EBY’ABAZAIRE
5: Okuhurizana
EKI KIRIKUMANYISA
Okuhurizana okurungi nikubaho iwe n’abaana baawe mwaba nimugaaniira hamwe murikugambirana n’enyehurira.
ENSHONGA AHABW’ENKI NI KIKURU
Na munonga okuhurizana nikubaasa kuguma waaba noogaaniira n’eminyeeto. Enyimaho, “okaba nooshusha ngu hariho omuhanda gw’enyima ya siteegi ogu orikubaasa kurabamu kumanya embeera z’abaana baawe,” ekitabo Breaking the Code nikwo kyabaire nikigira. “Kwonka hati eki orikubaasa kukora n’okushutama n’abareebi abandi, kandi noobaasa n’okutatunga omwanya murungi gw’okushutamamu.” Kwonka okutaana n’ekyo, eki kyabaho nibwo bwire burungi bw’okuhurizana n’abaana baawe!
EKI ORIKUBAASA KUKORA
Gaaniira n’omwana waawe omu bwire bwe obuhikire. Kikore n’obu bwakuba nyekiro.
“Noobaasa kwenda kugira ati: ‘Hati nibwo orikwenda kugamba? Nsiibire naiwe eizooba ryona!’ Kwonka shi ahabw’enki twine kwetomboita abaana baitu baaba nibenda kugira eki baatugambira? Mbwenu shi eki tikyo buri muzaire arikwenda?”—Lisa.
“Ninkunda kubyama, kwonka okugaaniira kurungi oku ndakizireyo kugira n’emishogoyo yangye n’okw’aha gati y’ekiro.”—Herbert.
OMUSINGYE GWA BAIBULI: “Omuntu weena arekye kwesherurira ebye ahabwe, kureka asherure eby’okuhwera mutaahi we.”—1 Abakorinso 10:24.
Yetantare ebirikuhuzya. Ishe abaana omwe naagira ati: “Obumwe ninyeshanga nyine bingi omu biteekateeko naaba ningaaniira n’abaana bangye. Kandi tindikubaasa kubabuzabuza, nibakimanya!”
Naiwe ku oraabe nikwo ori, ihaho tiivi, n’ebindi ebyoma obite ahansi. Ta omutima aha ki omwana arikugamba, kandi hurikiza gye yaaba aine ebi arikukugambira, n’obu byakuba nibireebeka nka bikye.
“Twine kuhamiza abaana baitu ngu enyehurira zaabo nituzitwara nka nkuru. Baareeba ngu titurikufayo, nibaija kuguma n’enyehurira zaabo nari basherure obuhwezi ahandi.”—Maranda.
“Otagira ekiniga, n’obu emiteekateekyere y’omwana yaakuba egwire.”—Anthony.
OMUSINGYE GWA BAIBULI: “Omu kuhurira mwerinde.”—Luka 8:18.
Gaaniira nabo omu mbeera eza butoosha. Obumwe abaana nibagamba ekibari aha mutima baaba batarikureebana n’abazaire.
“Nitukira kugaaniira twaba turi omu motoka turikuvuga. Twagaaniira tutarikureebana beitu anshutami aha rubaju nitugaaniira gye.”—Nicole.
Obwire bw’okurya n’obundi bwire burungi bw’okugaaniira gye.
“Omu kurya kyakiro buri omwe naagamba ekyamutama omu izooba n’ekyamushemeza. Ekikorwa eki nikitugaita hamwe kandi nikituhwera kumanya ngu tihaine oine kuraba omu buremeezi wenka.”—Robin.
OMUSINGYE GWA BAIBULI: “Omuntu weena arahukye kuhurira, kwonka atarahukiiriza kugamba.”—Yakobo 1:19.
Noobaasa Kukunda n'Ebi
ENYEGYESA ZA BAIBULI
Obuhwezi bw’Emishogoyo n’Eminyeeto
Yetegyereze oku Baibuli erikubaasa kuhwera omu mbeera zigumire ezirikukira kuhika aha mishogoyo n’eminyeeto.
