LISA * akagamba ati: “Okutwaza ge kwa benetata na banyanyazi kukankwataho munonga.” Akaba ari kugamba ecatumire yayija omu mazima. Ni byo ebyahikire ahari Anne, owagizire ngu: “Nkija omu mazima ahabw’okutwaza ge kw’Abahamya omu mwanya gw’ebi banyegesize.” Abo banyanyazi bombi nibashemerererwa kwega Bibuli n’okugitekatekaho, konka okutwaza ge kw’Abahamya ni ko okwabahigire.

Ni bata oku okutwaza ge kwitu kuri kubasa kugaruramu abandi amani? Reka tushwijume oburyo bubiri obu turi kubasa kutwarizamu ge abandi, ni okugamba omu bigambo n’omu bikorwa. Bwanyima nitureba abu tushemerire kutwariza ge.

Omukazi w’omutima ori kugambwa omu Migani ekicweka ca 31 “natwaza ge” omu bigambo byeye. (Emi 31:26) Nayikiriza ngu eco ‘kiragiro’ kimuhabure omu bigambo byeye n’oku ari kubigamba. Abazire b’abashija na bo bashemerire korobera eco kiragiro omu bi bari kugamba. Abazire abingi nibamanya ku ebigambo ebi bari kugambira abana babo omu iraka ribi biri kubagiraho engaruka. Kandi eco nikibasa kutuma abana babo batabahurikiza. Obwe rero, abazire nibataho amani kugira ngu bagambire abana babo omu muringo gw’embabazi.

Mbwenu shi yaba ori omuzire ninga shi otari we, ni bata oku ori kubasa kutwaza ge omu kugamba? Nitutunga ecokureberaho omu bigambo by’omu Migani 31:26 ebiri kugira ngu: “Akanwa keye kagamba eby’obwenge.” Eco nikimanyisa ku tushemerire kutorana twetonzire ebigambo ebi turagambe n’oku turabigambe. Nikiba kirungi burijo twayebuza ngu: ‘Mbehi ebi naza kugamba nibyimusa ekiniga, ninga nibiretaho obusinge?’ (Emi 15:1) Ni kirungi kutekateka tutakagambire.

Ogundi mugani nigugira guti: “Hariho orahukiriza ebigambo ebiri kucumita nka rurara.” (Emi 12:18) Twatekateka aha ku ebigambo ebi turagambe n’oku turabigambe biri kukwata aha bandi nikituma twarinda orurimi rwitu. Mazima, twata omu bikorwa ekiragiro c’okutwaza ge nitwija kugambira abandi ebigambo birungi kandi tubibagambire omu muringo gw’embabazi. (Efe 4:31, 32) Nitwija kukoresa ebigambo birungi n’iraka rirungi. Yehova akatuteraho ecokureberaho kirungi obu yagambire n’omuhereza weye Eliya owabire ayine obwoba. Marayika owabire ayemererire Yehova akagamba na Eliya omu “karaka kace kandi korobi.” (1 Bag 19:12) Okuba abantu abari kutwaza ge nikitwariramu ekiri kukira aha kugamba ebigambo by’embabazi. Nambwenu tushemerire kutwaza ge omu bikorwa. Ni bata oku turi kubasa kukikora?

Nitutoreza Yehova turi kutwariza ge abandi omu bigambo n’omu bikorwa. (Efe 4:32; 5:1, 2) Lisa, owu tugambireho,  akashoborora oku Abahamya bamutwarize ge. Akagira ati: “Eka yitu ku yagemirwe kufuruka omu buryo obutungurine, benetata babiri n’abakazi babo bakija kutukwasa kupakira ebintu. Obwo bwire nkaba ntari n’okwega Bibuli!” Ebyo bikorwa bikatuma Lisa yayenda kumanya amazima.

Nambwenu Anne, owu tugambireho na we akasiima ahabw’oku Abahamya bamutwarize ge. Akahandika ati: “Ahakuba abantu batari kufa ahari bagenzi babo, nkaba ntari kufa aha bantu. Kikaba nikingumira kwesiga abantu.” Akagumizamu ati: “Ku nabugine Abahamya, tindabesigire. Nkebuza enshonga ahabw’enki babire bari kumfaho. Konka ahakuba omwegesa wange wa Bibuli yabire ari kutwaza ge, kikatuma namwesiga. Bwanyima, nkata omutima aha bi nabire ndi kwega.”

Wareba ku okutwaza ge kw’ab’omu kibina ari ko okwatumire Lisa na Anne, bayenda kwega amazima. Bikatuma bayakira ge amazima.

Abamwe nibabasa kugambira abandi ebigambo birungi n’okubamwenyera ahabw’omucwe gw’ahu bakurire. Ni amazima eco na co ni kirungi. Konka twatwariza ge abandi ahabw’omucwe gw’ahu twakurire, nituba tutari kutoreza Ruhanga omu kutwariza ge abandi.​—Geranisa n’ebiri omu Byakozirwe 28:2.

Okutwaza ge ni kimwe omu byana by’omwika oguri kwera gwa Ruhanga. (Gal 5:22, 23) Eco nikimanyisa ku kugira ngu tutwaze ge turi kwetenga omwika oguri kwera. Twayikiriza ngu omwika oguri kwera gutukwase nitwija kutoreza Yehova na Yesu. Kandi ahakuba turi Abakristo, nitufa munonga aha bandi. Nitutwaza ge ahabwa rukundo eyi turi kukunda Yehova Ruhanga n’eyi turi kukunda bagenzi bitu. Ni co ekiri kutuma okutwaza ge kwitu kwaruga aha mutima kandi Ruhanga akakwikiriza.

Nikibasa kutworobera kutwariza ge abari kututwariza ge, ninga shi abu turi kumanya bonka. (2 Sam 2:6) Oburyo bumwe obu turi kubasa kubatwarizamu ge ni okubasiima. (Kol 3:15) Konka shi ku twakuhurira hariho omuntu owu tutashemerire kutwariza ge?

Tekateka ahari eki: Yehova ni ecokureberaho kirungi omu kutwaza ge kandi Ekigambo ceye nicereka oku turi kubasa kwereka ogo mutwarize. Ekigambo “embabazi” nikikoresibwa emirundi myingi omu Byahandikirwe by’Orugurika bya Kikristo. Ni bata oku Ruhanga ari kututwariza ge?

Tekateka aha bantu bona abu Yehova yatwarize ge ari kubaha ebi bari kwetenga ngu babeho. (Mat 5:45) N’obu twabire tutakamumanyire, akaba natutwariza ge. (Efe 2:4, 5, 8) Ecokureberaho: Akahayo Omwana weye owu ari kukunda ngu afire abantu bona. Entumwa Pawulo akahandika ku Yehova yahireyo ekitambo “nk’obutungi bw’embabazi zeye oku buri.” (Efe 1:7) N’obu turi kushisha kandi tukagwisa kubi Yehova, nagumizamu kutuhabura n’okutwegesa. Obuhabuzi bweye n’ebigambo byeye biri nk’“orutonyerera.” (Bir 32:2) Mazima, tituri kubasa kubona eby’okumushashura ahabw’ebintu byona ebi yatukorire. Konka ahabw’embabazi zeye twine amasiko g’ebiro by’omu misho.​—Geranisa n’ebiri omuri 1 Petero 1:13.

Hatariho okubanganisa, okutwaza ge kwa Yehova ni kwingi kandi nikugasira abantu. Obwe rero, omu mwanya g’okwereka embabazi omu bigambo kusha, tushemerire kutoreza Yehova turi kutwariza ge abantu n’omu bikorwa. (1 Tes 5:15) Twatwariza ge abantu nitubabera nk’obutagasi omu bwire bw’obufukirizi. Nikituma twahumuriza ab’eka yitu, Abakristo bagenzi bitu, abu turi kwega hamwe ah’ishomero, n’abatahi bitu.

Tekateka aha b’omu ka yawe ninga shi ab’omu kibina abarije kugasirwa wabatwariza ge omu bigambo n’omu bikorwa. Nihabasa kuba hariho mwenetata ninga munyanyazi ori kwetenga obuyambi, nk’okumukwasa omu mirimo y’omu ka, omu musiri gw’ebimuri, ninga shi kuza kumuhahira. Nambwenu, wabugana omuntu omu murimo g’okuburira ori kwetenga obuyambi nobasa kumukwasa.

Nimureke tutoreze Yehova turi kwebembeza ekiragiro c’okutwaza ge omu bigambo n’omu bikorwa.