Linjani Lizulu?

LABANYE bantfu bacabanga kutsi angeke sekwenteke kutsi bati ngelizulu ngobe kute lowake wehla avela khona atewusitjela ngalo. Kungenteka kutsi sebakhohliwe ngaloko lokwashiwo nguJesu ngalesikhatsi atsi ‘wehla avela ezulwini.’ (Johane 6:38) Kulabanye bafundisi waphindze watsi: “Nine navela phansi, mine ngavela etulu.” (Johane 8:23) Yini Jesu layisho ngelizulu?

Jesu wavuma kutsi lizulu yindzawo lapho Jehova ahlala khona. Wabita Nkulunkulu ‘ngaBabe losezulwini.’ (Matewu 12:50) Kodvwa Jesu wasebentisa leligama lelitsi ‘lizulu’ ngemicondvo leminyenti. Nangu lomunye walemicondvo: Jesu wakhuluma ngesibhakabhaka ‘njengelizulu’ nakatsi: “Bukani tinyoni [telizulu].” (Matewu 6:26, NW) Nobe kunjalo, Jehova uhlala ngale kwesibhakabhaka. LiBhayibheli litsi: “Nkulunkulu uhleti esihlalweni sebukhosi etikwembulunga lengumhlaba.”—Isaya 40:22.

Uhlala netinkhanyeti yini ‘Babe losezulwini’? EmiBhalweni leNgcwele, emazulu labonakalako nawo kutsiwa ‘lizulu.’ Nasi sibonelo: Umhlabeli wabhala: ‘Nangibuka etulu [emazulwini] akho ngibona umsebenti wetandla takho, inyanga netinkhanyeti lotimisile, ngitsi: “Pho, umuntfu abeyini-ke kutsi ungadzimate umkhumbule?”’—Tihlabelelo 8:3, 4.

Njengobe nembati angahlali ekhatsi ekhabetheni lalakhako, Nkulunkulu Jehova akudzingeki naye ahlale ekhatsi esibhakabhakeni lasidalile. Ngako-ke, iNkhosi Solomoni nayinikela lithempeli eJerusalema yatsi: “Kodvwa vele, Nkulunkulu angahlala yini emhlabeni? Emazulu, ngisho nalo lizulu leliphakeme kunawo onkhe emazulu, ungeke wenele kulo. Kangakanani-ke lelithempeli lengikwakhele lona!” (1 Emakhosi 8:27) Nangabe Jehova angahlali kulelizulu lelibonakalako, nguliphi kantsi lizulu lahlala kulo?

Nanobe bantfu basebentisa tipopolo letinemandla kute bafundze ngemazulu labonakalako, labanye badzimate baya ngisho nakulamanye emapulanethi, kodvwa loko lokushiwo liBhayibheli solo kuliciniso: “Kute lowase wabona Nkulunkulu.” (Johane 1:18) Jesu wachaza kutsi loko kwentiwa yini, nakatsi: “Nkulunkulu ungumoya.”—Johane 4:24.

Umoya luhlobo lwekuphila lokusezingeni lelingetulu kunelwebantfu. Umoya awakhiwa tintfo lesingatitsintsa futsi sitibone, njengenyama nengati. Ngako-ke, Jesu nakatsi abehlala eceleni kwaBabe wakhe ‘ezulwini,’ abesho kutsi abenekuphila lokukhatimula ngetulu kwanobe nguluphi luhlobo lwekuphila. (Johane 17:5; Filiphi 3:20, 21) Lendzawo Jesu abephila kuyo njengesidalwa semoya naBabe wakhe inguloko liBhayibheli lelikubita ngekutsi, ‘lizulu.’ Linjani lizulu? Kwentiwani khona?

 Indzawo Yemsebenti Lojabulisako

LiBhayibheli lichaza lizulu njengendzawo lapho kwentiwa khona umsebenti lomnyenti. Litsi kunetingilosi letitinkhulungwane tetinkhulungwane letihlala khona. (Danyela 7:9, 10) Ngasinye saletidalwa temoya sinebuntfu baso lobehlukile kuletinye. Sikwati njani loko? Kuyo yonkhe indalo lesiyibonako, kute tintfo letimbili letiphilako letifanana ncamashi. Ngako singaciniseka kutsi nasezulwini kunekungafanani lokunyenti. Kuyabonakala kutsi letidalwa tasezulwini letinebuntfu lobungafanani, tisebentisana ngebunye. Loku kwehluke kakhulu kulesikubona emhlabeni, lapho khona kungakavami kutsi bantfu basebentisane kahle.

Asewunake kutsi liBhayibheli liwuchaza njani umsebenti wasezulwini. “Dvumisani Simakadze [Jehova], nine tingilosi takhe, nani machawe lanemandla, nine labenta livi lakhe, nilalele kukhuluma kwelivi lakhe. Dvumisani Simakadze, nine mabandla akhe nonkhe, nani tikhonti takhe letenta intsandvo yakhe.” (Tihlabelelo 103:20, 21) Ngako-ke, munyenti umsebenti lowentiwa ezulwini. Singaciniseka kutsi ngumsebenti lowenetisako.

Tingilosi tinemlandvo lomudze wekusebenta ngekujabula, losuka emuva le umhlaba usengakadalwa. Ngekusho kwemiBhalo, ngesikhatsi Jehova adala umhlaba emadvodzana aNkulunkulu ‘abehlabela kanyekanye’ futsi ‘ahlatjeleliswa kujabula.’ (Jobe 38:4, 7) Lenye yemadvodzana aNkulunkulu yabuye yaba nelilungelo lekusebenta naNkulunkulu ekudalweni kwato tonkhe tintfo. (Kholose 1:15-17) Lokuchazwa kwemsebenti lojabulisako wasezulwini, kungakwenta ube nemibuto engcondvweni mayelana nelizulu nebantfu.

Bantfu Bebadalelwe Kuya Ezulwini Yini?

Njengobe tingilosi betikhonta Nkulunkulu ezulwini usengakadalwa umhlaba, bantfu bekucala, bo-Adamu na-Eva, bebangakadalelwa kuhlala ezulwini. Kunaloko, Nkulunkulu watsi kubo: “Talanani, nandze, nigcwalise umhlaba.” (Genesisi 1:28; Imisebenti 17:26) Adamu abewekucala kuba neluhlobo lolusha lwekuphila kwasemhlabeni, amati Nkulunkulu futsi amkhonta ngekwetsembeka. Abetawuba nguBabe webantfu labebatawuhlala emhlabeni. “Emazulu ayindzawo yaSimakadze [Jehova], yena yedvwa, kodvwa umhlaba wawuniketela kubantfu.”—Tihlabelelo 115:16.

Akukavami kutsi bantfu bafise kufa, ngobe akutsandzeki kubo. Nkulunkulu wakhuluma ngekufa ku-Adamu njengalokusijeziso sekungalaleli. Kube Adamu walalela, abengeke afe.—Genesisi 2:17; Roma 5:12.

Akusetfusi kutsi Nkulunkulu kute lakusho ku-Adamu ngekuya ezulwini. Ngako-ke, umhlaba bewungeke ube yindzawo yekuvivinya bantfu kute kubonakale kutsi bakulungele yini kuphila ezulwini. Umuntfu abedalelwe kuphila emhlabeni phakadze futsi lenjongo yaNkulunkulu isetawugcwaliseka. LiBhayibheli letsembisa kutsi “labalungile bayawudla lifa lemhlaba, bahlale kulo kuze kube phakadze.” (Tihlabelelo 37:29) Kuyacaca kutsi bantfu bebangakadalelwa kuya ezulwini. Kungani-ke Jesu etsembisa baphostoli bakhe kuyewuphila ezulwini? Abesho kutsi bonkhe bantfu labalungile bayawuphila ezulwini yini?