Paseka ke mokete oo Bajuda ba neng ba o etsetsa Jehova ka mora hore a ba lokolle bokgobeng Egepeta ka selemo sa 1513 pele ho mehla ya rona. Modimo o ile a laela Baiseraele hore ba hopole ketsahalo eo ya bohlokwa selemo se seng le se seng ka la 14 kgweding ya Bajuda ya Abibe eo hamorao e ileng ya bitswa Nisane.​—Exoda 12:42; Levitike 23:5.

Ke hobaneng ha letsatsi leo le bitswa Paseka?

Lentswe “Paseka” le bolela nako eo Modimo a neng a sireletsa Baiseraele koduweng ya Egepeta e ileng ya bolaya matsibolo a bona. (Exoda 12:27; 13:15) Pele Modimo a tlisa kotlo ena e tshosang, o ile a laela Baiseraele hore ba fafatse madi a konyana kapa a podi e hlabilweng menyakong ya bona. (Exoda 12:21, 22) Ha Modimo a bona madi ao, o ne ‘a tla feta’ mme a sireletse matsibolo a bona.​—Exoda 12:7, 13.

Paseka e ne e ketekwa jwang mehleng ya Bibele?

Modimo o ile a fa Baiseraele ditaelo tsa ho keteka Paseka ya pele. * Tse ding tsa dintho tse neng di etswa nakong ya Paseka tse boletsweng ka Bibeleng di akaralletsa tse latelang.

• Sehlabelo: Ka la 10 Abibe (Nisane) malapa a ne a kgetha konyana kapa podi e nang le selemo, mme ka la 14 e be ba e hlaba. Ka Paseka ya pele, Bajuda ba ile ba fafatsa madi dikoseneng tse pedi tsa monyako le karolong e ka hodimo ya monyako, ba besa phoofolo e felletse, yaba ba e ja.​—Exoda 12:3-9.

• Dijo: Baiseraele ba ne ba boetse ba ja bohobe bo sa lomoswang le meroho e babang e le karolo ya dijo tsa Paseka.​—Exoda 12:8.

• Mokete: Baiseraele ba ne ba keteka Mokete wa Mahobe a sa Lomoswang matsatsi a supileng ka mora Paseka, e leng nako eo ba neng ba sa je bohobe bo lomositsweng.​—Exoda 12:17-20; 2 Likronike 30:21.

• Thuto: Batswadi ba ne ba sebedisa nako ya Paseka ho ruta bana ba bona ka Jehova Modimo.​—Exoda 12:25-27.

• Leeto: Baiseraele ba ne ba nka leeto le yang Jerusalema ho ya keteka Paseka.​—Deuteronoma 16:5-7; Luka 2:41.

• Tse ding tsa ditlwaelo: Mehleng ya Jesu, veine le mmino di ne di ba teng moketeng wa Paseka.​—Matheu 26:19, 30; Luka 22:15-18.

Seo ba bang ba se nahanang ka Paseka

Seo ba bang ba se nahanang: Bakreste ba tshwanetse ho keteka Paseka.

Nnete: Ka mora hore Jesu a keteke Paseka ka la 14 Nisane ka selemo sa 33, o ile a qala ntho e ntjha e leng: Dijo tsa Shwalane tsa Morena. (Luka 22:19, 20; 1 Bakorinthe 11:20) Dijo tsena di nketse Paseka sebaka ka ha ke sehopotso sa “Kreste Paseka ya rona” ya entsweng sehlabelo. (1 Bakorinthe 5:7) Sehlabelo sa Jesu sa thekollo se phahametse Paseka hobane sona se lokolla batho bokgobeng ba sebe le lefu.​—Matheu 20:28; Baheberu 9:15.