“Ua Ou Mana‘o e Ta te Tete‘a!”
“Ua Ou Manaʻo e Ta te Teteʻa!”
O se fale ua foliga tuulafoaʻia ma lē vaaia lelei. Na feagai ma afā i le tele o tausaga, ma ua leaga nisi o vaega. O lea ua lē o toe malosi ai, ma ua foliga mai ua toeitiiti lava paʻū.
O LE ata lenā o le tele o faaipoipoga i aso nei. Pe na iai se taimi na e lagona ai ua aga atu lau faaipoipoga i se tulaga faapena? Ia e iloa e leai se ulugalii e asa ma ni faafitauli. O le mea moni, ua taʻu mai e le Tusi Paia o i latou e faaipoipo e oo i ai “tigā ma faanoanoaga.”—1 Korinito 7:28, The New English Bible.
I le faamatilatilaina o le moni o na upu, sa faamatalaina ai e se vaega o tagata suʻesuʻe e faapea, o le faaipoipoga o se “mea e sili ona lamatia ua filifilia e le toʻatele o tagata.” Na latou toe faapea mai: “E amata mai o se mafutaga fiafia ma le faataunuuina o mea na moemiti i ai, ae ua avea ma mea e lē fiafia ma tigā ai le olaga o se tagata.”
O faapeʻī lau faaipoipoga? Po o mātaulia i se uiga po o uiga e pei ona taʻua i lalo?
● Tauupu soo
● Fai upu tutui
● Lē faamaoni
● Loto tigā
Pe afai e foliga mai ua i se tulaga faalētonu lau faaipoipoga ma ua lata ina malepe, o le ā e ao ona e fai? Po o le vaifofō le teteʻa? *
[Faaopoopoga i lalo]
^ pala. 10 Po o le “tatala o le faaipoipoga.”
[Pusa/Ata i le itulau 3]
“SA SEĀSEĀ TUPU AE UA TUPU SOO”
Ua faatupulaʻia ulugalii teteʻa i nisi o atunuu. Seʻi manatu i le Iunaite Setete lea sa lē taatele ai le teteʻa o ulugalii. Ina ua mavae le 1960, na tusi Barbara Dafoe Whitehead i lana tusi, The Divorce Culture, e faapea, “na matuā oso i luga le aofaʻi o ulugalii teteʻa.” Na ia faapea mai: “Na faaluaina le numera pe tusa o le sefulu tausaga mai lenā taimi ma na faaauau pea ona alu i luga seʻia oo i le tau amatamataga o vaitausaga mai le 1980, ma ua tumau ai i lenā numera maualuga i atunuu papalagi e lelei le tamaoaiga. O le iʻuga ua oo i ai ona o lenā tulaga, o teteʻaga sa seāseā tupu ae ua tupu soo i totonu o le 30 tausaga i Amerika.”