“Wanneer die goddeloses soos onkruid uitspruit en al die mense wat slegte dinge doen, floreer, is dit sodat hulle vir ewig vernietig kan word.” – PSALM 92:7.

Soos ons in die vorige artikel gesien het, word dinge net al hoe erger. Dit verbaas ons nie, want dit was in die Bybel in 2 Timoteus 3:1-5 voorspel dat mense gedurende “die laaste dae” baie sleg sou wees. Die laaste dae van wat? Van hierdie wêreld vol goddelose mense. Binnekort sal God ’n einde maak aan almal wat weier om op te hou om slegte dinge te doen. Dan sal net die goeie mense – dié wat aan God gehoorsaam is – op die aarde oorbly. “Die regverdiges sal die aarde besit, en hulle sal vir ewig daarop lewe.” – Psalm 37:29.

“Die God wat vrede gee, sal Satan . . . vergruis.” – ROMEINE 16:20.

Wanneer Satan, die demone en al die slegte mense vernietig is, sal daar uiteindelik vrede op die aarde wees. Ons Skepper belowe: “Niemand sal [julle] bang maak nie.” – Miga 4:4.

“Die tent van God is by die mensdom . . . En God sal elke traan van hulle oë afvee, en die dood sal nie meer daar wees nie. Daar sal geen getreur, geen gehuil en geen pyn meer wees nie.” – OPENBARING 21:3, 4.

Swaarkry en siekte sal tot ’n einde kom omdat God al die skade sal herstel wat deur Satan, Adam, Eva en ons eie onvolmaaktheid veroorsaak is. As gevolg hiervan sal selfs ‘die dood nie meer daar wees nie’. Mense wat die Skepper liefhet en aan hom gehoorsaam is, sal vir ewig lewe. Maar waar sal hulle lewe?

“Die wildernis en die dorre land sal juig, en die woestyn sal vreugdevol en vol blomme wees.” – JESAJA 35:1.

Wanneer God ’n einde maak aan die goddeloses, sal die aarde ’n paradys word! Dit sal vol pragtige parke en tuine wees, en daar sal oorgenoeg kos wees (Psalm 72:16). Die oseane, mere en riviere sal skoon wees, en dit sal wemel van lewe. Selfs die woord “besoedeling” sal dalk uit ons woordeskat verdwyn! Mense sal hulle eie huise bou en daarin woon. En daar sal nooit weer mense wees wat nie ’n huis het nie of wat honger of arm is nie. – Jesaja 65:21, 22.

‘Daar sal ’n opstanding wees.’ – HANDELINGE 24:15.

Wil jy weer jou geliefdes wat gesterf het, sien? Die almagtige God sal hulle weer laat lewe – met ander woorde ’n opstanding gee – in die Paradys op aarde. Jy sal hulle herken, en hulle sal jou herken. Dink net hoe bly julle almal sal wees! Hoekom kan ons seker wees van hierdie hoop? Omdat die Bybel vir ons voorbeelde gee van volwassenes en kinders wat weer lewend gemaak is en met hulle families verenig is. Boonop het Jesus ook dikwels mense weer lewend gemaak, en baie mense het dit sien gebeur (Lukas 8:49-56; Johannes 11:11-14, 38-44).