Ӕгас дунейы дӕр милуангай адӕм бӕрӕг кӕнынц Рождество. Ӕмӕ йӕ цӕмӕн бӕрӕг кӕнынц, уымӕн ис бирӕ аххосӕгтӕ. Иуӕй-иутӕ уарзынц уыцы изӕр ӕрвитын сӕ бинонтӕ ӕмӕ се ’мбӕлттимӕ. Иннӕтӕ та уыцы бон фӕхъуыды кӕнынц Хуыцауыл ӕмӕ баххуыс кӕнынц мӕгуыртӕн ӕмӕ, ӕххуыс хъуаг чи у, уыдонӕн. Кӕй зӕгъын ӕй хъӕуы, ахӕм хъуыддӕгтӕ раппӕлинаг сты. Фӕлӕ ацы бӕрӕгбоны, ахъуыды кӕнын кӕуыл хъӕуы, ахӕм хабӕрттӕ дӕр ис.

Фыццаг уый, ӕмӕ бирӕтӕ афтӕ ӕнхъӕлынц, ӕмӕ Рождество у Йесо Чырыстийы гуырӕнбон. Фӕлӕ историктӕн сӕ фылдӕр уыциу хъуыдыйыл хӕст сты, зӕгъгӕ, дам, цы бон райгуырд, уый ничи зоны. Чиныджы «Чырыстон дины фӕдыл фарстатӕ» фыст ис, «фыццаг чырыстӕттӕ Йесойы гуырӕнбон бӕрӕг кӕнынӕн цавӕрдӕр бон равзарыныл кӕй никуы сразы сты», уымӕн ӕмӕ сӕ нӕ фӕндыд, цӕмӕй сын «мӕнг хуыцӕуттӕн кувӕг адӕмы ӕгъдӕуттимӕ иумӕйагӕй исты уыдаид» (The Christian Book of Why). Банысан кӕнын хъӕуы уый, ӕмӕ Библийы никуы ис фыст, цӕмӕй Йесо искуы йӕхи кӕнӕ ӕндӕр искӕй гуырӕнбон бӕрӕг кодтаид. Уый нӕ, фӕлӕ йӕ фӕдылдзӕуджытӕн загъта, цӕмӕй йын бӕрӕг кодтаиккой йӕ мӕлӕты бон (Лукайы 22:19).

Дыккаг уый, ӕмӕ библииртасджытӕй бирӕтӕ разы кӕнынц, Рождествойы ӕгъдӕуттӕн сӕ фылдӕры чырыстон динимӕ иумӕйагӕй кӕй ницы ис ӕмӕ сӕ ратӕдзӕн кӕй ис мӕнг дины. Уымӕ хауы Санта-Клаус, омелӕ, назы бӕлас, кӕрӕдзийӕн лӕвӕрттӕ кӕнын, цырӕгътӕ судзын, назы къалиутӕ быдӕй, Рождествойы гимнтӕ, хъӕзтытӕ ӕмӕ хӕдзӕрттыл зилын. Уыцы ӕгъдӕутты тыххӕй иу чиныджы фыст ис: «Рождествомӕ кӕрӕдзийӕн лӕвӕрттӕ куы фӕкӕнӕм, нӕ хӕдзӕрттӕ ӕмӕ аргъуантӕ назы къалиутӕй куы срӕсугъд кӕнӕм, уӕд мӕнг хуыцӕуттӕн кувӕг адӕмы ӕгъдӕуттӕ кӕй фӕкӕнӕм, уый махӕй чи зоны?» (The Externals of the Catholic Church).

Фӕлӕ гӕнӕн ис, ӕмӕ бадис кӕнат: «Ацы ӕгъдӕуттӕ бынтон ӕвзӕр куы не сты». Ӕркӕсӕм ӕртыккаг хъуыддагмӕ. Хуыцауы зӕрдӕмӕ нӕ цӕуы, раст динимӕ куы схӕццӕ кӕнынц мӕнг дины ӕгъдӕуттӕ. Йегъовӕ Хуыцау рагон Израилы хивӕнд адӕммӕ арвыста пехуымпар Амосы ахӕм ныхӕстимӕ: «Уӕ бӕрӕгбӕттӕй ӕз ме сӕфт уынын, нӕ мӕ хъӕуынц! [...] Уӕ зарджыты хъӕлӕба... уын куыннӕуал хъусон» (Амос 5:21, 23).

Афтӕ карзӕй сын цӕмӕн загъта? Ӕркӕсӕм, рагон Израилы цӕгат паддзахады цӕрджытӕ цы куыстой, уымӕ. Сӕ фыццаг паддзах Иеровоам дыууӕ горӕты, Дан ӕмӕ Вефилы, сӕвӕрдта дыууӕ сызгъӕрин роды ӕмӕ адӕмы мӕнг диныл бафтыдта. Уый аххосӕй адӕм Иерусалимы кувӕндоны Йегъовӕйӕн нал куывтой, уый куыд фӕндыд, афтӕ. Паддзах ма бындур ӕрӕвӕрдта ӕндӕр бӕрӕгбӕттӕн дӕр ӕмӕ сауджынты дӕр сӕвӕрдта, цӕмӕй адӕмӕн ӕххуыс кодтаиккой уыцы бӕрӕгбӕттӕ бӕрӕг кӕнынӕн (1 Паддзӕхты 12:26–33).

Чи зоны, исчи зӕгъа, зӕгъгӕ, уыцы израилӕгтӕ афтӕ сӕ хорз зӕрдӕйӕ кодтой. Ӕцӕгдӕр, уыдӕттӕ уый тыххӕй кодтой, ӕмӕ сӕ фӕндыд Хуыцауӕн кувын ӕмӕ йын йӕ зӕрдӕ рухс кӕнын. Фӕлӕ сын Хуыцау Амос ӕмӕ иннӕ пехуымпарты уылты карзӕй куыд бауайдзӕф кодта, уымӕй бӕрӕг у, сӕ митӕм сын цы цӕстӕй касти. Малахийы уылты Хуыцау загъта: «Ӕз дӕн Йегъовӕ, ӕз нӕ ивын» (Малахи 3:6). Уӕдӕ, ацы ныхӕстӕй бӕрӕг нӕу, Хуыцау абон Рождествойы ӕгъдӕуттӕм цы цӕстӕй кӕсы?

Милуангай адӕм, уӕлдӕр цы хъуыддӕгтыл аныхас кодтам, уыдоныл куы ахъуыды кодтой, уӕд аскъуыддзаг кодтой, Рождество кӕй нал бӕрӕг кӕндзысты. Уыдон цин кӕнынц, сӕ бон кӕй у сӕ рӕстӕг се ’мбӕлттӕ ӕмӕ сӕ бинонтимӕ ӕрвитын ӕмӕ мӕгуыртӕн ӕмӕ, ӕххуысхъуаг чи у, уыдонӕн ӕххуыс кӕнын афӕдз ӕрмӕст иу бӕлвырд бон нӕ, фӕлӕ кӕцыфӕнды бон дӕр.