Olaga i te Kāiga mo vā Fakataugasoa
E tokouke a tino e faigata ki a latou ke fakatumau se fesokotakiga ‵lei mo olotou kāiga mo taugasoa. Ke onoono ki nisi fakatakitakiga mai te Tusi Tapu kolā e mafai o fesoasoani atu ke momea aka te ‵lei o tou fesokotakiga mo nisi tino.
KE UIGA KAIMALIE
FAKATAKITAKIGA MAI TE TUSI TAPU: “Ke se onoono fua koutou ki mea e ‵lei ei koutou kae ki mea foki e ‵lei ei a nisi tino.”—Filipi 2:4.
TE MEA E FAKAUIGA KI EI: Ka maua ne tatou a fesokotakiga ‵lei mo nisi tino māfai e ‵saga tonu tatou ki mea e mafai ne tatou o fai mō latou i lō a mea e fai ne latou mō tatou. Kafai koe kaimanako, e mafai o fakamasei ne koe a tou fesokotakiga mo nisi tino. E pelā me se fakaakoakoga, a te tino avaga telā e uiga kaimanako e mafai o sē fakamaoni ki tena avaga. E se gata i ei, e seai se tino e manako o fai taugasoa ki se tino telā e faipati fakamatamata faeloa ki mea e maua io me iloa ne ia. Tela la, e fai mai te tusi ko The Road to Character penei, “A tino kolā e fakamuamua ne latou a olotou manakoga totino ka maua ne latou a fakalavelave e uke.”
MEA E MAFAI NE KOE O FAI:
-
Fesoasoani ki nisi tino. A taugasoa ‵lei e fakatau tali‵tonu ki a latou eiloa kae toka faeloa o fakatau fesoasoani. E fai mai a nisi sukesukega me i tino kolā e fesoasoani atu ki nisi tino e se logo‵mae malosi i te loto mafatia kae maua ne latou te fiafia mo te lotomalie.
-
Fakaasi te loto malamalama. A te tino loto malamalama e lagona foki ne ia a te logo‵mae o te suā tino i tena loto. Kafai e fakaasi atu ne koe a te loto malamalama, ka se fakaaoga eiloa ne koe a pati faifa‵kata sē ‵lei, ke fakalogo‵mae atu a lagonaga o te suā tino.
Kafai e fakaasi atu ne koe a te loto malamalama, ka iloa ‵lei foki ne koe a nisi tino. Tela la, a te loto malamalama e mafai o fesoasoani atu ke kalo kea‵tea koe mai te uiga fakailoga tino, kae ke fai taugasoa foki mo tino mai tuu mo fenua kese‵kese.
-
Fakamāumāu ou taimi mo nisi tino. Ko te uke o taimi e fakamāumāu ne koe mo nisi tino, ko te faigofie o iloa ‵lei ne koe a latou. Ke maua ne koe se taugasoa tonu, e ‵tau o sau‵tala fakatasi koulua ki mea kolā e tāua ki a ia. Ke fakalogologo faka‵lei. Fakaasi atu a tou saga tonu ki manavasega o tou taugasoa. E fai mai se sukesukega fakamuli nei me i “sau‵talaga aoga e mafai o fai ei ke fia‵fia a tino.”
FILIFILI A TAUGASOA I SE AUALA POTO
FAKATAKITAKIGA MAI TE TUSI TAPU: “A taugasoa ma‵sei e fakama‵sei ne latou a amioga ‵lei.”—1 Kolinito 15:33.
TE MEA E FAKAUIGA KI EI: A tino kolā e fai taugasoa mo koe ka mafai o fakamalosi ne latou koe i se auala ‵lei io me masei. E fai mai a tino kolā e suke‵suke ne latou a uiga o tino me e lasi ‵ki te fakamalosiga e maua ne se tino mai i sena taugasoa. E pelā me se fakaakoakoga, e fai mai latou me kafai e ‵nofo fakatasi koe mo tino ‵pusi io me ko tino kolā ko oti ne ‵tala olotou avaga, e mafai eiloa koe o ‵pusi io me manako o ‵tala tau avaga.
MEA E MAFAI NE KOE O FAI: Fai taugasoa mo tino kolā e fakaasi mai ne latou a uiga mo faifaiga kolā e ‵gali io me manako koe o fakaakoako ki ei. E pelā mo te fai taugasoa mo tino kolā e loto malamalama, e āva, kaima‵lie kae uiga talimalo.
NISI FAKATAKITAKIGA I TE TUSI TAPU
Onoono ki vitio kolā e fakavae ki te Tusi Tapu kolā ne fakatoka ke fesoasoani atu ki tino a‵vaga, tama‵liki talavou, mo tama‵liki fo‵liki ko te mea ke momea aka te ‵lei o olotou olaga i te kāiga
KALO KEA‵TEA MAI PATI FAKA‵MAE LOTO.
“A pati e fai mo te sē mafaufau e ‵pau mo te ‵suki o se pelu.”—FAATAOTO 12:18.
KE UIGA KAIMA‵LIE.
“A te tino kaimalie ka manuia.”—FAATAOTO 11:25.
FAI FAKA‵LEI KI TINO E ‵TUSA MO TE MEA E MANAKO KOE KE FAI ATU NE TINO KI A KOE.
“A mea katoa . . . e ma‵nako koutou ke fai atu ne tino ki a koutou, e ‵tau foki mo koutou o fai ki a latou.”—MATAIO 7:12.
