Bot a ou Gad shuo se im kain tu wi?

Tingk bout di uol iip a miliyan a piipl we Jeuova kain tu. Im gi dem tingz so dem kyan gwaan liv. (Mat. 5:45) Matarafak, aal bifuor piipl nuo uu Jeuova bi, im kain tu dem. (Ifii. 2:4, 5, 8) Wan a di wie im du dat a fi sen im wan dege-dege Bwai Pikni fi kom ded fi aal a wi. Di apasl Paal mek wi nuo se a chuu Jeuova “gud an kain” mek im sen im Son kom ded fi wi. (Ifii. 1:7) An aal ef wi sin an let dong Jeuova, im stil a tiich wi an tel wi wa fi du. Di ting dem we im se an wa im tel wi fi du komiin nais laik wen ‘rien a jrizl pan graas’. (Dyuu. 32:2) Wi shuor nuo se wi kyaahn pie im bak fi aal a di gud sitn dem we im du fi wi. An wen yu tingk bout it, wi afi dipen pan Jeuova. Ef im no kain tu wi, wi na’av no fyuucha widout im.​—Luk pan 1 Piita 1:13.

Fi shuor, kaaz wi nou se Jeuova kain tu wi, it mek wi lov im an it mek wi waahn fi du tingz laik im. So evridie wi a-go chrai fi du laik Jeuova an kain tu evribadi. (1 Tes. 5:15) Wen wi aalwiez kain tu piipl, it a-go komiin laik wen wi put aan sitn fi waam op wiself wen taim kuol. Piipl a-go fiil gud fi de roun wi, laik wi fambili dem an di piipl dem we a worship Jeuova wid wi, di wan dem we wi wok wid, an di wan dem we wi go a skuul wid, aal wi nieba dem tu.

Tingk bout aal a di piipl dem iina wi fambili ar we de iina wi kanggrigieshan we wuda fiil gud ef wi du sitn gud fi dem ar se sitn nais tu dem. Ef yu tingk bout it, yu mait-a si se sumadi de iina yu kanggrigieshan we wuda waahn elp fi tek kier a dem ous an dem flowaz dem, ar dem waahn sumadi fi go a shap ar go a maakit fi dem. Pan tap a dat, ef yu miit sumadi wen yu a priich an dem waahn elp wid sitn, yu tingk yu kyan elp dem out?

So jos laka Jeuova, wi afi mek shuor se wa wi se an wa wi du aalwiez shuo se wi ‘gud an kain tu piipl laik se a wan laa wi a fala.’