ღმერთმა ადამიანებს განსაკუთრებული ძღვენი გვიბოძა — ჩვენ შეგვიძლია ლოცვით მივმართოთ მას და გულისნადები გავანდოთ. ღვთის ერთგულმა მსახურმა, დავითმა ასეთი სიტყვებით მიმართა ღმერთს: „ლოცვების მომსმენო, შენთან მოვა ყოველი ხორციელი“ (ფსალმუნი 65:2). როგორ უნდა ვილოცოთ, რომ ღმერთმა შეისმინოს ჩვენი ლოცვა და მისი კეთილგანწყობა მოვიპოვოთ?

პირადი ლოცვის დროს „გული გადმოუღვარეთ“ ღმერთს — ყველაფერი უთხარით, რასაც გრძნობთ (ფსალმუნი 62:8). ყოვლისშემძლე ღვთისთვის ძვირფასნი არიან ისინი, ვინც გულწრფელად ლოცულობენ მის წინაშე.

ღმერთს ბევრი წოდება აქვს, თუმცა ბიბლია მის სახელსაც გვიმჟღავნებს: „მე ვარ იეჰოვა. ეს არის ჩემი სახელი“ (ესაია 42:8). წმინდა წერილებში სახელი იეჰოვა დაახლოებით 7 000-ჯერ გვხვდება. ბევრი წინასწარმეტყველი ღმერთს სახელით მიმართავდა. მაგალითად, ერთხელ აბრაამმა ღმერთს უთხრა: „იეჰოვა . . . ნება მომეცი, კიდევ ვთქვა“ (დაბადება 18:30). ლოცვის დროს ჩვენც უნდა მოვიხსენიოთ ღვთის სახელი, იეჰოვა.

რომელ ენაზეც არ უნდა ვსაუბრობდეთ, ღმერთს ესმის ჩვენი და იცის, რას ვგრძნობთ და რას ვფიქრობთ. მისი სიტყვა გვარწმუნებს: „ღმერთი მიკერძოებული არ არის, არამედ ყოველ ხალხში მისი მოშიში და სიმართლის მქმნელი მოსაწონია მისთვის“ (საქმეები 10:34, 35).

მაგრამ ღვთის მოწონება რომ დავიმსახუროთ, ლოცვაზე მეტია საჭირო. მომდევნო სტატიაში ვიმსჯელებთ, კიდევ რის გაკეთება გვმართებს.