Sondzela KuNkulunkulu

Kungenteka Yini Kutsi Nkulunkulu Atisole?

TIKHULU 2:11-18

NJENGEBANTFU labanesono, ngaletinye tikhatsi siyatisola. Sibonelo saloku kutsi singahle sitisole ngemuva kwekucaphela kutsi sente liphutsa. Kuyamangalisa kutsi liBhayibheli litsi Jehova kuyenteka atisole. Ungahle utsi: ‘Kodvwa Nkulunkulu ute sono, futsi akawenti emaphutsa’ Utisola ngayiphi indlela Nkulunkulu? Imphendvulo yalombuto ingasisita sicondze intfo letsite lesimanga: Jehova unemiva, futsi naloko lesikwentako kuyamtsintsa. Ase ucabange ngemavi labhalwe encwadzini yeTikhulu 2:11-18.

Incwadzi yeliBhayibheli yeTikhulu ikhuluma ngesikhatsi lesasimatima kakhulu emlandvweni wema-Israyeli. Lesive sasesihlala eKhenani, live Nkulunkulu abelitsembise Abrahama. Emakhulwini eminyaka lalandzela, ema-Israyeli abesolo enta emaphutsa lafananako: abehlubuka, acindzetelwa nguletinye tive, acela lusito kuNkulunkulu futsi awasite. a

Kuhlubuka. Ahungwe bantfu baseKhenani, ema-Israyeli ‘amfulatsela Jehova’ ahamba ayewukhonta labanye bonkulunkulu. Ecinisweni, ‘abekhonta boBhali nabo-Ashtarothe.’ b Kufulatsela kwawo Jehova kwaphumela ekuhlubukeni. Akumangalisi kutsi ema-Israyeli ‘amtfukutselisa Jehova,’ Nkulunkulu lowawakhulula eGibhithe!—Emavesi 11-13; Tikhulu 2:1.

Kucindzetelwa. Atfukutsele kufanele, Jehova abesusa sivikelo sakhe kubantfu labebamfulatsele, ngemva kwaloko ‘bebawela etandleni tetitsa tabo,’ letatifika tiphange live.—Livesi 14.

Kucela lusito. Acindzeteleke kakhulu, ema-Israyeli abetisola ngekwenta lokubi akhale acele lusito kuNkulunkulu. Kucela kwawo kubonakala kulamavi latsi “sebakhaliswa kucindzetelwa nakushaywa titsa tabo.” (Livesi 18) Ngemuva kwekwephula umyalo waNkulunkulu, tikhatsi letinyenti abekhala acele lusito kuye. (Tikhulu 3:9, 15; 4:3; 6:6, 7; 10:10) Yini Nkulunkulu labeyenta ngemuva kwaloko?

Kukhululwa. Jehova abekuva kukhala kwema-Israyeli futsi ‘atisole.’ Ligama lesiHebheru lelihunyushwe ngekutsi ‘kutisola,’ lingasho “kushintja umcondvo nobe tisusa.” Lenye incwadzi itsi: “Jehova nakeva kukhala kwema-Israyeli, abeshintja umcondvo angasawajezisi kodvwa awakhulule.” Ngemusa wakhe, Jehova ‘abewavusela tikhulu’ letatiwakhulula etitseni tawo.—Livesi 18.

Ukunakile yini lokwakubangela Nkulunkulu kutsi atisole nobe ashintje umcondvo? Abebangelwa kushintja kwebantfu bakhe endleleni yabo yekucabanga. Ase ucabange nje ngaloku: Babe lonelutsandvo angajezisa umntfwana wakhe lowonako, mhlawumbe ngekumgodlela emalungelo latsite. Kodvwa nakabona kutsi umntfwana wakhe uyatisola, lobabe angakhetsa kumcolela.

Yini lesiyifundzako ngaJehova kulendzaba? Nobe sono lesentiwe ngemabomu simtfukutselisa, bantfu labaphendvuka ngalokusuka enhlitiyweni bamenta abonise umusa. Kwati kutsi lesikwentako kuyayitsintsa imiva yaNkulunkulu kusenta sicabangisise. Kungaba njani utinike sikhatsi sekufundza kutsi ‘ungamjabulisa njani’ Jehova? (Taga 27:11) Angeke utisole ngekwenta njalo.

[Imibhalo lengentasi]