Miresaka Momba ny Afofandiovana ve ny Baiboly?
Valiny ara-baiboly
Tsia, tsy miresaka momba an’izany ny Baiboly. Tsy hita ao akory aza ilay teny hoe “afofandiovana.” Tsy mampianatra koa ny Baiboly hoe diovina any amin’ny afofandiovana ny fanahin’ny maty. a Andao hojerentsika izay ampianarin’ny Baiboly momba ny ota sy ny fahafatesana. Ho hitantsika koa fa mifanohitra amin’ny fampianarana momba ny afofandiovana izany.
Ny finoana ny ran’i Jesosy no manadio ho afaka amin’ny ota, fa tsy ny fandalovana ao amin’ny afofandiovana. Milaza ny Baiboly fa “ny ran’i Jeso-Kristy [Zanak’Andriamanitra] dia manadio antsika amin’ny ota rehetra”, ary “Jeso-Kristy ... nanasa ny otantsika tamin’ny rany.” (1 Jaona 1:7; Apokalypsy 1:5, Fandikan-teny Katolika) ‘Nahafoy ny ainy ho fanavotana ny maro’ i Jesosy mba ho afaka amin’ny ota izy ireo.—Matio 20:28, Kat.
Tsy mahatsiaro tena ny maty. “Ny velona mahalala fa ho faty izy; fa ny maty kosa tsy mahalala na inona na inona.” (Mpitoriteny 9:5, Kat.) Tsy mahatsapa na inona na inona ny maty, ka tsy mahatsiaro mijaly na faly rehefa diovina ao amin’ny afofandiovana.
Tsy voasazy noho ny ota intsony ny olona iray rehefa maty. Milaza ny Baiboly hoe “ny fahafatesana no tambin’ny ota”, ary “izay maty dia afaka amin’ny fahotana.” (Romanina 6:7, 23, Kat.) Ny fahafatesana ihany àry no sazy farany noho ny fahotana.
a Izao no resahin’ilay boky hoe Orpheus: A General History of Religions momba ny afofandiovana: “Tsy miresaka momba an’izany mihitsy ny Filazantsara.” Milaza koa ny New Catholic Encyclopedia hoe: “Rehefa tena dinihina tsara, dia hita fa avy tamin’ny lovantsofina ilay fampianaran’ny Katolika momba ny afofandiovana, fa tsy avy ao amin’ny Soratra Masina.”—Fanontana Faharoa, Boky Faha-11, pejy 825.
b Jereo ny New Catholic Encyclopedia, Fanontana Faharoa, Boky Faha-11, pejy 824.