Si Mi Gusta Hende di Mesun Sekso ku Mi, Esei Ke Men Ku Mi Ta Homoseksual?

TOKA NA

Niun ora so!

E realidat ta ku hopi biaha e atrakshon na hende di e mesun sekso ta algu temporal.

Esei ta loke Lisette, di 16 aña, kende un tempu tabata gusta un mucha muhé, a bin realisá. El a bisa: “Den mi lèsnan di biologia na skol mi a siña ku un adolesente su nivel di hormona ta varia hopi. Mi tin sigur ku si hóbennan siña konosé nan kurpa mihó, nan lo komprondé ku e atrakshon na hende di mesun sekso ku nan ta algu temporal, i nan lo no sinti ku nan mester bira homoseksual.”

Tur hóben tin ku tuma un desishon—sea nan tin e mesun punto di bista degradá di e mundu akí tokante sèks òf nan ta biba segun e normanan moral haltu ku tin den Dios su Palabra

Pero awor, kiko si bo ta sinti ku bo atrakshon na hende di mesun sekso ku bo no ta djis algu temporal? Bo ta haña ku Dios ta sin kompashon ora e bisa bo pa keda leu for di homoseksualidat?

Si bo ta kere ku sí, e ora ei ta importante pa bo sa ku e pensamentu ei ta basá riba un idea robes ku hende tin: Hopi hende ta pensa ku nos tin ku bai tras di nos impulsonan seksual. Pero Dios sa ku sernan humano ta muchu mas kapas ku esei. Su Palabra ta sigurá nos ku nos por skohe pa keda sin bai tras di impulsonan seksual robes.—Kolosensenan 3:5.

E punto di bista di Beibel no ta irasonabel. E ta djis bisa esnan ku gusta hende di mesun sekso ku nan pa hasi meskos ku loke Dios ta eksigí di esnan ku gusta hende di e sekso opuesto, esta, pa “hui di fornikashon.” (1 Korintionan 6:18) Tin miónes di hende ku gusta hende di e sekso opuesto ku tambe mester dominá nan deseonan si nan ke biba segun norma di Beibel, apesar di kualke tentashon ku nan por haña nan kuné. Pues, esnan ku gusta hende di mesun sekso ku nan tambe por dominá nan deseonan si di bèrdat nan ke hasi Dios kontentu.—Deuteronomio 30:19.