¿Pigunara ahua pachama rinun?
Biblia cutipashca
Biblia ricuchin masna tupu Jesusta chuyaj catijcunara Dios ajllashca huañushca huasha, ahua pachai causanuchu (1 Pedro 1:3, 4). Ajllashca tucushca huasha, shinzhi quirina charishcara Diosta chuyaj shunguras ricuchisha catina anun, chita mana rurasha ahua pachai mana causana ushanunga (Efesios 5:5; Filipenses 3:12-14).
¿Imara ahua pachai ruranunga?
Cai ajllashca runauna Jesushua pariju huaranga huataunai apuuna, sacerdotegunas tucununga (Apocalipsis 5:9, 10; 20:6). Paiguna ahua pachamanda cai Allpara mandanunga. Cai apuuna yanapanunga runauna ucha illaj, Diosta ali sirvisha cushi causanuchu pai callarimanda munashca cuinta (Isaías 65:17; 2 Pedro 3:13).
¿Masna tupura ahua pachama rinunga?
Biblia nin 144.000 runauna ahua pachai causangaj causachishca anunga (Apocalipsis 7:4). Shu ricurinai, apóstol Juan shu ‘Burigura Sión urcui shayajta ricuca. Paihua pariju shu patsaj chuscu chunga chuscu huaranga runauna tianauca’ (Apocalipsis 14:1-3; Juan 1:29; 1 Pedro 1:19). Cai Sión urcu ricuchin Yaya Dios Jesusta, 144.000 ajllashca runaunaras ahua pachai mandangaj shu atun puistura cushca (Salmo 2:6; Hebreos 12:22).
Cristohua Diospa Reinoi mandangaj, cai ‘cayashcaunara, ajllashcaunaras’ Biblia nin “ichilla muntun runauna” ashcara (Apocalipsis 17:14; Lucas 12:32). Cai ricuchin ansalla ajllashca runauna ahua pachama rinunga, astaun ashca shuj Jesusta catijcunara Biblia nin shuj buriguuna ashcara (Juan 10:16).
Ahua pachama rijcunamanda panda iyaiguna
Huaquinguna quirinun: Tucui ali runauna ahua pachama rinun nisha.
Biblia sirtu yachachina: Yaya Dios rimashca cuinta ashca ali shungu runauna cai Allpai causangaj saquirinunga (Salmo 37:11, 29, 34).
Jesús nica: “Pihuas ahua pachama mana sicacachu” (Juan 3:13). Cai shimiunahua ali intindichica ali shungu runauna imasna Abrahán, Moisés, Job, David huañushcai ahua pachama mana rinuca (Hechos 2:29, 34). Paiguna cai Allpai causangaj cuti causarina chapanara charinuca (Job 14:13-15).
Ahua pachai causangaj cuti causarinara Biblia nin ‘ñaupa causarina’ ashcara (Apocalipsis 20:6). Cai ricuchin shuj causarina cai Allpai tianara.
Biblia yachachin Diospa Reino cai Allpara mandashcai “ña huañuna illanga” (Apocalipsis 21:3, 4). Ahua pachai mana ima huras huañui tiashca, chimanda cai rimashcauna allpamanda riman.
Huaquinguna quirinun: Caran shu ahua pachai, cai Allpai causanara ajllana ushan nisha.
Biblia sirtu yachachina: Dioslla ajllan maican paita chuyaj sirvijcunara ‘ahua pachama cayana’ cuyanara cungaj (Filipenses 3:14). Cai intindichin Dioslla ajllana ushan pi ahua pachama rinara, mana ajllana ushanchi maibi causangaj ñucanchi quiquin munashcamandalla (Mateo 20:20-23).
Huaquinguna quirinun: Ahua pachai causangaj dirichu mana charijcunalla cai Allpai huiñai causangaj chapanara charinun nisha.
Biblia sirtu yachachina: Allpai huiñai causangaraujcunara Dios nin “ñuca llacta”, “ñuca ajllashcauna”, “Jehovamanda bendiciashcauna” (Isaías 65:21-23). Paiguna Yaya Dios punda sumaj munashcara pactachinunga: cai Allpa shu paraíso tucushcai ucha illaj asha huiñaigama causanunga (Génesis 1:28; Salmo 115:16; Isaías 45:18).
Huaquinguna quirinun: Apocalipsis libroi 144.000 quillcashca número shu ejemplolla an nisha.
Biblia sirtu yachachina: Cai libroi numerogunara shu ejemplo cuinta utilizashas huaquin numeroguna sirtu anun. Shu ejemplo Apocalipsis libroi “Burigu chunga ishqui cachashca runauna shutira” riman, cai chunga ishqui shutiuna sirtu anun (Apocalipsis 21:14). Shuj ejemplogunara ricushun 144.000 número sirtu ashcara yachangaj.
Apocalipsis 7:4 nin ‘sellura churashcaunara yupashcara 144.000’ anuca, paiguna ahua pachama ringaj ajllashcauna anun, chi rimashca huashalla “shu ashca atun muntun runaunara [...] mana yupaihuajta” riman. Cai ashca atun muntun runaunas quishpichishca anunga (Apocalipsis 7:9, 10). Cai textogunai ishqui muntunmanda rimanmi, shinajpi 144.000 número mana sirtu ajpi, shu muntunlla tianma, mana ishqui. a
Shinallara 144.000 Dios ajllashcaunamanda Biblia nin: “caiguna runaunamanda randishcaunami anauca, shu yura ñaupa punda aparij muyuuna cuinta” (Apocalipsis 14:4). “Punda aparij muyuuna” nisha ricuchin, chi ajllashcauna Diospa sirvijcunamanda ansalla parti anun. Paiguna ahua pachai Cristohua mandanunga cai Allpai causangarauj mana yupaihuaj muntun runaunara (Apocalipsis 5:10).
a Robert Thomas yachachij runa Apocalipsis 7:4, 144.000 numeromanda rimasha caita quillcaca: “Cai versículo sirtu numeromanda riman, maspas capítulo 7:9 shu muntunmanda riman. Cai número mana sirtu ajpi mana quirina ushashun Apocalipsis libroi ricurij numeroguna sirtu ashcara” (Revelation 1-7: An Exegetical Commentary [Comentario exegético de Revelación 1-7], página 474).
Cai temagunaras leana munanguichari
ENSEÑANZAS IMPORTANTES DE LA BIBLIA
Diospa Reino ¿imara an?
Jesús Diospa Shimimanda yachachisha puriushcaiga Diospa Reinomandami mas yali yachachica. Ñaupa huatamanda cunangama, Jesusta ali catijcuna oraciombi mañanushca chi Reino shamuchu nisha.
BIBLIAMANDA YACHACHISHCAUNA
Shu yachachijhua Bibliamanda yachana
Shu yachachijhua gratis Bibliamanda yachai.