Fakkeenya 30:1-33
30 Ergaa cimaa dubbii Aguur ilmi Yaaqee Itiʼeelittii fi Uukaalitti dubbate keessatti argamu.
2 Ani eenyu iyyuu caalaa beekumsa kan hin qabne dha,+Hubannaa namni tokko qabaachuu qabus hin qabu.
3 Ani ogummaa hin baranne,Beekumsa kan Isa Hundumaa Caalaa Qulqulluu sanaas hin qabu.
4 Gara samiitti kan ol baʼe, achiis kan gad buʼe eenyu?+
Barruu harka isaa lamaanii keessatti bubbee kan walitti qabe eenyu?
Uffata isaa keessatti bishaan kan mare eenyu?+
Guutummaa andaarota lafaa kan hundeesse* eenyu?+
Beekta yoo taʼe, maqaan isaa eenyu? Maqaan ilma isaa hoo eenyu?
5 Dubbiin Waaqayyoo hundi kan qulqulleeffame dha.+
Inni warra isatti kooluu galaniif gaachana.+
6 Dubbii isaa irratti homaa hin dabalin,+Taʼuu baannaan inni si ifata,Sobduu taʼuun kees ni mirkanaaʼa.
7 Ani wanta lama sin gaafadha.
Duʼuu koo dura wantoota kana na hin dhowwatin.
8 Wanta dhugaa hin taanee fi soba na irraa fageessi.+
Hiyyeessas taʼe sooressa na hin godhin.
Nyaatuma na gaʼu qofa naaf kenni,+
9 Kunis, quufee akkan si hin ganneef, akkasumas “Yihowaan eenyu?” akkan hin jenneef+Yookiin hiyyeessa taʼee hatuudhaan maqaa Waaqa kootii akkan hin salphisneefi.*
10 Tajaajilaa tokko gooftaa isaa biratti maqaa isaa hin balleessin,Taʼuu baannaan inni si abaara, atis yakkamaa taata.+
11 Dhaloonni abbaa isaa abaaru,Haadha isaas hin eebbisne jira.+
12 Dhaloonni qulqulluu akka taʼetti of ilaalu jira,+Taʼus xurii* isaa irraa hin qulqulloofne.
13 Dhaloonni ijji isaa of tuultuu taʼe,Ijji isaa akka malee of jajuudhaan ilaalus jira!+
14 Dhaloonni ilkaan isaa goraadee,Mangaagaan isaas halbee ittiin qalan taʼe jira;Dhaloonni kun rakkatoota lafa irraa,Hiyyeeyyii ilmaan namootaa gidduutti argamanis ni nyaata.+
15 Dhulaandhulli intaloota, “Nuu kennaa! Nuu kennaa!” jedhan lama qabdi.
Wantoonni hin quufne sadii jiru,Wantoonni matumaa, “Na gaʼa!” hin jenne afuri.
16 Awwaalaa*+ fi gadameessa maseena taʼe,Lafa bishaan dheebote,Akkasumas ibidda matumaa “Na gaʼa!” hin jenne.
17 Ija abbaatti qoosuu fi haadhaaf ajajamuu tuffatu,+Arraagessi sulula* keessa jiraatu isa ni baasa,Cuuciin risaas isa ni nyaata.+
18 Wantoonni hubannaa kootii ol taʼan* sadii jiru,Wantoonni ani hin hubanne afuri:
19 Karaa risaan samii irra itti barrisu,Karaa bofti qarsaa irra itti deemu,Karaa dooniin galaana irra itti deemu,Akkasumas karaa dhiirri shamarree wajjin itti deemu.
20 Karaan dubartii ejjituu kana dha:
Nyaattee afaan ishii erga haxaaʼattee booda,“Wantan balleesse hin qabu” jetti.+
21 Wantoonni lafa sochoosan sadii jiru,Wantoonni ishiin dandamachuu hin dandeenye afuri:
22 Yommuu garbichi mootii taʼee bulchu,+Yommuu gowwaan nyaata quufu,
23 Yommuu dubartiin jibbamte* abbaa manaa argattu,Akkasumas yommuu tajaajiltuun iddoo giiftii ishii fudhattu.*+
24 Wantoota hunda caalaa xixinnoo taʼan keessaa afur jiru,Taʼus isaan uumamumaan ogeeyyii* dha:+
25 Goondaan uumama* cimtuu miti,Taʼus yeroo bonaatti nyaata ishii qopheeffatti.+
26 Osoleen+ uumama* jabduu miti,Taʼus kattaa keessatti mana ishii tolfatti.+
27 Awwaannisoonni+ mootii hin qaban,Taʼus hundi isaanii hiriiraan* gara fuulduraatti deemu.+
28 Loccuun+ miila ishiitiin wanta hundumaatti maxxanti,Gara mana mootummaas ni seenti.
29 Wantoonni yommuu deeman nama ajaaʼibsiisan sadii jiru,Wantoonni yommuu sochoʼan nama ajaaʼibsiisan afuri:
30 Leenca isa bineensota hundumaa caalaa jabaa taʼe,Isa eenyu jalaa iyyuu hin baqanne,+
31 Saree adamoo, korbeessa reʼee,Akkasumas mootii raayyaan waraanaa isaa isaa wajjin jiru.
32 Gowwummaadhaan yoo ol of qabde+Yookiin akkana gochuuf yoo yaadde,Afaan kee qabadhu.+
33 Sababiin isaas, akkuma aannan raasuun dhadhaa baasu,Funyaan cuunfuunis dhiiga baasu,Aarii kakaasuun lola fida.+
Miiljaleewwan
^ Kal., “kan ol kaase.”
^ Ykn., “hin xureessineefi.”
^ Kal., “bobbaa.”
^ Ykn., “Siʼoolii,” jechuunis, bakka ilmaan namootaa hundi itti awwaalaman. Ibsa Jechootaa ilaali.
^ Ykn., “laga gogaa.”
^ Ykn., “baayʼee na dinqisiisan.”
^ Ykn., “hin jaallatamne.”
^ Ykn., “buutu.”
^ Ykn., “baayʼee ogeeyyii.”
^ Kal., “saba.”
^ Ykn., “saba.”
^ Ykn., “gareedhaan wal hiranii.”
