Yesaia 41:1-29
41 “Nsupɔw, monyɛ komm ntie me;*Momma aman no nsan nnya wɔn ahoɔden.
Momma wɔmmra; afei momma wɔnkasa.+
Momma yenhyia nni asɛm.
2 Hena na wanyan obi afi apuei,*+Na ɔde trenee afrɛ no aba Ne nan ase,*Sɛ ɔde amanaman bɛhyɛ ne nsa,Na wama wabrɛ ahemfo ase?+
Hena na ɔde ne sekan ama wɔayɛ sɛ mfuturu,Na n’agyan ayɛ wɔn sɛ ntɛtɛwa a mframa ahuw?
3 Otiw wɔn, na biribiara nsiw no kwanWɔ akwan a ne nan nsii so da so.
4 Hena na wakeka ne ho ayɛ eyi?Hena na wafrɛ awo ntoatoaso mmaako mmaako fi mfiase?
Me, Yehowa, mene Odikanfo;+Na akyikafo mu nso, sɛnea mete ara na mete.”+
5 Nsupɔw ahu, na wɔasuro.
Asaase afanan nyinaa fii ase wosowee.
Wotwiw bɛn, wɔba wɔn anim.
6 Obiara boa ne yɔnko,Na obiara ka kyerɛ ne nua sɛ: “Hyɛ wo ho den.”
7 Enti odwumfo hyɛ ɔtomfo den;+Nea ɔde hamma* bobɔ dade so ma ɛyɛ tratraa noHyɛ nea ɔbɔ ɔtommo* so no den.
Ɔka nnade a wɔasosɔw abom no ho asɛm sɛ: “Eye.”
Afei wɔde nnadewa bobom na anhwe fam.
8 “Na wo, O Israel, woyɛ m’akoa,+Wo, O Yakob, wo na mapaw wo,+M’adamfo Abraham aseni,*+
9 Wo a mefaa wo fii asaase ano bae,+Wo a mefrɛɛ wo fii n’ahye so akyirikyiri.
Meka kyerɛɛ wo sɛ, ‘Woyɛ m’akoa;+Mapaw wo, na mempoo wo.+
10 Nsuro, efisɛ meka wo ho.+
Mma w’ani nnyɛ wo totɔtotɔ, efisɛ mene wo Nyankopɔn.+
Mɛhyɛ wo den, yiw, mɛboa wo,+Mede me trenee nsa nifa beso wo mu denneennen.’
11 Hwɛ! Wɔn a wɔn bo afuw wo nyinaa bɛfɛre na wɔn anim agu ase.+
Wɔn a wɔne wo ko no, wɔbɛbrɛ wɔn ase na wɔahyew wɔn ase.+
12 Mmarima a wɔne wo di aperepere no, wobɛhwehwɛ wɔn nanso worenhu wɔn;Mmarima a wɔne wo ko no bɛyɛ sɛ biribi a enni hɔ, adehunu bi.+
13 Efisɛ me, Yehowa wo Nyankopɔn, mikura wo nsa nifa mu.Me na meka kyerɛ wo sɛ, ‘Nsuro. Mɛboa wo.’+
14 Nsuro, osunson* Yakob,+Israel mmarima, mɛboa mo,” mo Gyefo Yehowa,+ Israel Kronkronni no asɛm ni.
15 “Hwɛ! Mayɛ wo afiri a wɔde porow hwiit,+Ade foforo a wɔde porow hwiit a ɛse wɔ anim ne akyi nyinaa.
Wubetiatia mmepɔw so ama abubu pasaa,Na woama nkoko ayɛ sɛ ntɛtɛwa.
16 Wubehuw so,Na mframa behuw akɔ;Ahum bɛbɔ apete.
Yehowa mu na wubedi ahurusi,+Na wode Israel Kronkronni no bɛhoahoa wo ho.”+
17 “Abrɛfo ne ahiafo rehwehwɛ nsu, nanso ebi nni hɔ.
Osukɔm nti, wɔn tɛkrɛma so awo.+
Me, Yehowa, megye wɔn so.+
Me, Israel Nyankopɔn, merennyaw wɔn.+
18 Nkoko a hwee nni so no, mɛma nsubɔnten asen wɔ so,+Na nsuwansuwa atue asaasetraa so.+
Mɛma sare adan ɔtare,*Na asaase a ɛso awo adan asuti.+
19 Asaase pradadaa so na medua sida dua,Ɔkanto, ohuam dua, ne nku dua.+
Asaase pradadaa so na medua ɔpopaw dua,Ne ɔsɛsɛ dua ne kwabɔhɔrɔ dua,+
20 Sɛnea ɛbɛyɛ a nnipa nyinaa behu na wɔate ase,Na wɔatie na wɔahu sɛYehowa nsa na ayɛ eyi,Na Israel Kronkronni no na wabɔ.”+
21 “Momfa mo asɛm mmɛto gua,” Yehowa na waka.
“Momfa mo adanse mmra,” Yakob Hene asɛm ni.
22 “Momfa adanse mmra na monkyerɛ yɛn nea ebesi.
Monka kan nneɛma* no ho asɛm nkyerɛ yɛn,Sɛnea ɛbɛyɛ a yebedwinnwen ho* na yɛahu nea ɛbɛba.
Nneɛma a ɛreba no nso, monka mma yentie.+
23 Monka nea ɛbɛba daakye nkyerɛ yɛn,Na yenhu sɛ moyɛ anyame.+
Yiw, monyɛ biribi, papa anaa bɔne,Na sɛ yehu a, yɛn ho adwiriw yɛn.+
24 Hwɛ! Moyɛ biribi a enni hɔ,Na mo nnwuma yɛ adehunu.+
Obiara a ɔbɛpaw mo no yɛ akyiwade.+
25 Manyan obi afi atifi fam, na ɔbɛba;+Obi a ofi apuei*+ a ɔbɛbɔ me din,
Obetiatia atumfo* so te sɛ dɔte,+Te sɛ nea ɔnwemfo wɔw dɔte no.
26 Hena na ɔkaa eyi ho asɛm fii mfiase, sɛnea ɛbɛyɛ a anka yebetumi ahu?Hena na ɔkaa biribi fii tete, sɛnea ɛbɛyɛ a anka yebetumi aka sɛ, ‘Ɔyɛ ɔnokwafo’?+
Nokwasɛm ne sɛ, obiara nni hɔ a ɔde too gua!
Obiara nni hɔ a ɔkae!
Obiara ante biribiara amfi mo hɔ!”+
27 Me na midii kan ka kyerɛɛ Sion sɛ: “Hwɛ! Wɔn ni!”+
Na mɛsoma obi a okura asɛmpa akɔ Yerusalem.+
28 Na mehwɛe ara, nso manhu obiara.Wɔn mu biara nso nni hɔ a na obetu fo.
Na mekae ara sɛ wɔmma me mmuae.
29 Hwɛ! Wɔn nyinaa yɛ biribi a enni hɔ.
Wɔn nnwuma yɛ adehunu.
Wɔn dade ahoni* yɛ mframa ne biribi a mfaso nni so.+
Ase Hɔ Nsɛm
^ Anaa “monyɛ komm wɔ m’anim.”
^ Anaa “owiapuei.”
^ Kyerɛ sɛ, ɔmmɛsom No.
^ Anaa “asae; abɔsobaa.”
^ Ɛyɛ dade bi a ɔtomfo bɔ ne dade wɔ so.
^ Nt., “aba.”
^ Kyerɛ sɛ, onni ahobammɔ biara na ɔyɛ mmɔbɔ.
^ Nt., “ɔtare a demmire afifi wom.”
^ Nt., “nneɛma a edi kan.”
^ Anaa “yɛde yɛn koma besi so.”
^ Anaa “owiapuei.”
^ Anaa “asoafo; amradofo.”
^ Anaa “Wɔn ahoni a wɔagu.”
