EBY’ABATO
10: Okwesigwa
EKI KIRIKUMANYISA
Abazaire, abanywani, n’abarikukoresa abandi, nibakira kuta obwesigye omu bantu abarikwesigwa. Abarikwesigwa nibakuratira ebi bagambiirwe kukora, nibahikiiriza ebi barikuraganisa, kandi butoosha nibagamba amazima.
ENSHONGA AHABW’ENKI NI KIKURU
Haihi omuri buri kintu kyona, kubaasa kuheebwa obugabe oine kuba omazire bwire abantu bakwinemu obwesigye.
“Omuringo murungi gw’okureetera abazaire baawe kukwesiga, n’okworeka ngu okuzire kandi ori ow’obujunaanizibwa, ti obu orikuba ori nabo bwonka, beitu n’obu orikuba otari nabo.”—Sarahi.
OMUSINGYE GWA BAIBULI: “Mweshwijume mureebe [oku muri].”—2 Abakorinso 13:5.
EKI ORIKUBAASA KUKORA
Waaba nooyenda obe orikwesigwa nari kugaruka kwesigwa, amadaara aga nigabaasa kukuhwera.
Ba ow’amazima. Abantu nibaija kurahuka kukwihamu obwesigye waaba noogamba ebishuba. Waaba noogamba amazima otarikushereka, na munonga aha bikwatiraine n’enshobe zaawe, abantu nibaija kukutamu obwesigye.
“Kyorobi kuba ow’amazima ebintu byaba nibigyenda gye. Kwonka waaba noogamba amazima n’obu kirikukureetera kureebeka nka mubi, abantu nibaija kukwesiga.”—Caiman.
OMUSINGYE GWA BAIBULI: ‘Nitwetenga kutwaza gye omuri byona.’—Abaheburaayo 13:18.
Ba orikwesigwa. Omu kucondooza kumwe omuri U.S., ebicweka 78 ahari igana eby’abahangu bakagira ngu “ekintu kimwe kikuru eki ekitongore kirikuba nikisherura n’okubona omuntu orikwesigwa.” Okwega kuba orikwesigwa hati nikiija kukuhwera kuba orikwesigwa waakura.
“Abazaire bangye nibakimanya naaba ndi orikwesigwa, kandi ninkora emirimo yangye batabandize kunyijutsya emirundi mingi. Oku ndikwongyera kwehabura eky’okukora, nikwo barikwongyera kunyesiga.”—Sarah.
OMUSINGYE GWA BAIBULI: ‘Naakuhandiikira nyesigire okworoba kwawe, kandi niimanya ngu nangwa noija kukora ebirikukira ebi naagamba.’—Filemooni 21.
Ba omugumisiriza. Oyihireho okukura omu by’omubiri okurikureebwa abandi butunu, haine kuhinguraho obwire abandi kubaasa kukireeba ngu okuzire omu biteekateeko n’enyehurira.
“Abazaire baawe n’abandi tibarikubaasa kukwesiga ahabw’ekikorwa kimwe. Kwonka nibabaasa kukwesiga mporampora waaguma nooyoreka ngu nooyesigwa.”—Brandon.
OMUSINGYE GWA BAIBULI: ‘Mujware okugumisiriza.’—Abakolosai 3:12.
