ʻOti le Vaega Lea

20 Auala e Maua ai le Taimi

“Ia outou savavali pea ma le atamai . . . ia outou faaaogā tatau le taimi.”​—Kolose 4:5.

PE A e iloa au galuega e te manaʻo e fai i lea aso ma lea aso, o le luʻi e lē na o le mafaufau e fai ae ia faatino. O fautuaga o loo mulimuli mai e ono fesoasoani iā te oe e fai ai faapea.

1 FAI SE LISI O MEA E FAI I ASO TAʻITASI. Faatulaga mea e fai e tusa ai o le auala o le a faatinoina ai. Ia faailoa galuega e lelei ona faaaogā i ai le taimi. Ia faailoga galuega taʻitasi pe a māeʻa. Tuu galuega e leʻi uma i le lisi o feʻau o le isi aso.

2 IA FAATUTUSA AU KALENA. Aua neʻi misia sau fuafuaga na tuu e fai ona o loo faamau le aso i le isi kalena. Pe afai e iai sau kalena i lau komepiuta ma le isi i lau tamaʻi masini feaveaʻi, vaai pe mafai ona faatutusa mea o loo i kalena e lua.

3 TUSI SE “FAASOLOGA” O MEA E FAI e aofia ai laasaga uma i le faia o se galuega, ma fai faasolosolo lelei.

4 O LE TULAGA MASANI, E FAAMUAMUA GALUEGA E SILI ONA TĀUA. O le a faigofie atu ona maua le taimi e fai ai mea e lē tāua tele.

5 FAATUTŪ NI SINI TALAFEAGAI. E sili atu ona faigofie le taumafai e faaleleia ou tomai i se galuega patino, nai lo le taumafai e avea oe ma pule o se galuega.

6 IA ILOA E LĒ MAFAI ONA FAI MEA UMA I LE TAIMI E TASI. Afai e mafai, ia fai le tele o galuega e maua ai iʻuga e sili ona lelei. Ae faapefea isi galuega e manaʻomia vave po o galuega e tatau lava ona fai? Afai e lē mafai ona e tuuesea pe tuu atu i isi, vaai pe mafai ona itiiti se taimi e fai ai. O galuega e lē tāua tele e mafai ona tuu mo ni masina pe a talafeagai ai, pe atonu foʻi e lē manaʻomia ona fai. Faaaogā le tele o le taimi e mafai ai i le faia o galuega aogā e fesootaʻi atu i ou sini.

7 AUA NEʻI TELE NAʻUĀ MEA E FAI. Pe a fuafua e fai uma i se aso e tasi le faatauga o meaʻai, fai le taavale, valaaulia ni mālō, matamata i se ata, faitau faauma se tusi—o le a e vevesi solo ma atonu e leai sou fiafia e maua ai.

8 FAAFAIGOFIE GALUEGA. Pe e sili atu ona tāua mea e 2 mai mea e 10 o loo i lau lisi o mea e fai? Pe e mautinoa o le a uma se galuega pe a e uaʻi atu i vala e sili ona tāua o lea galuega?

 9 FAAITIITIA MEA E FAALAVELAVEA AI. Ia tuu ese se taimi i aso taʻitasi e te lē manaʻo e faalavelave mai ai se tasi seʻi vaganā se mea e matuā talafeagai lava. Afai e mafai, ia tapē lau telefoni i lenā taimi. E lē gata i lea, ia tapē foʻi ma feʻau e sau i le komepiuta pe afai e faalavelavea ai lau galuega.

10 IA FAATULAGA GALUEGA FAIGATĀ I LE TAIMI O LE ASO E SILI ONA E MALOSI MA MATAALA AI.

11 IA FAI MUAMUA GALUEGA E TE FĀʻATU E FAI. E uma loa ona fai, o le a e lagona le malosi e fai ai galuega faigofie.

12 IA FAAAVANOA SE TAIMI MO MEA FAAFUASEʻI E TULAʻI MAI. Pe afai e te manatu e te taunuu i se nofoaga i le 15 minute, taʻu atu o le a e i inā i le 25 minute. Afai o lau fuafuaga na fai ma se isi e alu ai le itula e tasi, ia tuu i ai le itula ma le 20 minute. Tuu ese se vaega o le aso e lē faatulagaina ai se mea e fai.

13 IA FAAAOGĀ TAIMI PAGANOA. Faalogologo i tala fou po o ni mea na puʻe a o sele lau ʻava. Faitau a o faatali pe tiʻetiʻe foʻi i se nofoa afi. Faaaogā lenā taimi e mālōlō ai. Ae aua le faamaʻimauina ona toe moomoo lea i taimi ua mou atu.

14 FAAMAUMAU AU MEA NA FAI. Ina ia iloa mea na faaaogā i ai lou taimi, ia faamaumau au mea na fai i le vaiaso po o le lua vaiaso. Pe na maʻimau le tele o le taimi i gaoioiga lē tāua? Po o le tele o taimi, o le tagata lava lenā e toʻatasi pe toʻalua foʻi na faalavelave ane i au galuega? Pe e foliga mai e ono faalavelave mai iā te oe i se taimi patino o le aso po o le vaiaso? Ia tuu ese galuega e lē masani ona fai e maʻimau ai le taimi.

15 PE A TELE NAʻUĀ GALUEGA, tusi e tofu le fasi pepa ma le galuega. Ona vavae lea i vaega e lua: “Galuega o le Asō” ma “Galuega Taeao.” Ia toe faia faapea a taeao.

16 MAI LEA TAIMI I LEA TAIMI IA SEMA SE TAIMI E ‘MĀLŌLŌ AI.’ O le toe foʻi atu i le galuega ma se mafaufau ma se tino ua toe faafouina, e sili atu ona lelei galuega e fai ai, i lo le tele o itula e ovataimi ai.

17 IA TUSI I LALO OU MANATU. Tusi i lalo le faafitauli, ma faamatala le māfuaaga ua e atuatuvale ai, ma ia tusi i lalo le tele o vaifofō ua e mafaufau i ai.

18 AUA LE FAI MEA SASALU. Ia iloa le taimi e tuu ai le isi gaoioiga ae fai le isi gaoioiga e sili atu ona tāua.

19 IA GALUE MA LE FILIGĀ. Aua e te faatali seʻiloga e te manaʻo e fai se galuega. Ia galue loa.

20 IA FETUUTUUNAʻI. O fautuaga uma na, ae lē o ni tulafono. Ia faataʻitaʻi, ma vaai po o le ā le mea e sili ona lelei, ma fetuunaʻi manatu i lou tulaga ma manaʻoga e tulaʻi mai.