Il-Bibbja X’Tgħid Dwar l-Abort?
It-tweġiba tal-Bibbja
Il-Bibbja ma tużax il-kelma “abort” fis-sens ta’ meta xi ħadd jeħles apposta minn fetus uman. Madankollu, ħafna versi mill-Bibbja juru x’inhi l-ħarsa t’Alla dwar il-ħajja umana, inkluż dik taʼ tarbija li għadha ma twilditx.
Il-ħajja hi rigal mingħand Alla. (Ġenesi 9:6; Salm 36:9) Hu jqis il-ħajja kollha kemm hi prezzjuża, inkluż il-ħajja taʼ tarbija fil-ġuħ. Mela jekk xi ħadd b’intenzjoni joqtol tarbija li għadha ma twilditx, dan hu l-istess bħallikieku qtil.
Il-Liġi li Alla ta lill-Iżraelin kienet tgħid: “Jekk żewġt irġiel jissaraw bejniethom u jweġġgħu lil mara tqila u t-tarbija tagħha titwieled imma ma jiġri ebda aċċident fatali, il-ħati żgur li għandu jħallas għall-ħsarat skond kemm iwaħħlu sid il-mara; u jagħti skond ma jaqtgħu l-imħallfin. Imma jekk jiġri xi aċċident fatali, trid tagħti ruħ b’ruħ.”—Eżodu 21:22, 23. a
Il-ħajja umana meta tibda?
Il-ħarsa t’Alla hi li l-ħajja umana tibda mill-konċepiment. Fil-Kelma tiegħu, il-Bibbja, Alla dejjem jirreferi għal tarbija li għadha ma twilditx bħala persuna individwali. Ikkunsidra xi eżempji li jindikaw li Alla ma jagħmilx distinzjoni bejn il-ħajja taʼ tarbija fil-ġuf u dik taʼ tarbija li diġà twieldet.
Taħt ispirazzjoni divina, is-Sultan David qal lil Alla: “Għajnejk rawni meta kont għadni biss embriju.” (Salm 139:16) Alla qies lil David bħala persuna saħansitra qabel ma kien twieled.
Iktar minn hekk, Alla kien jaf li kellu skop speċjali għall-profeta Ġeremija minn qabel ma dan twieled. Alla qallu: “Qabel ma kont qed nifformak fiż-żaqq kont nafek, u qabel ma ħriġt mill-ġuf qaddistek. Profeta għall-ġnus għamiltek.”—Ġeremija 1:5.
Luqa, kittieb tal-Bibbja li kien tabib, uża l-istess kelma Griega li uża għal tarbija tat-twelid biex jiddeskrivi tarbija li għadha ma twilditx.—Luqa 1:41; 2:12, 16.
Jekk xi ħadd għamel abort fil-passat, jaħfirlu Alla?
Dawk li xi darba għamlu abort jistgħu jirċievu l-maħfra t’Alla. Jekk huma issa jaċċettaw il-ħarsa t’Alla lejn il-ħajja, m’għandhomx għalfejn iħossuhom maħkumin mill-ħtija. “Ġeħova ħanin u grazzjuż . . . Daqskemm tlugħ ix-xemx huwa ’l bogħod minn inżulha, daqshekk biegħed minna nuqqasijietna.” b (Salm 103:8-12) Ġeħova ħa jaħfer lil dawk kollha li b’mod sinċier jindmu mid-dnubiet tal-passat, inkluż l-abort.—Salm 86:5.
L-abort huwa ħażin jekk il-ħajja tal-omm jew tat-tarbija tkun fil-periklu?
Meta nqisu dak li tgħid il-Bibbja dwar tarbija li għadha ma twilditx, il-fatt li jistaʼ jkun hemm riskju taʼ saħħa għall-omm jew għat-tarbija, ma jiġġustifikax li jsir abort.
Xi ngħidu f’każ rari fejn tqum emerġenza u jkollha ssir għażla bejn il-ħajja tal-omm jew tat-tarbija? F’każ bħal dan, dawk involuti jridu jieħdu deċiżjoni persunali dwar liema ħajja jridu jipprovaw isalvaw.
a Xi traduzzjonijiet jagħmluha tidher li f’din il-liġi lil Iżrael, l-iktar li kien jimporta kien x’jiġri lill-omm, u mhux lill-fetus. Madankollu, it-test Ebrajk jirreferi għal aċċident fejn tmut l-omm jew inkella t-tarbija.
b Ġeħova hu l-isem t’Alla kif muri fil-Bibbja.—Salm 83:18.