“Uka reyinakan apnaqañapkamasti, alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja, jan ukasti jupaw taqe yaqha reinonakarojj tukjani, wiñayan wiñayapaw uka reinojj utjarakini.” (Daniel 2:44.)

Diosan Reinopajj alajjpachar uttʼayat mä gobiernowa. Ukat uka apnaqäw apnaqañapatakejj Diosajj Jesucristoruw ajlliwayi. Jupajj jichhürunakan akapach apnaqerinak lantiw uttʼayatäni, ukhamat Diosan munañap aka Oraqen phoqhasiñapataki, kunjamatï alajjpachan phoqhasiski ukhama (Mateo 6:9, 10). Diosan Reinopajj janipuniw jaqenakan apnaqäwipampejj apnaqatäkaniti, kunattejj ‘Jesucristo qhespiyirisaw’ uka apnaqäwin apnaqanini, ukhamajj cheqapuniw sumankañajj utj-jjani (2 Pedro 1:11).

“Pachpa Supayapuniw ukham mä qhana angeläkaspas ukham tukojja. Ukatarakwa uka Supayar servir jaqenakajj mä suma jaqenakäkaspas ukham tukupjjarakejja. Ukampis jupanakajj luratanakaparjamaw tukusipjjani.” (2 Corintios 11:14, 15.)

Kʼari religionanakan Supayat jutatäpjjatapajj qhanaw amuyasini. Ukat taqpach kʼari religionanakaw aka Oraqet chhaqtayatäni, ukhamarakiw khitinakatï religionanakapat jakäwips aleqat aptʼasirjam saytʼasipki ukat wila wartäwinaksa utjayapki ukanakampejj pasani. Ukhamatwa khitinakatï “cheqpach jakkiri Diosar” munasipki ukanakajj ‘mä sapa iyawsañampi’, ‘ajayump irpata ukat cheqa kankañampi’ yupaychapjjani. ¡Ukhapï sumankañasa ukat mä wawak jakasiñas utjanejja! (1 Tesalonicenses 1:9; Efesios 4:5; Juan 4:23.)

“Dios kipkarakiw jupanakampïni [...], taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa.” (Apocalipsis 21:3, 4.)

 Jehová Diosajj taqe ukanak Jesucristo toqew lurani, khititï jakäwip jiwas layku loqtasiwayki uka toqe (Juan 3:16). Kunapachatï Jesusajj apnaqjjani ukhajja, jaqenakajj janiw juchararäjjapjjaniti. Ukat janiw jukʼamp tʼaqhesiñanakas utj-jjarakiniti, kunattejj “Dios kipkarakiw jupanakampïni” ukat janirakiw ‘jachañas utj-jjaniti’. Ukhamajj niyaw juchanakasa, tʼaqhesiñanakas tukusjjani. “Aski jaqenakajj oraq katoqapjjani, wiñayatakiw ukan jakapjjarakini.” (Salmo 37:29.)

“[Jesusasti] dragonaruw katuntäna. Uka dragonasti nayrapacha katari pachpa Supayawa. Katuntasinsti waranqa maratakiw ñachʼantarakïna. Ukatsti manqhapacha chʼamakaruw jaqontäna, jistʼantarakïna. Mä sellompiw selljjatawayarakïna, ukhamata jan markanakaru sallqjaskañapataki.” (Apocalipsis 20:2, 3.)

Ukat Supayampi, sajjranakapampejj janiw jan wali luräwinakarus chʼamañchjjapjjaniti, kunattejj ñachʼjasin ‘manqhapachar’ jaqontatäpjjaniwa, mä arunjja, janiw kunsa lurirjamäjjapjjaniti. Ukat janirakiw jaqenakarus jan waltʼayjjapjjaniti. Ukhamajj Supayampi ukat sajjranakamp jan wiytat akapachan jakañajj ¡kunja sumakïkani!

Kunjamtï Jesusajj siskänjja, ‘qhepa urunakajj’ jachʼa ‘tʼaqhesïwinwa’ tukusjjani. Jupajj akham sänwa: “Walja tʼaqhesiñanakaw utjarakini. Ukham tʼaqhesiñsti janiw jichhürkamajj khitis uñjkiti aka oraqe luraski ukürutpacha, ni uka pasatats utjkarakiniti” sasa (Mateo 24:21).

Cheqas jachʼa tʼaqhesiñ urojj wali ajjsarkañ urupunïniwa, ukat ukarakiw ‘Taqe chʼaman Diosan jachʼa chʼajjwäw urupkam’ aparakini, uka ururojj waljanirakiw “Armagedón” sas sutimpi uñtʼapjje (Apocalipsis 16:14, 16).

Khitinakatï cheqapar sarnaqañ munapki ukanakajja, walpunwa aka ñanqha pachan tukusiñap suyasipki. Jichhajj Diosan Reinopampejj kuna askinakas katoqasini, ukwa mä qawqhanak uñjarakiñäni.

‘Walja jaqenakjam’ uñtʼatäpki ukanakajj jutïr pachan mä suma oraqen jakasipjjani: Jan jaktʼkäñ ‘walja jaqenakjam’ uñtʼatäpki ukanakajj ‘jachʼa tʼaqhesïwit’ qhespipjjaniwa sasaw Bibliajj qhanañchi ukat wiñayaw machaq oraqen jakapjjarakini (Apocalipsis 7:9, 10, 14; 2 Pedro 3:13). Ukat uka jachʼa tʼaqhesïwit qhespirinakajj Jesucristoruw, mä arunjja, ‘Diosan Corderoparu akapachan juchap qʼomachiriruw’ wali askirjam uñjapjjani (Juan 1:29).

Diosan yatichäwipajj walja askinakwa apanini: Machaq oraqenjja, ‘Jehová Tatitun yatiñapajj Oraqpachan phoqhantatäniwa’ (Isaías 11:9). Taqe kun lurir Jehová Diosan yatichäwipajj jaqenakamp sum apasiñataki ukat oraqen sum jakasiñatakiw Diosan yatichäwipajj yanaptʼani. Diosajj akham siwa: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” sasa (Isaías 48:17).

Munat familaranakasata ukat amigonakasat jiwirinakajj jaktanjjapjjaniwa: Kunapachatï Jesusajj aka Oraqenkkäna ukhajj Lázaro amigoparuw jiwatat jaktayäna (Juan 11:1, 5, 38-44). Ukampejj Diosan Reinopan reyit uttʼayatäsin kunanaksa jutïrin lurani uk uñachtʼayaskäna (Juan 5:28, 29).

Sumankañas ukat cheqapar sarnaqañas wiñayatakiw utj-jjani: Kunapachatï Jesucristojj apnaqkani ukhajja, jan cheqapar uñjasiñajj janiw utj-jjaniti. ¿Kunjamatsa uk yattänjja? Kunattejj Jesusajj kunatï chuymasan utjki uk yatispawa, ukhamajj khitis aski ukat jan askïkaraki uk yatiñatakejj uka yatiñkankañapampiw yanaptʼayasispa. Ukat khitinakatï jan walinak jan jaytañ munapkani ukanakajj janiw machaq oraqen jakapkaniti (Salmo 37:9, 10; Isaías 11:3, 4; 65:20; Mateo 9:4).

Kunanakatï jutïrin phoqhasiñampïski ukanakat Diosan mä qawqha profecianakapakwa akhakamajj uñjasiwayktänjja. Ukampis kunapachatï Diosan Reinopajj aka Oraqjjar apnaqjjani ukhajja, ‘jilarkir sumankañaw’ wiñayatak utjani (Salmo 37:11, 29). Ukat kunanakatï jaqenakar tʼaqhesiñanak utjayawayki ukanakajj jan mayampitakiw chhaqtayatäni. Diosajj akhamwa arsuwayi: “Uñjam, nayajj taqe kunwa machaqat lurta [...], aka arunakasti cheqapawa, katuyaskañarakiwa” sasa (Apocalipsis 21:5).