FAKATAKITAKIGA MAI TE TUSI TAPU: “A palani a tino ga‵lue malosi e manuia eiloa, kae ko latou katoa kolā e fai fakava‵vave olotou mea e iku atu eiloa ki te mativa.”—Faataoto 21:5.

TE MEA E FAKAUIGA KI EI: A te faiga se palani kae galue malosi o ‵piki ‵mau ki ei se kī tāua ki te manuia. Tela la, palani muamua koi tuai o fakamāumāu au tupe. Masaua, e se mafai ne koe o ‵togi a mea katoa e manako koe ki ei. Tela la, fakaaoga faka‵lei au tupe i se auala poto.

MEA E MAFAI NE KOE O FAI:

• Fakasoa faka‵lei au tupe. Fakamau ki lalo a mea katoa a koe e ‵togi, kae fakasolo ne koe i vaega. Ko vaevae ei a te aofaki tupe e fano ki mea takitasi konā. Kafai ko tō uke au tupe e fakamāumāu i lō te aofaki tupe telā ne fakatoka ne koe i se vaega e tasi, fakaaoga a tupe mai nisi vaega. E pelā me se fakaakoakoga, kafai ko lasi te aofaki tupe ne fakamāumāu ne koe ki penitini i lō te mea telā ne fakatoka ne koe, fakaaoga a tupe kolā e masani o fakaaoga ki mea kolā e se na loa ko tāua, pelā mo te kai i se fale‵kai.

• ‵Kalo kea‵tea mai te kaitalafu valevale. Kafai e mafai, ke ‵kalo kea‵tea mai te kaitalafu. I lō te fai penā, ke ‵teu au tupe mo ‵togi a mea kolā e manakogina ne koe. Kafai e fakaaoga ne koe se credit card, taumafai o ‵tina te aofaki ne kaitalafu ne koe i te masina ko te mea ke mo a ma pasene. Kafai koe nofo kaitalafu, fai se fakatokaga ke ‵tina tau kaitalafu kae ke fakamaoni koe ki ei.

  E fai mai se sukesukega e tasi me i tino kolā e fakaaoga ne latou a credit card, e ma‵nako faeloa o ‵togi a mea e uke. Tela la, kafai e isi sau credit card, fakaaoga i se auala poto.

FAKATAKITAKIGA MAI TE TUSI TAPU: “A te tino paie e se fakamalū laukele i te tau ‵moko, tela la, ka akai faeloa a ia i te taimi e tau ei a fuataga me ko seai ne ana mea.”—Faataoto 20:4.

TE MEA E FAKAUIGA KI EI: A te paie e mafai o fai ne ia se tino ke mativa. Tela la, ke galue malosi kae taumafai o fai faka‵lei au tupe i se auala poto, ko te mea ke maua ne koe a mea kolā e manako koe ki ei i aso mai mua.

MEA E MAFAI NE KOE O FAI:

• Galue malosi. Kafai koe e galue malosi kae fai tou tiute, ka fia‵fia eiloa a tino pule ki a koe kae ka ma‵nako o fakagalue koe.

• Ke fakamaoni. Sa kaisoa mai tou pule. A te sē fakamaoni e mafai o fakamasei ne ia a tou igoa kae fai ei ke faigata o maua ne koe se galuega fakamuli.

• ‵Kalo kea‵tea mai te kaimanako. A te kilokiloga sē ‵lei e uiga ki tupe e mafai o fakamasei ne ia tou ola ‵lei mo tou fesokotakiga mo nisi tino. Masaua, a tupe e se ko te ‵toe mea tāua i te olaga.

SA FAKAMĀUMĀU TAIMI MO TUPE KI MEA MA‵SEI.

“Me i te tino inu kava mo te tino gafula ka ma‵tiva, kae ko te tino e fiafia ki te moe ka pei ki gatu masae‵sae.”​—FAATAOTO 23:21.

‵KALO KEA‵TEA MAI TE SŌNA MANAVASE.

“Ko lava te manava‵se ki otou ola, ki mea ka ‵kai ei koutou io me ko mea ka inu ei koutou, io me ki otou foitino ki gatu ka ‵pei ei koutou.”​—MATAIO 6:25.

‵KALO KEA‵TEA MAI TE KAISANO.

“A te tagata kaisano e manako malosi ki koloa, kae e se iloa ne ia me ka maua a ia ne te mativa.”​—FAATAOTO 28:22.