1. Rosiisaancho 7:20 kultanno garinni Moote Selemooni hiikkonne halaale coyiˈrino?

 MOOTE Selemooni togo yee borreessino: “Mitte soˈrono assikkinni, woˈmanka woyite dancha looso calla loosannohu baattote aana mittuno dino.” (Ros. 7:20) Tini halaaleho! Ninke baalunku cubbaataammaho. (1 Yoh. 1:8) Hakko daafira, ninke baalunkura Maganunna mannu maaro hasiissannonke.

2. Lubbote jaalikki gatona yiihero mayi macciishshamannohe?

² Mitto lubbote jaalakki koffi assootto yaanna qaagattoha ikkara dandaanno. Coye biddi assanna isi ledo noohe jaalooma haaroonsiˈra hasiˈrootto daafira, godowinta maaro xaˈmiˈritto; hakkiinni gatona yiiheta mayi macciishshamihe? Dihagiidhootto? Ee lowo geeshsha hagiidhootto!

3. Konni birxichira maa ronseemmo?

³ Yihowa lubbote Jaalanke ikkara hasiˈneemmo; ikkollana mito woyite coyiˈneemmorinni woy assineemmorinni koffi assinammosira dandiineemmo. Ikkollana Yihowa gatona yaankera quqquxamannota huluullammeemmokkihu mayiraati? Yihowa leellishanno maaronna ninke leellinsheemmo maaro mereero noo badooshshi maati? Qoleno Yihowa maaro afidhannori ayeooti?

4. Yihowa gatona yaate qixxaawinoha ikkinota huluullammeemmokkihu mayiraati?

⁴ Maganu Qaali, Yihowa gatona yaate qixxaawinoha ikkinota kulanno. Yihowa Siina Ilaalira Musera ayimmasi xawisisi woyite, mittu sokkaasinchi widoonni togo yiino: “Ani Kaaliiqi maareemmohonna hanqoho muddameemmokkiho; mararaancho Maganooti; ammanamaˈyanna bagamannokkihu baxilliˈya batiˈraho. Bagamannokkihu baxilliˈya kumunni kiirranni ilamara iillanno; sao, sarxonna cubbo agureemmo.” (Ful. 34:6, 7) Yihowa shaqqadohonna maaranno Maganooti; isi cubbo loosse maaro eˈannore gatona yaate woˈmanka woyite qixxaawinoho.—Neh. 9:17; Far. 86:15.

5. Faarso 103:13, 14 kultanno garinni Yihowa mannu ooso daafira baalankare afasi ma assanno gede assitannosi?

⁵ Kalaqaanchonke ikkino daafira Yihowa ninke daafira baalankare afino. Hanni hedi! Isi baattote aana noohu mittu mittunku manchi daafira baalankare afino. (Far. 139:15-17) Hakko daafira annuwinkenna amuuwinkewiinni ragiˈnoommoti guuntete xeˈne noonketa afino. Wole agurina isi heeshshonke giddo iillinonkeri hiittoore ikkineemmo gede assinonkero afino. Yihowa mannu ooso daafira baalankare afasi ma assanno gede assitannosi? Maarannonke gede assitannosi.—Far. 78:39; Faarso 103:13, 14 nabbawi.

6. Yihowa gatona yaate quqquxamannota leellishinohu hiittoonniiti?

⁶ Yihowa gatona yaate quqquxamannota leellishino. Isi umi manchi Addaami assinorinni ninke baalunku cubbonna reyo ragiˈnoommota afino. (Rom. 5:12) Cubbunninna reyotenni ninkeneetono ikko woloota gatisa dandiineemmo doogo dino. (Far. 49:7-9) Ikkollana baxillaanchu Maganinke mararinonke daafira, cubbuyinna reyotenni wolaphineemmo faro faninonke. Isi tenne assinohu hiittoonniiti? Yohaannisi 3:16 kultanno garinni Yihowa ninke daafira yee reyara mitto Beettosi soyino. (Mat. 20:28; Rom. 5:19) Yesuusi iso ammanannota loosunni leellishannoha baalanka cubbunninna reyotenni wolassate ninkera yee qarrame reyino. (Ibi. 2:9) Yihowa baxanno Beettisi qarramenna sholle reyanna lai woyite lowo geeshsha  xissiisiˈrinoti dihuluullissannote! Addanko, Yihowa ninke maara hasiˈrannokkiha ikkoommero baxanno Beettisi reyara difajjanno.

7. Qullaawu Maxaafi giddo Yihowa gatona yiinonsa manni xagge leellishannohu mitu lawishshi hiikkonneeti?

⁷ Qullaawu Maxaafi giddo, Yihowa cubbonsa gatona yiino manniti batinye xagge no. (Efe. 4:32) Konni manni giddo kiˈne aye qaagginanni? Moote Minaase qaagginanniha ikkara dandaanno. Hakku bushu manchi Yihowa albaanni jawa cubbo loosino. Isi kaphu maganna magansiˈrino; wolootuno hatto assitanno gede jawaachishino. Minaase oososi nafa kaphu magannara kakkalo asse shiqishino. Isi wole agurina Yihowahu qullaawu mini giddo kaphu maganna misilla worino. Qullaawu Maxaafi, Minaase “Kaaliiqa hanqissannota lowo bunshe [loosinota]” kulanno. (2 Dud. 33:2-7) Ikkirono isi addinta maaro eita Yihowa maarinosi. Wole agurina Maganu isi galagale moote ikkanno gede assinosi. (2 Dud. 33:12, 13) Qoleno Moote Daawiti qaagginoonniha ikkara dandaanno; isi Yihowa albaanni jawa cubbo loosino; lawishshaho foorino hattono lubbo shiino. Ikkollana Daawiti soˈrosi ammane addu maaro eita Yihowa isono gatona yiinosi. (2 Sam. 12:9, 10, 13, 14) Addanko, Yihowa gatona yaate quqquxamannota dihuluullammeemmo. Qoleno aanchine ronseemmonte gede Yihowa leellishanno maaro mannu leellishanno maaronni baxxitinote.

8. Yihowa baxxino daanya ikkasi maaranno gede assitannosihu hiittoonniiti?

⁸ Yihowa gobba baalate ‘gashshaanchooti’ woy Daanyaati. (Kal. 18:25) Worbu daanyi seeru mayyaannoro seekke afa hasiissannosi. Yihowa Seera kulannonkehanna Daanyanke ikkino daafira seera seekke afinoti dihuluullissannote. (Isa. 33:22) Yihowa geeshsha garanna gara ikkinokkire seekke afinohu mittuno dino. Worbu daanyi afa hasiissannosiri woluri maati? Yoo yaara albaanni halaale ikkitinota woˈma mashalaqqe afa hasiissannosi. Yihowa woˈmanka woyite halaale ikkinore baalankare afanno daafira isi gedee daanyi dino.

9. Yihowa mitto mancho maarannohu woy giwannohu maa afino daafiraati?

⁹ Yihowa mannu gedee daanya diˈˈikkino; isi baalunku coyi daafira halaale ikkinore seekke afanno. (Kal. 18:20, 21; Far. 90:8) Yihowa yoo yaannohu mannu gede lainorinni woy macciishshinorinni calla diˈˈikkino. Isi, mittu manchi akati, lophino garinna heeˈranno qooxeessi hattono fayyimmasi gari, assootesi hunara woy seekkara dandaannota seekke afino. Qoleno Yihowa mannu wodanita afanno. Isi mittu mittunku manchi mitto coye assannohu mayiraatiro woˈmunni woˈma afanno. Yihowa albinni goˈlannori mitturino dino. (Ibi. 4:13) Yihowa mittu manchira gatona yaannohu baalankare afino daafiraati.

10. Yihowa woˈmanka woyite taalo yoo yaanno yineemmohu mayiraati? (Marro 32:4)

¹⁰ Yihowa woˈmanka woyite taalo yoo yaanno. Isi horonta dimallaadanno. Yihowa mittu manchira gatona yaannohu danasi, jironna maccaha ikkasi woy dandoosi lae diˈˈikkino. (1 Sam. 16:7; Yai. 2:1-4) Ayino Yihowa mitto coye assanno gede xixxiiwa woy gubbo oye doga didandaanno. (2 Dud. 19:7) Isi caaccaawe woy hanqe muddame yoo diyaanno. (Ful. 34:7) Yihowa ninke daafira baalankare seekke afinohura isi gedee Daanyi dino.—Marro 32:4 nabbawi.

11. Yihowa maaro baxxitaahu mayinniiti?

¹¹ Ibiraawootunnita Qullaawa Borro borreessituri Yihowa maaro baxxitinota ikkitinota  wodanchitino. Mitte borro xawissino garinni, kuri borreessaano “mite basera horoonsidhinohu Ibiraawootu Afii qaali Maganu cubbaataammaho leellishanno maaro calla kulannoho; kuni qaali mannu ooso mimmitoho leellishshannota dannu noo maaro kulannoha diˈˈikkino.” Cubbo loosse maaro eˈannore woˈmunni woˈma gatona yaate silxaane noosihu Yihowa callaati. Ikkina Yihowa maaro kaaˈlitannonkehu hiittoonniiti?

12-13. (a) Yihowa maaro kaaˈlitannonkehu hiittoonniiti? (b) Yihowa maaro mageeshshite?

¹² Yihowa maarinonketa ammannummoro ‘haarooˈmineemmo yanna’ daggannonke; hattono giddoyiidi keerenna keeraancho tiia afiˈneemmo. Togoo maaro afiˈneemmohu Maganu maarinkero callaati. (Soq. 3:19, 20) Yihowa gatona yiinkero cubbo loonsoommokkihu gede asse kiire, isi ledo noonke jaalooma woˈmunni woˈma haaroonsanno.

¹³ Yihowa mitte hige gatona yiinkehu gedensaanni, loonsoommo cubbo wirro dikayisanno woy hakko cubbira diqorichishannonke. (Isa. 43:25; Erm. 31:34) Yihowa cubbonke “Soojjaati galchimiwiinni fafinohu geeshsha . . . fafisanno.” * (Far. 103:12) Yihowa maaro mageeshshi geeshsha batiˈratero hiincinummoro, galanteemmorenna naandeemmore ikkineemmo. (Far. 130:4) Ikkina Yihowa gatona yaannohu ayeooraati?

14. Aleenni ronsummonte gede Yihowa mittu manchira gatona yaannohu woy giwannohu mayiraati?

¹⁴ Aleenni ronsummonte gede, Yihowa maarannohu cubbu deerra lae diˈˈikkino. Qoleno Yihowa mittu manchira gatona yaannohu woy giwannohu, Kalaqaanchonke, Seera aannonkehanna Daanyanke ikkinohura, baalankare afino daafira ikkinota ronsoommo. Yihowa mittu manchira gatona yaannohu woy giwannohu maa laeeti?

15. Luqaasi 12:47, 48 kultanno garinni, Yihowa laˈˈannohu mittu coyi maati?

¹⁵ Umihunni, Yihowa mittu manchi cubbo loosinohu afanni heeˈreetinso afikkiitiro laˈˈanno. Yesuusi Luqaasi 12:47, 48te tenne  daafira xawise kulino. (Qummeeshsha nabbawi.) Mittu manchi afanni heeˈreenni Yihowa dadillisannoha busha coye assiro, kuni jawa cubbooti. Togoo manchi Yihowa maaro afiˈra hoogara dandaanno. (Maq. 3:29; Yoh. 9:41) Noore coyiˈniro kayinni mito woyite gara ikkinokkire assineemmohu anfanni heeˈneeti. Ikkina togoo woyite Yihowa maaro afiˈra dandiineemmo? Ee dandiineemmo! Korkaatuno Yihowa laˈˈannohu wolu coyino no.

16. Maaro eate yaa mayyaate? Yihowa gatona yaankera hasiˈnummoro maaro ea hasiissannonkehu mayiraati?

¹⁶ Layinkihunni, Yihowa cubbo loosino manchi addinta maaro einoronna teˈee laˈˈanno. Maaro eate yaa mayyaate? Maaro eate yaa ‘mittu manchi hedosi, akatasinna assootesi biddi assiˈrate’ yaate. Qoleno cubbo loosino manchi loosinohu bushu coyira woy assikki gatinohu danchu coyira gaabbate woy lowo geeshsha dadillate. Maaro eino manchi dadillannohu busha coye assino daafira calla ikkikkinni, assootisi Yihowa ledo noosi jaalooma huninosi daafiraati. Moote Minaasenna Daawiti jawa cubbo loossinota qaango; kayinni insa addinta maaro eˈino daafira Yihowa gatona yiinonsa. (1 Mot. 14:8) Ee Yihowa gatona yaate addinta maaro eˈnoonnitanna teˈee laˈˈanno. Ikkollana loonsoommo cubbira gaabba calla diˈˈikkitanno. Bushare agurre danchare assateno qixxaamboommore ikka hasiissannonke. * Yihowa laˈˈannohu wolu coyi konneeti.

17. Soorramate yaa mayyaate? Wirro cubbo loonseemmokki gede soorrama hasiissannonkehu mayiraati? (Isayaasi 55:7)

¹⁷ Yihowa laˈˈannohu lowo geeshsha hasiisannohu wolu coyi soorramate. Soorramate yaa busha assoote agurre Yihowa biddishshi garinni heeˈrate yaate. (Isayaasi 55:7 nabbawi.) Cubbo loosino manchi hedosi biddi assiˈre Yihowa hedo garinni heeˈra hasiissannosi. (Rom. 12:2; Efe. 4:23) Isi alba hedannoha busha coyenna assootesi agurate murciˈra hasiissannosi. (Qol. 3:7-10) Hige Yihowa gatona yaannonkehunna cubbunni keereensannonkehu  Kiristoosita wodote kakkalo ammanneemmo daafiraati. Yihowa assootenke biddi assiˈrate addinta sharrammanni heeˈnoommota laˈˈanno woyite wodote kakkalo widoonni gatona yaannonke.—1 Yoh. 1:7.

18. Yihowa maaro daafira maa ronsoommo?

¹⁸ Hanni kageeshsha ronsoommota mite qara hedo xaphi assine laˈno. Yihowa gatona yaate kalqete alame giddo taalle dinooho. Togo yineemmohu mayiraati? Umihunni isi woˈmanka woyite gatona yaate qixxaawinoho. Layinkihunni isi ninke seekke egennino. Yihowa ninke daafira baalankare afino; hattono addu maaro eˈnoommotanna teˈee seekke afanno. Sayikkihunni Yihowa woˈmunni woˈma gatona yaannonke; hattono cubbo loonsoommokkihu gede asse kiiranno. Tini keeraancho tiia afiˈneemmonna iso hagiirsiinseemmo gede assitannonke.

19. Guuntete xeˈne noonkere ikkinoommo daafira cubbo loosanke gattannokkiha ikkirono hagiidha dandiineemmohu mayiraati?

¹⁹ Guuntete xeˈne noonkere ikkinoommo daafira cubbo loosanke digattanno. Ikkirono, Qullaawa Borro Seekke Huwata (Ingilizete afoo) yaanno maxaafa, Xiraaze 2 qoola 771 noo hedo sheshifachishshannonke; togo yitanno hedo no: “Yihowa soqqamaanosi laanfe shaqqillunni laˈˈanno daafira, insa guuntete xeˈne noonsa daafira loossino soˈronni yaaddanni heeˈra dihasiissannonsa. (Fa 103:8-14; 130:3) Insa Maganu hasiˈranno garinni heeˈrate dandiiture baala assitu geeshsha hagiidha dandiitanno! (Fil 4:4-6; 1Yo 3:19-22).” Tini jawaachishshanno hedooti!

20. Aananno birxichira maa ronseemmo?

²⁰ Yihowa loonsoommo cubbira addinta maaro eˈnummoro, gatona yaate qixxaawinoha ikkinota afanke hagiirsiissannonke. Ikkina ninkeno gatona yaate isi lawishsha harunsa dandiineemmohu hiittoonniiti? Yihowa leellishanno maaronna mannu leellishanno maaro mereero noo xaadooshshi maati? Badooshshinsa maatiyya? Tenne bande afanke hasiissannohu mayiraati? Aananno birxichira kuri xaˈmuwara dawaro afiˈneemmo.