Hechos 17:1-34
17 Anfipolis llaqtantawan Apolonia llaqtanta rispankum Tesalonica+ llaqtaman chayarurqaku, chaypim karqa judiokunapa huñunakunanku wasi*.
2 Pablom sapa kuti ruwasqanman hina+ paykunapa kasqanman yaykurqa, hinaspam Diospa palabranmanta yachachispan kimsa samana punchawpuni* paykunata yuyaymanachirqa.+
3 Diospa palabranta qawachispanmi entiendechirqa Cristo* ñakarinanmanta+ hinaspa kawsarimunanmanta,+ hinaspam nirqa: “Kay qamkunaman willasqay Jesusqa Cristom”, nispa.
4 Chayraykum wakinkuqa iñikuspanku Pablomanwan Silasman hukllawakurqaku,+ hukllawakurqakutaqmi Diosta yupaychaq griego rimayniyuq achkallaña runakunapas chaynataq riqsisqa achkallaña warmikunapas.
5 Judiokunañataqmi piñakuruspanku+ huñururqaku mana imata ruwaspa plazapi puriq mana allin runakunata, hinaspam llaqtapi runakunata chaqwachirqaku. Paykunam Jasonpa wasinman suwa hina yaykuruspanku Pablotawan Silasta llapa runakunaman hurqumuytapuni munarqaku.
6 Chaymi mana tarispanku Jasonta hinaspa wakin iñiqkunata pampanta aysarqaku llaqtapi autoridadkunaman kaynata qayaykachakuspanku: “Kay runakunaqa tukuy hinastinpim chaqwata ruwachkanku hinaspam kaymanpas hamurunku.+
7 Jasonpas wasinpim samaykachin. Llapallankum kay runakunaqa nichkanku Jesusqa kamachiq kasqanta, chaynata nispankum Roma nacion kamachiqpa* kamachikuy qusqanpa contranpi kachkanku”, nispa.+
8 Chayta uyariruspankum llapa runakunaqa llaqtapi autoridadkunapiwan mancharikurqaku,
9 Jasonmantawan wakinkumanta qullqita chaskikuykuspankuñataqmi kachaykurqaku.
10 Chayllam iñiqkunaqa Pablotawan Silasta tutallan Berea llaqtaman aviarurqaku. Chayaruspankum paykunaqa judiokunapa huñunakunanku wasiman yaykurqaku.
11 Tesalonicapi kaqkunamantapas mastaraqmi Bereapi kaqkunaqa yachayta munarqaku. Paykunaqa yachaykuyta munaspankum Diospa palabranta sumaqta uyarirqaku, hinaspam willasqanku chiqap kasqanta yachayta munaspanku Diospa palabranta sapa punchaw allinta estudiaqku.
12 Chayraykum paykunamanta kaqkunaqa achkallaña iñikurqaku, iñikurqakutaqmi Grecia nacionniyuq riqsisqa achkallaña warmikunapas chaynataq wakin qarikunapas.
13 Tesalonica llaqtapi judiokunam yacharurqaku Diospa palabranmanta Berea llaqtapipas Pablopa willakusqanmanta, chaymi riruspanku runakunata hikutarqaku hinaspam paykunapa contranpi hatarinankupaq chaqwachirqaku.+
14 Hinaptinmi iñiqkunaqa chaylla Pablota lamar quchapa patanman pasachirqaku,+ Silaswan Timoteom ichaqa hina chayllapi qipakurqaku.
15 Pablota pusaqkunaqa Atenas llaqtakamam pusarqaku, chaypim paykunata Pablo kamachirqa Silaswan Timoteo+ paypa kasqanman chaylla hamunankupaq, hinaptinmi chay pusaqkunaqa pasarqaku.
16 Atenas llaqtapi paykunata Pablo suyachkaspanmi qawarqa llaqtapi achkallaña taytacha-mamachakuna kasqanta, hinaspam sunqullanpi rabiarqa.
17 Chaymi judiokunata hinaspa Diosta yupaychaq wakin runakunata huñunakunanku wasipi yachachispa yuyaymanachirqa, chaymantapas sapa punchawmi yuyaymanachirqa plazapi tupasqan runakunatapas.
18 Yachaysapa wakin epicureokunawan estoicokunam Pablowan rimaspanku atipanakuyta qallaykurqaku, wakinmi nirqaku: “¿Imatam kay yanqa rimaq runaqa niyta munachkan?”, nispanku. Wakinñataqmi nirqaku: “Huklaw llaqta runakunapa diosninkumanta willakuqchusmi payqa”, nispanku. Chaynataqa nirqaku Jesusmanta hinaspa wañuqkuna kawsarimunanmanta sumaq willakuyta willakusqanraykum.+
19 Chaymi hapiruspanku Areopagoman* pusarqaku, hinaspam nirqaku: “¿Yaqachu willawankikuman kay rimasqayki musuq yachachikuymanta?
20 Qamqa mana haykapipas uyarisqaykumantam willakuchkanki. Chayraykum yachayta munaniku chaykuna ima kasqanta”, nispa.
21 Atenas llaqtayuq llapallan runakuna hinaspa chaypi kaq forasterokunaqa samananku tiempopim imapas mana yachasqanku kaqkunata uyariyllapi chaynataq rimayllapi kaqku.
22 Hinaptinmi Pabloqa Areopagopa+ chawpinpi sayaykuspan nirqa:
“Atenas llaqtayuq qarikuna, qawasqayman hinaqa qamkunaqa wakin runakunamantapas astawanmi taytacha-mamachakuna yupaychaqllaña kasqankichik.+
23 Yupaychanaykichik kaqkunata allinta qawastin purichkaspaymi huk altartapas* tarirurqani, chaypim kayna qillqasqa kasqa: ‘Mana riqsisqa Diospaq’, niq. Chaymi ñuqaqa mana riqsichkaspa yupaychasqaykichik Diosmanta willachkaykichik.
24 Kay pachata hinaspa kay pachapi tukuy ima kaqkunatapas unanchaq+ Diosqa manam runakunapa ruwasqan wasipichu yachan*, payqa hanaq pachapipas kay pachapipas kamachiqmi.+
25 Payqa llapallan runakunamanmi qun vidata, samayta+ hinaspa tukuy imakunatapas, chaymi runakunawanqa mana atiendechikunchu imatapas necesitachkanman hinaqa.+
26 Huk runallamantam rikurichirqa+ tukuy nacionpi llapallan runakunata chaynapi enteron kay pachapi yachanankupaq,+ churarqam akllasqa tiempokunatapas, señalarqataqmi runakuna maypi yachasqankutapas.+
27 Chaynapi Diosta maskanankupaq, llachpaykachakuq hina maskaspankupas chiqaptapuni tarinankupaq,+ payqa manam llumpay karupichu ñuqanchikmantaqa kachkan.
28 Pay kaptinmi kawsanchik, purinchik hinaspa kay pachapipas kachkanchik, takikuna ruwaq llaqtamasikichikkunapas ninkum: ‘Ñuqanchikqa Diospa churinkunam kanchik’, nispanku.
29 Diospa churinkuna kachkaspanchikqa+ Diosmantaqa manam piensananchikchu qurimanta, qullqimanta utaq rumimanta ruwasqa kaqkunaman rikchakusqantaqa, chaykunaqa runakunapa piensasqanman hina ruwasqallam.+
30 Diosqa manamá kaqpaqpas hapirqachu runakunapa mana yachachkaspa ruwasqankutaqa,+ kunanmi ichaqa tukuy hinastinpi llapallan runakunata nichkan huchankumanta wanakunankupaq.
31 Diosqa huk punchawtam akllarun kay pachapi runakunata allinta juzgananpaq,+ chaytaqa ruwanqa akllasqan runawanmi. Llapallan runakuna chayta creenankupaqmi wañusqanmanta payta kawsarirachimun”, nispa.+
32 Kawsarimuymanta uyariruspankum wakinkuqa paymanta burlakuyta qallaykurqaku,+ wakinñataqmi nirqaku: “Kay rimasqaykikunataqa hukpiñayá uyarisqaykiku”, nispanku.
33 Chaymi Pabloqa paykunapa kasqanmanta pasakurqa.
34 Wakin qarikunam ichaqa payman hukllawakuspanku iñikurqaku, hukninmi karqa Dionisio, payqa karqa Areopago cortepi juezmi, iñikurqataqmi Damaris sutiyuq warmipas chaynataq hukkunapas.
Willakuykuna
^ Utaq: “Sinagoga”.
^ Utaq: “Sabadopuni”.
^ Utaq: “Diospa akllasqan runa”.
^ Utaq: “Cesarpa”.
^ Kayqa karqa ñawpaq tiempopi kaq Atenas llaqtapi muqum, chaypim hatun corte karqa.
^ Qaway kay palabrapa ima ninan kasqanta.
^ Utaq: “Tiyan”.
