خدا چاہندا اے کہ تُسی اوہنوں اِک ایہو جہی ہستی سمجھو جدے نال تُسی پکی دوستی کر سکدے او۔ اوہدی خواہش اے کہ تُسی اوہنوں پورے دل نال پیار کرو تے اوہدی خدمت کرو۔ (‏متی 22:‏37، 38؛‏ یعقوب 4:‏8‏)‏ تُسی یسوع مسیح دی زندگی تے تلیم توں خدا دی مرضی تے چلنا سکھ سکدے او۔ (‏یوحنا 7:‏16، 17‏)‏ اوہناں نے صرف لوکاں نُوں ایہہ سکھایا ای نئیں سی کہ خدا دی مرضی کیہہ اے سگوں خدا دی مرضی تے چل کے وی وکھایا ۔ اوہناں نے کہیا کہ مَیں اپنی مرضی کرن نئیں سگوں اوہدی مرضی تے چلن آیا واں جنہوں مینوں گھلیا اے۔—‏یوحنا 6:‏38‏۔‏

کیہہ خدا کسے معجزے یاں رُویا دے ذریعے مینوں دَسے گا کہ میرے لئی اوہدی مرضی کیہہ اے؟‏

 نئیں، کیونکہ ایہہ گل اوہدے کلام چ دَسی گئی اے کہ انساناں لئی اوہدی مرضی کیہہ اے۔ بائبل چ اوہ ساریاں گلاں دَسیاں گئیاں نیں جیہڑیاں سانوں ہر چنگے کم لئی تیار کر سکدیاں نیں۔ (‏2-‏تیمُتھیُس 3:‏16، 17‏)‏ پر خدا چاہندا اے کہ تُسی بائبل پڑھن دے علاوہ اپنی سوچن سمجھن دی صلاحیت نُوں وی استمال کرو۔ اِنج تُسی جان سکو گے کہ تواڈے لئی اوہدی مرضی کیہہ اے۔‏‏—‏رومیوں 12:‏1، 2؛‏ اِفسیوں 5:‏17‏۔‏

کیہہ مَیں واقعی خدا دی مرضی تے چل سکنا واں؟‏

 جی بالکل، کیونکہ بائبل چ لکھیا اے کہ خدا دے حکم ساڈے لئی بوجھ نئیں۔ (‏1-‏یوحنا 5:‏3‏)‏ ایہدا مطلب ایہہ نئیں کہ خدا دے حکماں نُوں مننا ہمیشاں اسان ہوندا اے۔ پر تُسی خدا دے حکم منن لئی جیہڑیاں کوششاں کرو گے، فائدے اوہناں نالوں کِتے زیادہ ہون گے۔ یسوع مسیح نے کہیا:‏ اوہ انسان برکت والا اے جیہڑا خدا دے کلام نُوں سُن دا تے اوہدے تے عمل کردا اے۔—‏لُوقا 11:‏28‏۔‏