Kitaabni Qulqulluun cubbuuwwan duʼa geessisan jedhaman addaan baasee hin caqasu. Haa taʼu malee, namni tokko cubbuu cimaa raawwachuu kan amaleeffatu yoo taʼe fayyina isa dhabsiisuu akka dandaʼu barsiisa. Fakkeenyaaf, Kitaabni Qulqulluun cubbuuwwan ciccimoo akka halalummaa raawwachuu, waaqolii tolfamoo waaqeffachuu, gochawwan hafuura xuraaʼoo raawwachuu, aariidhaan finiinuu fi machii jiran “hojiiwwan foonii” jedhee waama. Itti fufuudhaanis, “Namoonni wantoota akkasii raawwachuu amaleeffatan Mootummaa Waaqayyoo hin dhaalan” jedha.—Galaatiyaa 5:19-21. a

Kitaabni Qulqulluun wantoota Waaqayyo balfu torba ni tarreessaa mitii?

 Eeyyee, ni tarreessa. Kitaabni Qulqulluun Fakkeenya 6:16 irratti, “[Yihowaan] wantoota torba ni balfa” jedha. Haa taʼu malee, cubbuuwwan Fakkeenya 6:17-19 irratti tarreeffaman cubbuu hunda kan of keessatti qabatani dha jechuu miti. Kanaa mannaa, yaada, dubbii fi gocha dabalatee, akaakuu gochawwan dogoggoraa wajjin wal qabatan hunda bakka buʼan kan of keessatti qabate dha. b

Ibsi cubbuu duʼa geessisu jedhu maal kan argisiisu dha?

 Hiikawwan Kitaaba Qulqulluu tokko tokko ibsa kana 1 Yohaannis 5:16 irratti itti fayyadamaniiru. Fakkeenyaaf, Kitaaba Qulqulluu Hiikkaa Waltaʼaa Haaraya irratti, ‘Cubbuun gara duʼaatti nama geessu jira’ jedhameera. Ibsi “gara duʼaatti nama geessu” jedhu ‘cubbuu duʼa geessisu’ jedhamees hiikamuu ni dandaʼa. Maarree ‘cubbuun duʼa geessisuu’ fi ‘cubbuun duʼa hin geessisne’ garaa garummaa maalii qabu?—1 Yohaannis 5:16.

 Kitaabni Qulqulluun cubbuun hundi duʼa akka geessisu ifatti dubbata. Haa taʼu malee furii Yesuus Kiristoosiin cubbuu fi duʼa jalaa ooluu ni dandeenya. (Roomaa 5:12; 6:23) Kanaaf, ‘cubbuu duʼa geessisu’ kan jedhame cubbuu furiin Kiristoos haguuguu ykn dhiifama argamsiisuufii hin dandeenye dha. Namni cubbuu akkasii raawwatu taʼe jedhee daandii cubbuu kan hordofu waan taʼeef, ilaalcha isaas taʼe gocha isaa jijjiiruuf matumaa fedhii hin qabaatu. Akkasumas Kitaabni Qulqulluun cubbuun akkasii “dhiifama hin argatu” jedha.—Maatewos 12:31; Luqaas 12:10.