Ia Faaaogā Tatau Lou Taimi

“E iai le taimi e atofaina mo mea uma.”—Failauga 3:1.

INA ia faaaogā le taimi i mea tāua, e ao ona e iloa po o ā na mea. O le a faigofie pe a e malamalama lelei i mea e tāua, o ou sini, ma gaoioiga e lagolagoina ai na sini.

Muamua, ia manino mea e tāua ia te oe. E te ono tusi i lalo mea tāua uma e oso aʻe i lou mafaufau e pei o le aiga, faauōga, galue mamafa, aʻoaʻoga ma mea ua faataunuuina, le lalelei o foliga, tupe, fiafiaga, faaipoipoga, agalelei, soifua mālōlōina ma le mālōlōina faaleagaga. Ona fesili ifo lea iā te oe, ‘O fea o nei mea e sili ona tāua ia te aʻu?’

Pe a uma lenā, ona mafaufau lea i sini uma e te manaʻo e faataunuu i le olaga. O le ā le eseesega o mea e tāua ma sini? O le fuafuaga o lenei mataupu, e mafai ona tatou faapea atu, o mea e tāua e faaauau pea, ae o sini, e iai le taimi e faataunuu ma faamuta ai.

O ā ni sini o e manaʻo e faatutū? Pe e te manaʻo e tele se taimi e māfuta ai ma lou aiga? Pe saʻili se galuega e sili ona talafeagai? Pe faaleleia ou tomai i se mea e sili ona e fiafia e fai i ou taimi paganoa? Pe saʻili se isi mea fou e fai i ou taimi paganoa? Pe atiaʻe se uiga patino? Pe ave ni aso mālōlō? Faitau se tusi? Pe tusi se tusi?

 Ona sosoo lea ma le filifili po o fea o nei sini e sili ona tāua iā te oe. Ia faamautinoa e talafeagai ma mea o loo e faatāuaina. O se faataʻitaʻiga, pe a fai sou sini ia e mauʻoa, e foliga mai la o le a iai ni luʻi i lou olaga.

O lea la, o sini ua e filifili e fai, ia mafaufau i ni gaoioiga e fesoasoani e faataunuu ai sini taʻitasi. O se faataʻitaʻiga, afai o se tasi o ou sini o le faapaʻū o ou pauna, ia fai se gaoioiga e faataunuu ai.

E Fesoasoani Faapefea Nei Iloiloga iā te Oe?

Pe a fetaui ou sini ma mea e te faatāuaina, ma faia mea e ausia ai ou sini, o le a sologa lelei la fuafuaga o lou olaga. O le a faaaogā le taimi i mea e tāua iā te oe. O le mea moni, e lē faapea ai e te lē o manatu i manaʻoga o isi. (Filipi 2:4) O lona uiga o le a e iloa ma teena mea e lē aogā moni.

O le mea moni, o le a iai ni faafitauli. O nisi o galuega atonu e lē tāua tele ae e aogā lava. Atonu e alu ai lou aso o fai, ae ua itiiti po ua leai se taimi mo mea e sili ona tāua. E tulaʻi mai ni mea e tutupu faafuaseʻi. Ma o suiga i lou olaga e ono lē paleni ai lau faasologa. Ae o le faaaogā tatau o le taimi i mea e sili ona tāua, o le a pulea lelei ai lou taimi i lenei olaga.

 [Pusa i le itulau 14]

PE E MAFAI E MASINI ONA FAASAO LE TAIMI?

E faasao ai le taimi o isi ae maʻimau ai le taimi o isi. O se faataʻitaʻiga o se tagata e iai sana tamaʻi masini e iai se kalena, se lisi o numera o telefoni ma tuatusi, lisi o mea e fai, se polokalame e tusi ai tusi, se tamaʻi tusi e fai ai faamaumauga, se mea puʻeata, ma e maua ai le imeli ma le Initaneti. E mafai ona e faaaogā se na masini e faasao ai le taimi pe a tausia pea le fou o faamatalaga o iai ma alu ma ave. Ae peitaʻi, e faigofie lava ona faamaʻimau le taimi pe a taumafai e fetuunaʻi pe autilotilo ai i isi polokalame o loo iai, po o le faaaogā foʻi i se auala ua lē faia ai ni fesootaʻiga tāua po o tiute tauave.

Fautuaga: Ia iloilo lelei a o leʻi faatauina. Afai e leaga soo le masini, e tele le taimi e toe faalelei ai. E lē gata i lea o le masini e lē tumau pea lona aogā. O lea la, afai e iai sau masini, ia faaaogā e faasao ai le taimi, ae lē o le faamaʻimau ai.

[Pusa i le itulau 14]

PE E TE MANAʻO I SE TAIMI FAAOPOOPO?

E faafia ona mafai ona fai mea e tāua moni iā te oe?

◯ I aso uma

◯ I faaiʻuga o vaiaso

◯ E seāseā

A o faagasolo se aso, pe e te

◯ Faia mea ua e faatulaga e fai?

◯ Faia au gaoioiga masani lea ua aafia ai au fuafuaga?

◯ Faia i le taimi lava lenā mea e manaʻomia e tulaʻi mai?

A o faagasolo se aso, pe e te lagona

◯ Ua e puleaina tulaga na iai?

◯ Na omia oe e fai mea na manaʻomia e isi?

◯ Ua fetosoaʻiina oe i le tele o le mau feʻau?

I le iʻuga o le aso, po ua e

◯ Faataunuuina mea e tāua?

◯ Faaumaina se galuega sa tatau ona fai, ae leʻi lelei?

◯ Iloa ua lē mafai ona fai mea e sili ona tāua?

O ā ou lagona e masani ona iai i le iʻuga o le aso?

◯ Faamalieina ma ua aogā

◯ Lē aogā, vaivai, ma popole

◯ Lē fiafia

[Ata i le itulau 12, 13]

Pe mafai ona faaaogā lelei le taimi i mea e sili ona tāua?