“Mebɔ mɔdenle kɛ mekenga Baebolo ne, noko menwu kɛzi ɔle kpole la a, ɛnee me ahonle ɛdu!”​—Briana, 15.

Zɔhane a ɛte nganeɛ ɔ? Edwɛkɛ ɛhye baboa wɔ!

•  Duzu ati a ɔwɔ kɛ ɛkenga Baebolo ne a?

•  Kɛzi ɔwɔ kɛ mekenga Baebolo ne ɛ?

•  Mɔɔ ɛ tipɛnema ka la

Asoo Baebolo ne mɔɔ ɛbagenga la yɛ wɔ ɛvɛlɛ ɔ? Saa zɔhane a ɛte nganeɛ a, ndelebɛbo wɔ nu. Bie a ɛnwu Baebolo ne kɛ buluku kpole mɔɔ nuhua edwɛkɛ ne zonle noko nvoninli biala ɛnle nu la​—ɔndwu TV nee vidio ɛleka bie!

Noko dwenle nwo wɔ adenle ɛhye azo: Saa ɛnwu kɛ tete ɛlɛka bie gyi ɛleka bie a, asoo debie ɛnrɛhwe wɔ kɛ ɛnlea nu?

Baebolo ne le kɛ ɛlɛka zɔhane la. Nrɛlɛbɛ edwɛkɛ dɔɔnwo wɔ nu mɔɔ baboa wɔ yeamaa

• Wɔazi kpɔkɛ kpalɛ

• Ɛ nee wɔ awovolɛ adɛnla anzodwolɛ nu

• Wɔanyia agɔnwolɛma mɔɔ tɛla biala

• Wɔagyinla adwenleadwenle nloa

Duzu ati a buluku ɛhye mɔɔ ɛhyɛ kpalɛ la bahola aboa yɛ ɛnɛ ɛ? Ɔluakɛ “Ngɛlɛlera ne amuala vi Nyamenle sunsum nu.” (2 Timote 3:​16) Ɛhye kile kɛ, folɛdulɛ mɔɔ wɔ Baebolo ne anu la vi Sonla mɔɔ tɛla biala la ɛkɛ.

Adenle ko a le kɛ ɛbagenga Baebolo ne amuala. Yemɔ bamaa wɔade mɔɔ Baebolo ne ka la abo kpalɛ. Ndenle dɔɔnwo wɔ ɛkɛ mɔɔ yɛbahola yɛalua zo yɛagenga Baebolo ne a. Suzu neazo nwiɔ anwo:

•  Ɛbahola wɔagenga Baebolo mbuluku 66 ne amuala, ɔvi Mɔlebɛbo kɔdwu Yekile.

•  Ɛbahola wɔagenga Baebolo ne wɔadoa zo kɛ mɔɔ nuhua edwɛkɛ ne mɔ sisile la.

Yɛ ye nzonlɛ: Appendix A7 mɔɔ wɔ New World Translation ne anu la maa yɛnwu kɛzi ninyɛne sisile wɔ Gyisɛse azɛlɛ ye azo asetɛnla nu la.

Adenle mɔɔ tɔ zo nwiɔ la a le kɛ ɛbakpa Baebolo nu edwɛkɛ bie mɔɔ fale ngyegyelɛ mɔɔ ɛlɛyia ye anwo la na wɔagenga. Kɛ neazo la:

• Ɛkulo kɛ ɛnyia agɔnwolɛma kpalɛ ɔ? Kenga Dwɔnatan nee Devidi edwɛkɛ ne. (1 Samoɛle, tile 18-​20) Akee fa gyimayɛlɛ kɛlata “How to Find Loyal Friends” ne na nea ɛzukoalɛdeɛ mɔɔ wɔ edwɛkɛ ne anu la.

• Ɛkulo kɛ ɛnyia anwosesebɛ kpole ɛgyinla sɔnea nloa ɔ? Kenga kɛzi Dwosefi gyinlanle sɔnea nloa la anwo edwɛkɛ. (Mɔlebɛbo, tile 39) Akee fa gyimayɛlɛ kɛlata “How to Resist Temptation . . . Joseph​—Part 1” nee “Falsely Accused! Joseph​—Part 2” na nea ɛzukoalɛdeɛ mɔɔ wɔ edwɛkɛ ne anu la.

• Ɛkulo kɛ ɛnwu kɛzi asɔneyɛlɛ baboa wɔ la ɔ? Kenga Nihɛmaya anwubielɛ ne. (Nihɛmaya, tile 2) Akee fa gyimayɛlɛ kɛlata “God Answered His Prayer” ne fa sukoa debie fi edwɛkɛ ne anu.

Yɛ ye nzonlɛ: Saa ɛlɛkenga Baebolo ne a, nea kɛ dede ɛnle ɛleka mɔɔ ɛde la, amaa wɔahola wɔava wɔ adwenle wɔazie mɔɔ ɛlɛsukoa la azo.

Adenle mɔɔ tɔ zo nsa mɔɔ ɛbahola wɔalua zo wɔagenga Baebolo ne la a le kɛ, ɛbakpa edwɛkɛ anzɛɛ edwɛndolɛ bie wɔagenga na wɔadwenle kɛzi ɔfale ɛ nwo la anwo. Ɛkenga ɛwie a, biza ɛ nwo kpuya le kɛ ɛhye mɔ:

•  Duzu ati a Gyihova maanle bɛhɛlɛle ɛhye a?

•  Duzu a ɔmaa menwu ye wɔ Gyihova anwo a?

•  Kɛzi mebava ɛhye meali gyima wɔ me ɛbɛlabɔlɛ nu ɛ?

Yɛ ye nzonlɛ: Fa bodane sie ɛ nye zo! Kɛlɛ kenle mɔɔ ɛkulo kɛ ɛfa ɛbɔ wɔ Baebolo ɛgengalɛ ne abo la. Fa azɛkɛlata nee ninyɛne gyɛne mɔɔ baboa wɔ yeamaa wɔanyia mɔɔ ɛlɛkenga azo nvasoɛ la di gyima.