SUPONÉ ku un amigu ku bo ta atmirá masha tantu ta hasi algu ku bo no ta komprondé. Algun hende ta kritiká su akshon, duda den su intenshonnan i bisa ku e ta kruel. Lo bo bai di akuerdo mesora ku nan, òf lo bo ke skucha e vershon di bo amigu promé? Si e no t’ei pa splika su motibunan, lo bo warda ku pasenshi i dun’é benefisio di duda?

Promé ku tur kos, lo ta bon pa bo puntra bo mes: ‘Kon bon mi konosé mi amigu? Dikon mi ta atmir’é?’ Esei lo ta hustu, no ta bèrdat? Nos no por hasi meskos ora nos ta analisá e pregunta di si Dios ta kruel?

Podisé bo ta haña ku ta difísil pa komprondé algun di e kosnan ku Dios a hasi òf permití. Hopi hende lo bisa bo ku e ta kruel i nan por preshoná bo pa bo tambe kuestioná su intenshonnan. Lo bo dun’é benefisio di duda te ora bo sa mas di e asuntu? Esei lo dependé hopi di kon bon bo konosé Dios. Puntra bo mes: ‘Ki klase di amigu Dios ta pa mi?’

Si bo tin un bida duru, kisas lo bo bisa ku Dios no ta bo amigu mes. Pero pensa un ratu: Ta Dios ta kulpabel di e problemanan ku bo tin, òf mas bien e fuente di e bon kosnan di bo bida? Manera nos a mira kaba, “e gobernante di e mundu akí” ta Satanas. (Huan 12:31) Pues, ta é nos tin ku kulpa pa hopi di e miseria i inhustisia ku tin den e mundu akí. I bo no ta di akuerdo ku gran parti di nos problemanan ta debí na nos imperfekshon i sirkunstansianan imprevisto den bida?

En kambio, kiko Dios a hasi? Beibel ta bisa ku el “a traha shelu i tera”; ku su obranan ta inkluí e kurpa humano, kreá na un manera “maravioso,” i ku Yehova ta e Dios “den kende su man [nos] rosea di bida ta.” (Salmo 124:8; 139:14; Daniel 5:23) Kiko tur esaki ta nifiká?

Esaki ta nifiká ku ta danki na nos Kreador, nos tin rosea i bida. (Echonan 17:28) E ta nifiká tambe ku tur e kosnan bunita rònt di nos, e echo ku nos por stima i sera amistat i e goso di por purba, mishi, tende i hole, sí, tur e kosnan akí, ta regalo di Dios. (Santiago 1:17) Bo no ta di akuerdo ku tur e kosnan bon ei ta hasi Dios un Amigu ku meresé nos kariño i konfiansa?

Pero podisé te ainda bo ta haña ta difísil pa bo konfia den Dios. Tal bes bo ta pensa ku bo no konos’é sufisiente. Esei ta komprendibel. Den e artíkulonan kòrtiku akí nos no por trata tur e motibunan dikon algun hende ta haña ku Dios ta kruel. Pero no ta bale la pena hasi esfuerso pa siña konosé Dios mihó? * Bo por ta sigur ku si bo siña konosé Dios, lo bo siña e bèrdat tokante dje. Dios no ta kruel. Al kontrario: “Dios ta amor.”—1 Huan 4:8.