Матфеи иҟынтә ажәабжь бзиа 1:1—25
1 Абар Иисус Христос* иԥсҭазаара иазку ашәҟәы. Иара Давид диԥан, Давид Авраам диԥан.
2 Авраам дихшеит Исаак;Исаак дихшеит Иаков;Иаков ихшеит Иуда иашьцәеи иареи;
3 Иуда Фама́рь лҟынтә ихшеит Фаре́си Зера́хи;Фаре́с дихшеит Хецро́н;Хецро́н дихшеит Рам;
4 Рам дихшеит Аминада́в;Аминада́в дихшеит Нахшо́н;Нахшо́н дихшеит Салмо́н;
5 Салмо́н Раа́в лҟынтә дихшеит Боа́з;Боа́з Руфь лҟынтә дихшеит Ове́д;Ове́д дихшеит Иессе́и;
6 Иессе́и дихшеит аҳ Давид;Давид У́риа иԥҳәыс лҟынтә дихшеит Соломон;
7 Соломон дихшеит Ровоа́м;Ровоа́м дихшеит А́виа;А́виа дихшеит А́са;
8 А́са дихшеит Иосафа́т;Иосафа́т дихшеит Иора́м;Иора́м дихшеит У́ззиа;
9 У́ззиа дихшеит Иофа́м;Иофа́м дихшеит Аха́з;Аха́з дихшеит Езеки́а;
10 Езеки́а дихшеит Мана́ссиа;Мана́ссиа дихшеит Амо́н;Амо́н дихшеит Ио́сиа;
11 Ио́сиа ихшеит Иехо́ниа иашьцәеи иареи. Усҟан израильаа Вавилонҟа иахыргеит.
12 Вавилонҟа ианахырга ашьҭахь, Иехо́ниа дихшеит Шеалтие́л;Шеалтие́л дихшеит Зорова́вель;
13 Зорова́вель дихшеит Авиу́д;Авиу́д дихшеит Елиаки́м;Елиаки́м дихшеит Азо́р;
14 Азо́р дихшеит Цадо́к;Цадо́к дихшеит Ахи́м;Ахи́м дихшеит Елиу́д;
15 Елиу́д дихшеит Елеаза́р;Елеаза́р дихшеит Матфа́н;Матфа́н дихшеит Иаков;
16 Иаков дихшеит Иосиф. Иосиф Мариа лхаҵа иакәын. Мариа Христос ҳәа изышьҭаз Иисус иан лакәын.
17 Авраам инаиркны Давид иҟынӡа иҟан 14 биԥара, Давид инаиркны аиудеиаа Вавилонҟа иахыргаанӡа — 14 биԥара, Вавилонҟа ианахырга инаркны Христос иҟынӡа — 14 биԥара.
18 Абар Иисус Христос дышиз: иан Мариеи Иосифи еибагараны иҟан, аха еибагаанӡа, лара иԥшьоу адоуҳала* лцәалтәымкәа дҟалеит.
19 Лхаҵа* Иосиф дуаҩ бзиан. Иара Мариа ахьымӡӷ лиргар иҭахӡамызт, убри аҟынтә маӡала длылҵырц иӡбеит.
20 Убри даназхәыц ашьҭахь, ԥхыӡла Иегова* имаалықь ус иеиҳәеит: «Давид иԥа Иосиф, Мариа ԥҳәысс лгара уацәымшәан, избанзар иԥшьоу адоуҳала ауп уи лцәалтәымкәа дшыҟалаз.
21 Лара аԥа длоуеит, уара уи Иисус* ихьӡуҵоит, избанзар ижәлар рыгәнаҳақәа рҟынтә иҿихуеит».
22 Ари зегь зыҟалаз Иегова иԥааимбар ила ииҳәаз абарҭ ажәақәа наӡарц азоуп:
23 «Ахаҵа дзымбац аԥҳәызба лцәалтәымкәа дҟалоит, аԥа длоуеит, иагьихьӡырҵоит Еммануи́л, уи иаанагоит „Анцәа дҳацуп“».
24 Иосиф данааԥш, Иегова имаалықь ишиеиҳәаз еиԥш, иԥҳәыс иҩныҟа дигеит.
25 Аха ахшара длоуаанӡа длыламкьысӡеит. Аԥа данлоу, Иисус ихьӡиҵеит.
Албаагақәа
^ Ма «Мессиа; Анцәа иалихыз». Ишыҟаҵәҟьоу еиҭоугозар, «ахәша зыхьшьу».
^ Ма «Анцәа имчала».
^ Ауриатә ҵас инақәыршәаны, арԥыс аԥҳәызба даниҳәалак ашьҭахь, лхаҵа иакәны дыԥхьаӡан.
^ Ари Ақьырсиантә Бырзен Ҩырақәа реиҭагаҿы Анцәа ихьӡ, Иегова, ихадоу атекст аҿы 237-нтә иуԥылоит. Ара раԥхьаӡакәны иуԥылоит. Шәахәаԥш Ацҵа А5.
^ Ауриа бызшәала «Иешуа», иаанагоит «Иегова Аиқәырхаҩ иоуп».
