EBY’ABAZAIRE
7: Emicwe
EKI KIRIKUMANYISA
Emicwe n’emitindo eyaawe ei orikucwamu kugyenderaho. Nk’eky’okureeberaho, nooteeraho kuba ow’amazima omu bintu byona? Kyaba nikwo kiri, nooba nooyenda kuta omucwe ogwo omu baana baawe.
Emicwe neetwariramu n’entwaza nungi. Nk’eky’okureeberaho, omuntu oine entwaza nungi naaba ari omwekambi, omuringaaniza, kandi orikufayo aha bandi, kandi emitwarize egi omuntu aine kugigira akiri muto.
OMUSINGYE GWA BAIBULI: “Manyiiza omwana omuhanda ogu ashemereire kutoora, kandi n’obu arikura, tarigurugamu.”—Enfumu 22:6.
ENSHONGA AHABW’ENKI NI KIKURU
Omu bwire obu obw’entunguuka omu by’obwengye, emicwe mirungi n’ekintu kikuru. “Kyorobi kutunga eby’emicwe mibi kurabira aha byoma obwire bwona,” nyina abaana orikwetwa Karyn nikwo arikugira. “Abaana nibabaasa kuba bashutami naitwe obwo barikureeba ebintu ebitashemeire!”
OMUSINGYE GWA BAIBULI: ‘Abakuru emitima yaabo yaaherize kumanyiira kutaanisa ekirungi n’ekibi.’—Abaheburaayo 5:14.
Ni kikuru kugira emicwe mirungi. Eki nikitwariramu okukoresa ebigambo by’embabazi (nka “nyabura ’we” na “yebare”) n’okufayo aha bandi, ekintu ekitakiriho munonga ahabw’okugira ngu abantu hati nibakunda ebyoma byabo kukira abantu bagyenzi baabo.
OMUSINGYE GWA BAIBULI: ‘Nk’oku murikwenda abantu kubagirira, naimwe mube nikwo mwabagirira.’—Luka 6:31.
EKI ORIKUBAASA KUKORA
Gamba butunu entwaza yaanyu. Nk’eky’okureeberaho, okucondooza nikworeka ngu emishogoyo nibabaasa kuteejumba omu kuteerana batakataahire omu bushwere, baaba bagambiirwe butunu ngu ekikorwa ekyo kigwire.
OBUHABUZI: Koresa ekintu ekibaireho juba kugaaniira n’abaana aha micwe. Nk’eky’okureeberaho, amakuru gaaba nigagamba aha kikorwa kya rwango, noobaasa kugira oti: “N’eihano kureeba oku abantu barikugirira bagyenzi baabo ekiniga. Noogira ngu niki ekirikureetera abantu kuba batyo?”
“Nikiba kigumire munonga abaana kutoorana ekihikire nari ekigwire baaba batarikumanya ekihikire n’ekigwire.”—Brandon.
Yegyesa entwaza nungi. N’abaana nibabaasa kwega kugira ngu “nyabura ’we” na “yebare” n’okufayo aha bandi. “Abaana ku barikwongyera kufayo aha bandi nk’omu ka, ah’eishomero, n’ahu barikutuura, omu mwanya gw’okwefaho bonka, nikibaasa kubahwera kukora ebirikuhwera buri omwe,” ekitabo Parenting Without Borders nikwo kirikugira.
OBUHABUZI: Abaana baawe bahe emirimo kibahwere kwega omucwe gw’okuheereza abandi.
“Abaana baamanyiira kukora emirimo hati, tikirikwija kubateganisa baatandika kutuura bonka. Nibaija kuba baamanyiire kuhikiiriza obujunaanizibwa.”—Tara.
