1. Di wan dem we sin gens Jeuova, wa Jeuova mek dem nuo se?

 WI NUO se Jeuova a di wan we mek wi, an im gi wi im laa dem, an im a di bes wan fi joj wi, an di Baibl mek wi nuo se im a wi Faada we de iina evn we lov wi. (Sa. 100:3; Aiz. 33:22) Wen wi du tingz we ort Jeuova an wi sari bout it an ton we fram wi sin dem, im no onggl kyan paadn wi sin dem bot im wel waahn fi paadn wi sin dem tu. (Sa. 86:5) Jeuova did yuuz wan prafit we niem Aizaiya fi tel wi se: “Iivn duo unu sin dem red laka blod, dem gweehn get wait laka sunuo.”​—Aiz. 1:18.

2. Ef wi waahn fi liv gud wid wi wan aneda, wa wi fi du?

² Kaa wi no porfek, aal a wi se tingz an du tingz we ort ada piipl tu. (Jmz. 3:2) Bot dat no miin se wi kyaahn liv gud wid wi wan aneda. Wi kyan liv gud wid wi wan aneda ef wi paadn wi wan aneda. (Pr. 17:9; 19:11; Mat. 18:21, 22) Wen wi du som likl sitn we ort wi wan aneda, Jeuova waahn wi fi paadn wi wan aneda. (Kol. 3:13) An it mek sens fi wi du dat, kaa di Baibl mek wi nuo se Jeuova eva redi fi figiv piipl “no mata wa dem du.”​—Aiz. 55:7.

3. Wa wi a-go luk pan iina da lesn ya?

³ Iina da lesn ya wi a-go luk pan: Ou wi kyan du laik Jeuova an paadn piipl? Wa a di sin dem we wi fi mek di  elda dem nuo bout? An wa mek Jeuova tel wi se wi fi figiv wi wan aneda? An wa wi kyan lorn fram ou som ada breda an sista did diil wid tingz wen ada piipl did du tingz we mek dem sofa bad?

4. (a) Wen wan Kristiyan sin bad wa dem fi du? (b) Wen di elda dem miit wid sumadi we sin bad, wa dem fi chrai an fain out?

⁴ Wen wan Kristiyan sin bad di elda dem fi nuo bout it. 1 Korintiyan 6:9, 10 mek wi si som a di sin dem we di elda dem afi nuo bout. Dem sin ya a go gens Gad laa dem. Ef wan Kristiyan go en op du wan a dem sin ya, im fi prie tu Jeuova bout wa im du, an im fi go tu di elda dem go tel dem bout wa im du tu. (Sa. 32:5; Jmz. 5:14) Wa mek wi fi tel di elda dem? Wi nuo se Jeuova did sen Jiizas kom ded fi wi an a onggl Im aluon kyan paadn aal a wi sin dem an a it dat. * Bot Jeuova gi di elda dem di rait fi yuuz di Baibl fi si ef di sumadi fi tan iina di kanggrigieshan. (1 Kor. 5:12) Wen dem a luk pan di kies, dem afi tingk bout dem sitn ya: Di sumadi did plan fi go du wa dem du? Dem did kumuujin an a chrai aid wa dem did a du? Im did a galang a galang a sin fi wan lang taim? An di bigis ting we dem afi luk pan, a ef im riili sari fi wa im du an ef im ton we fram im sin dem. Dem si notn we shuo se Jeuova paadn di sumadi we sin?​—Aks 3:19.

5. Kaa a di wok we di elda dem du, wa a som gud sitn we mait-a apm?

⁵ Wen di elda dem miit wid sumadi we sin bad, di elda dem fi chrai an mek shuor se eniting we dem du a wa Jeuova did don du aredi iina evn. (Mat. 18:18) Ou wa di elda dem du a-go elp di kanggrigieshan? It a-go mek shuor se wen sumadi sin bad an no ton we fram dem sin dem, dem no tan iina di kanggrigieshan an go inviigl di neda breda an sista dem fi go sin tu. (1 Kor. 5:6, 7, 11-13; Taitos 3:10, 11) Wen di elda dem miit wid di sumadi we sin, wan neda ting dem du a elp di sumadi we sin fi si se dem fi ton we fram dem sin so dat Jeuova kyan paadn dem. (Luuk 5:32) Di elda dem a-go prie fi di sumadi we ton we fram dem sin so das Jeuova kyan elp dem fi ton im fren agen.​—Jmz. 5:15.

6. Ef sumadi get put outa di kanggrigieshan, Jeuova kyan stil paadn dem? Tel wi wa mek yu se so.

⁶ Wa ef wen di elda dem miit wid di sumadi, dem si se im no ton we fram im sin dem? Ef a so it go, dem a-go put im out a di kanggrigieshan. An ef wa im du brok wan a di laa dem iina di konchri wich paat im liv, di elda dem naa go aid wa im du kaa dem no waahn di govament fi ponish im. Jeuova lou di piipl dem we iina powa fi joj an ponish enibadi we du wa rang​—aal ef dem ton we fram dem sin dem. (Ruo. 13:4) Bot ef afta dat di sumadi get fi si se wa im did du rang, an ton we fram im sin dem, Jeuova a-go paadn im. (Luuk 15:17-24) Jeuova redi fi paadn im aal ef a weehn som wikid sitn im did du.​—2 Kr. 33:9, 12, 13; 1 Tim. 1:15.

7. Wen sumadi du sitn fi ort wi, wa it miin fi figiv dem?

⁷ It tek di bordn aafa wi fi nuo se it no op tu wi fi Jeuova paadn sumadi we sin! Bot sitn els di de we Jeuova ekspek wi fi  du. A wa dat bi? Som a di taim sumadi mait-a du sitn we ort wi bad bad an dem tel wi sari an waahn wi fi paadn dem. An den yu av som we ort wi, an dem no tel wi se dem sari. Aal ef a dat apm, wi na’afi av dem op iina wi aat an wi na’afi beks wid dem niida. Wi kyan paadn dem siem wie. Wi nuo se dis naa go iizi, wos ef wa dem did du did lik yu at. The Watchtower fi Septemba 15, 1994, mek wi nuo se: “Wen yu figiv sumadi we ort yu, dis no miin se yu a put op wid wa dem did du. Wa dis miin fi wan Kristiyan, a das wen yu figiv sumadi, wi a chos se Jeuova a-go wok out tingz iina di rait an prapa wie. Kaa im a di bes Joj an im du wa rait, im fier an im a-go saat out tingz iina di rait taim.” Wa mek Jeuova se wi fi paadn ada piipl an mek im diil wid di kies?

8. Wen wi paadn ada piipl, wa dat shuo se?

⁸ Fi paadn ada piipl shuo se wi tangk Jeuova fi paadn wi. Jiizas did tel wi wan mek op tuori. Im se Jeuova komiin laka wan maasta. Iina da tuori de, wan sliev did uo im maasta wan wol iip a moni bot di maasta did mek im gwaan an neehn afi pie it bak. Da siem sliev de, wan sliev did uo im som likl bit a moni, an im tel im se im afi pie im bak aal a wa im uo im. (Mat. 18:23-35) Jiizas did a mek wi si se ef wi tangk Jeuova fi paadn wi, wi a-go paadn ada piipl tu. (Sa. 103:9) Wol iip a ier ago The Watchtower did put it da wie ya: “Kaa Jiizas Krais kom ded fi wi a dat mek Gad kyan paadn wi. So it no mata umoch taim wi paadn ada piipl, wi kyaahn paadn piipl muor taim dan ou Jeuova paadn wi.”

9. A wa kain-a piipl Jeuova paadn? (Matyu. 6:14, 15)

⁹ Di wan dem we paadn ada piipl a-go get paadn tu. Jeuova paadn di wan dem we paadn ada piipl. (Mat. 5:7; Jmz. 2:13) Wen Jiizas did a tiich im disaipl dem ou fi prie, im did mek dat klier klier. (Riid Matyu 6:14, 15.) A di siem ting Jeuova did mek wi si wid di wie ou im did diil wid Juob. Wi si dis wen chrii man, dat a Elifaz, Bildad an Zuofaar, did se tingz we did ort Juob bad, an Jeuova tel Juob se im fi prie fi dem. An a afta im prie fi dem, den Jeuova bles im.​—Juob 42:8-10.

10. Wa it du tu wi wen wi kip op piipl iina wi aat? (Ifiijan 4:31, 32)

¹⁰ Wen wi kip op piipl iina wi aat, it a-go ort wi. Kaa Jeuova nuo umoch it ort wi wen wi kip op piipl iina wi aat, a dat mek im tel wi no fi dwi’it kaa im waahn wi fi api. (Riid Ifiijan 4:31, 32.) Im mek wi nuo se wi fi ‘iizi wiself, wi no fi so beks, wi fi let it go.’ (Sa. 37:8) It mek uol iip a sens fi du wa da skripcha ya se. Wen wi kip op sumadi iina wi aat it mash wi op iina evri wie. It mek wi get sik an wi kyaahn tingk chriet. (Pr. 14:30) So wen wi kip op sumadi iina wi aat, a no dem it a ort, a wi it a ort. It wuda komiin laik se wi a jringk paizn an a tingk se a dem it wuda ort. Wen wi paadn ada piipl, a sitn gud wi a du fi wiself. (Pr. 11:17) It mek wi fiil beta iina wiself an wi kyan gwaan du Jeuova wok.

11. Wen nobadi du wi sitn, wa di Baibl se wi fi du an no fi du? (Ruoman 12:19-21)

¹¹ Ef nobadi du unu notn rang, lef dem tu Jeuova Gad mek im joj dem. Jeuova no gi wi di rait fi du nobadi notn ar fi ponish dem wen dem du notn fi ort  wi. (Riid Ruoman 12:19-21.) Kaa wi no porfek an nuo evriting, wi kyaahn joj nobadi gud laik ou Jeuova wuda joj dem. (Iib. 4:13) Somtaim wi en op du di rang ting, kaa di wie ou wi fiil bout tingz mek wi kyaahn tingk chriet. Jeuova did mek Jiemz rait an se: “Kaaz wen unu get beks, unu kyaahn du di gud sitn dem we Gad waahn unu fi du.” (Jmz. 1:20) Wi nuo fi shuor se Jeuova a-go du di rait ting an mek shuor se evribadi get jostis.

12. Ou wi kyan shuo se wi biliiv se Jeuova a gi evribadi jostis?

¹² Wen wi paadn ada piipl it shuo se wi biliiv se Jeuova a-go mek evribadi get jostis. So wen wi lef tingz tu Jeuova wi shuo se wi biliiv se Jeuova a-go mek tingz beta. Di tingz dem we a ort wi nou, iina di nyuu worl we Jeuova pramis wi, im se: “Unu naa go memba dem at aal, an dem naa go mek unu fiil no pien iina unu aat niida.” (Aiz. 65:17) Bot wen sumadi ort wi bad bad, yu tingk wi kyan riili let it go an no av dem op iina wi aat? Mek wi luk pan ou som breda an sista did du dat.

13-14. Wid wa did gwaan wid Tony an José, wa yu did lorn fram wa Tony did du?

¹³ Uol iip a wi breda an sista dem mek op dem main fi paadn piipl we du sitn fi ort dem bad bad. Wen dem paadn sumadi, wa gud dat did du fi dem?

¹⁴ Wan breda we niem Tony, * we liv iina Filipiinz, did fain out se wan man niem José did kil im big breda lang bifuo im did lorn di chuut. Dem taim de Tony did a wan at-ed, so im tel imself se im a-go du im bak sitn fi wa im du im breda. Likl bit afta dat dem lak op José fi’it. Wen im kom outa prizn, Tony tel imself se eniwe im de im a-go fain im an kil im. So im bai wan gon fi kil im. Likl afta dat Tony staat fi stodi di Baibl wid di Jeuova Witnis dem. Im se: “Wen mi a stodi mi get fi andastan se mi afi chienj op mi doti wiez dem, laik fi le’go sortn tingz an no av op piipl iina mi aat.” Afta a wail, Tony baptaiz an ton wan Jeuova Witnis an den im  ton wan elda iina di kanggrigieshan. Jos tingk bout ou im fiil wen im fain out se José go ton wan Jeuova Witnis tu! Wen di tuu a dem miit op, ges wa dem du? Dem og op dem wan aneda an Tony tel José se im paadn im fi wa im did du. Tony se kaa im paadn José fi wa im did du, it mek im fiil so api dat im kyaahn iivn tel wi ou gud it mek im fiil. Ye man, wi si ou Jeuova bles Tony kaa im did redi fi paadn ada piipl.

15-16. Fram wa did gwaan wid Piita an Sue, wa yu lorn fram wa dem did du?

¹⁵ Iina 1985, wan breda we niem Piita an im waif we niem Sue did de a miitn a di Kindom Aal wen wan big bum go aaf kaa wan man we a neehn wan Jeuova Witnis pudong wan bum iin de! Kaa a dat, Sue did get mash op bad. It mek ar kyaahn si ar ier notn gud. An it mek ar kyaahn sumel notn niida. * Piita an Sue aalwiez a wanda: ‘A wa kain-a sumadi wuda du sitn so wikid?’ Uol iip a ier afta dat, dem kech di man we dwi’it an sen im go a prizn fi laif. Wen dem aks Piita an Sue ef dem paadn di man, dem se: “Jeuova tiich wi se wen wi kip op sumadi iina wi aat it mash wi op iina evri wie. It mek wi get sik an wi kyaahn tingk chriet. An it wi mek wi fiil laik se wi afi du bak sumadi sitn tu. So likl afta it apm, wi aks Jeuova fi elp wi fi no beks so bad dat wi fiil laik wi waahn fi ort sumadi bak an fi elp wi fi no av op nobadi iina wi aat niida.”

¹⁶ Yu tingk it did iizi fi dem paadn da man de? Nuo sa! Matarafak dem se: “Somtaim wi fiil a wie an beks kaa a ou Sue fiil, an shi kyaahn du som tingz we shi wuda waahn fi du kaa a wa did apm tu ar. Bot wi no tingk bout it tu moch so wi no fiil da wie de fi lang. Wi kyan se fram iina wi aat se, ef da man de staat sorv Jeuova an ton wi breda, wi a-go api fi’im. Dis mek wi si se, wen yu du wa di  Baibl se yu fi du, muor dan notn els, it mek yu fiil frii! An it mek wi fiil gud tu se Jeuova a-go chienj tingz wan die.”

17. Fram wa did gwaan wid Myra, wa dat tiich yu bout ou yu kyan paadn piipl?

¹⁷ Bifuo Myra lorn di chuut bout Jeuova shi did marid an av tuu pikni. Ar ozban neva kom iina di chuut. Afta a wail, im en op gi ar bon an lef ar an di pikni dem. Myra se: “Wen mi ozban lef mi wid di tuu pikni dem, mi fiil laik ou nof piipl fiil wen sumadi we dem lov ton dem bak pan dem​—mi kudn biliiv it, evritaim mi fiil fi baal, an mi fiil laik mi neehn did fi tek im op iina di fos plies, an mi fiil laik mi did fi bliem miself, mi did beks bad.” Alduo ar marid laif did mash op, shi stil fiil ort bout wa im did du. Shi se: “Uol iip a mont mi did beks bad wid im, til mi si se it neehn did a mek mi fiil gud wen mi a worship Jeuova, an it mek mi neehn a muuv gud wid ada piipl niida.” Myra se shi no av im op iina ar aat agen, an shi no beks bad wid im agen niida. Shi aal se shi uop se im kom sorv Jeuova wan die. Kaa shi paadn im fi wa im did du, shi kyan luk pan tingz difrant nou. Shi gruo ar tuu pikni dem fi sorv Jeuova an di pikni dem get big an av dem uona fambili nou. An evribadi api fi a sorv Jeuova.

18. Kaa Jeuova a di bes Joj, wa wi kyan shuor se?

¹⁸ Bwai, wi afi glad se wi na’afi a bordn wiself fi joj piipl! Jeuova a di bes sumadi fi joj piipl, an a dat im a-go du. (Ruo. 14:10-12) Wi nuo fi shuor se im a-go aalwiez du di rait ting wen im a joj. Im naa go du notn at aal we rang an we no fier. (Jen. 18:25; 1 Ki. 8:32)

19. Kaa Jeuova gi evribadi jostis, ou it a-go elp wi?

¹⁹ Wi kyaahn wiet fi di taim wen Jeuova a-go du sitn bout di wikid tingz dem we a gwaan we a mek wi sofa, an get rid a dem fi eva. Aal a di sitn dem we a bada wi ya nou an we a mek wi sik, dem de sitn de a-go don we wid. (Sa. 72:12-14; Rev. 21:3, 4) Wi naa go memba dem agen. Bot iina di miin taim, wi tangk Jeuova se im mek wi so das wi kyan paadn ada piipl, jos laka im.