نئیں۔ خدا دی بادشاہی کوئی احساس نئیں جیہڑا مسیحیاں دے دلاں وچ ہووے۔‏ a بائبل چ خدا دی بادشاہی نُوں اسمان دی بادشاہی کہیا گیا اے جدے توں پتہ چلدا اے کہ ایہہ بادشاہی حقیقت چ کتھے وے۔ (‏متی 4:‏17‏)‏ آؤ ویکھئے کہ بائبل چوں کیویں ثابت ہوندا اے کہ خدا دی بادشاہی اِک حقیقی حکومت اے جیہڑی اسمان تے وے۔‏

•   اِک حقیقی حکومت وانگوں خدا دی بادشاہی دے وے قانون نیں، ایہدی رعایا اے تے ایہدے بادشاہ وی نیں۔ نالے ایہنوں اسمان تے زمین اُتے خدا دی مرضی پوری کرن دا اِختیار دِتا گیا اے۔—‏متی 6:‏10؛‏ مکاشفہ 5:‏10‏۔‏

•   خدا دی بادشاہی زمین دِیاں ساریاں قوماں تے زباناں دے لوکاں تے حکمرانی کرے گی۔ (‏دانی‌ایل 7:‏ 13، 14‏)‏ ایس حکومت نُوں حکمرانی کرن دا اِختیار ایہدی رعایا نے نئیں سگوں خدا نے دِتا اے۔—‏زبور 2:‏4-‏6؛‏ یسعیاہ 9:‏7‏۔‏

•   یسوع مسیح نے اپنے رسولاں نُوں دَسیا کہ اوہ اوہدے نال اسمان دی بادشاہی دے وارث ہون گے تے اوہ تختاں تے بیٹھن گے۔—‏لُوقا 22:‏28،‏ 30‏۔‏

•   خدا دی بادشاہی دے کجھ دُشمن نیں جنہاں نُوں ایہہ ہلاک کر دے گی۔—‏زبور 2:‏1، 2،‏ 8، 9؛‏ 110:‏1، 2؛‏ 1-‏کُرنتھیوں 15:‏25، 26‏۔‏

 بائبل چ ایہہ تلیم نئیں دِتی گئی کہ اسمان دی بادشاہی اِک بندے دے دل وچ ہوندی اے۔ پر بائبل توں ایہہ ضرور پتہ چلدا اے کہ بادشاہی بارے پیغام دا یاں ایہدے بارے خوشخبری دا ساڈے دلاں تے گُوڑھا اثر ہونا چاہی دا اے۔—‏متی 13:‏19؛‏ 24:‏14‏۔‏

کجھ لوک ایہہ کیوں سوچدے نیں کہ خدا دی بادشاہی دل وچ اے؟‏

 کجھ لوکاں نُوں ایس گل بارے غلط‌فہمی اے کہ خدا دی بادشاہی کتھے وے۔ اوہ سمجھدے نیں کہ لُوقا 17:‏21 چ یسوع ایہہ کہہ رہیا سی کہ خدا دی بادشاہی انسان دے دل وچ اے۔ ایس ایت نُوں سمجھن لئی ایہدے اَگے پچھے دِیاں ایتاں تے غور کرنا ضروری اے۔‏

 اصل چ یسوع ایہہ گل فریسیاں نُوں کہہ رہیا سی۔ ایہہ مذہبی پیشواواں دا اِک گروہ سی جنہے یسوع دی مخالفت کیتی سی تے اوہنوں قتل کران دا منصوبہ بنایا سی۔ (‏متی 12:‏14؛‏ لُوقا 17:‏20‏)‏ ذرا سوچو کہ کیہہ خدا دی بادشاہی واقعی ایہو جہے لوکاں دے دلاں چ سی جیہڑے یسوع دے جانی دُشمن سن؟ اِک واری یسوع نے فریسیاں نُوں کہیا سی کہ تُسی دوغلے تے بُرائی نال بھرے ہوئے انسان او۔—‏متی 23:‏27، 28‏۔‏

 سو خدا دی بادشاہی ایس لحاظ نال فریسیاں دے وچ سی کیونکہ خدا دی بادشاہی دا بادشاہ یسوع مسیح اوہناں دے درمیان کھلوتا ہویا سی۔—‏لُوقا 1:‏32، 33‏۔‏