VAEGA I TE 2
Ke Fakatau Fakaasi Atu te Alofa Fakamaoni
“A lāua kolā ko oti ne fakatasi ne te Atua, e se mafai o ‵tala ne se tino.”—Maleko 10:9
E manako a Ieova ke “fakaasi atu [ne tatou] a te alofa tumau,” io me ko te alofa fakamaoni. (Mika 6:8) E tāua malosi eiloa ke fakaasi atu te uiga tenei ki tau avaga, me kafai e seai se alofa fakamaoni, e seai foki se loto talitonu. Kae ko te loto talitonu e tāua ki te fakamalosiakaga o te alofa.
I aso nei, ko tu eiloa i se tulaga fakamataku a te alofa fakamaoni i tauavaga. Ke puipui tau fakaipoipoga, e ‵tau o fakaiku aka ne koe ke fai a mea e lua konei.
1 KE FAKAMUAMUA FAELOA NE KOE TAU AVAGA
FAKAMATALAGA MAI TE TUSI TAPU: “Ke fakamautinoa aka ei ne koutou a mea kolā e sili atu i te tāua.” (Filipi 1:10) A tau avaga se mea e tasi i toe mea tāua eiloa i tou olaga. E ‵tau eiloa o fakamuamua ne koe.
E manako a Ieova ke saga tonu atu koe ki tau avaga kae ke ‘fia‵fia fakatasi’ koulua. (Failauga 9:9) E fakaasi faka‵lei mai ne Ia me e se ‵tau lele eiloa o fakaseaoga ne koe tau avaga, kae i lō te fai penā, e ‵tau o onoono faeloa koulua ki auala ke fakatau fakafiafia atu te suā tino ki te suā tino. (1 Kolinito 10:24) Fai ke maua ne tau avaga se lagonaga me e manakogina kae fakatāuagina foki a ia.
MEA E MAFAI NE KOE O FAI:
-
Ke fakamautinoa aka me e fakamāumāu fakatasi faeloa ne koulua a taimi, kae ke tuku katoatoa atu tou loto ki tau avaga
-
Ke mafaufau faeloa penei “tāua” i lō “au”
2 KE PUIPUI TOU LOTO
FAKAMATALAGA MAI TE TUSI TAPU: “So se tino e onoono ki se fafine kae e fiafai ki ei ko mulilua a ia i tena loto.” (Mataio 5:28) Kafai e tumau eiloa se tino i te mafaufau ki mea ma‵sei, e mafai eiloa o fai pelā me ko se fakamaoni a ia ki tena avaga.
E fai mai a Ieova me e ‵tau o “puipui tou loto.” (Faataoto 4:23, NW; Ielemia 17:9) Ke fai te mea tenā, e ‵tau o puipui ne koe ou mata. (Mataio 5:29, 30) Ke tautali atu ki te fakaakoakoga a te tagata i aso mua, ko Iopu, telā ne fai ne ia se feagaiga ke mo a ma kilo atu a ia ki se fafine mo tena loto lailai. (Iopu 31:1) Fakaiku aka ke mo a eiloa ma onoono koe ki ata ma‵sei. Kae ke fakaeteete foki i te atiakaga o se fesokotakiga fakafamau mo se tino telā e se ko tau avaga.
MEA E MAFAI NE KOE O FAI:
-
Ke fakamaoni atu ki nisi tino me e fakatāua katoatoa eiloa ne koe tau avaga
-
Mafaufau ki lagonaga o tau avaga, kae fakagata fakavave so se fesokotakiga telā e se ‵lei ei a lagonaga o tau avaga
