1. (a) Mɛɛ nibii kpakpai Yehowa ewo shi akɛ ebaafee ehã wɔ? (b) Kɛ́ akɛɛ ‘wɔkɛ wɔhiɛ afɔ̃ Yehowa nɔ’ lɛ, te atsɔɔ tɛŋŋ? (Kwɛmɔ “Wiemɔi Ni Atsɔɔ Mli” lɛ.)

 YEHOWA ewo shi akɛ, ebaafee nibii kpakpai pii ehã mɛi ni sumɔɔ lɛ lɛ. Etsɛŋ ebaahã hela, awerɛhoyeli, kɛ gbele sɛɛ afo. (Kpo. 21:3, 4) Ebaaye ebua “mɛi ni he jɔ” ni kɛ amɛhiɛ fɔ̃ɔ enɔ lɛ ni amɛsaa shikpɔŋ lɛ nɔ fɛfɛo ni etsɔ Paradeiso. (Lala 37:9-11) Agbɛnɛ hu, ebaaye ebua wɔ ni naanyobɔɔ ni yɔɔ wɔ kɛ lɛ teŋ lɛ mli awa kwraa fe bɔ ni eji bianɛ lɛ po ni wɔbaaná miishɛɛ. Hiɛnɔkamɔ ni wɔyɔɔ nɛɛ nɔ bɛ kwraa! Shi ani wɔbaanyɛ ‘wɔkɛ wɔhiɛ afɔ̃ Yehowa nɔ’ akɛ ebaaye eshiwoi lɛ anɔ? * Hɛɛ, ejaakɛ Yehowa yeɔ eshiwoi anɔ be fɛɛ be. (Lala 27:14) Kɛ́ wɔto wɔtsui shi ni wɔkɛ miishɛɛ mɛ wɔ-Nyɔŋmɔ lɛ koni eye eshiwoi lɛ anɔ lɛ, no baatsɔɔ akɛ wɔkɛ wɔhiɛ fɔ̃ɔ enɔ lɛɛlɛŋ.​—Yes. 55:10, 11.

2. Mɛni Yehowa efee kɛtsɔɔ akɛ eyeɔ eshiwoi anɔ?

² Yehowa efee nibii kɛtsɔɔ akɛ eyeɔ eshiwoi anɔ. Naa nɔkwɛmɔnɔ ko ni tsɔɔ nakai. Yɛ Kpojiemɔ wolo lɛ mli lɛ, Yehowa wo shi akɛ yɛ wɔgbii nɛɛ amli lɛ, ebaabua mɛi anaa  kɛjɛ jeŋmaŋ fɛɛ jeŋmaŋ, weku fɛɛ weku, kɛ wiemɔ fɛɛ wiemɔ mli, ni ebaafee amɛ ekome ni amɛjá lɛ. Ŋmɛnɛ lɛ, ale kuu ni sa kadimɔ nɛɛ akɛ “asafoku babaoo” lɛ. (Kpo. 7:9, 10) Kuu nɛɛ mli bii lɛ jɛ hei srɔtoi ni amɛwieɔ wiemɔi srɔtoi, ni hii, yei, kɛ gbekɛbii fɛɛ yɛ amɛteŋ. Fɛɛ sɛɛ lɛ, amɛfee ekome akɛ weku, ni toiŋjɔlɛ yɛ amɛteŋ. (Lala 133:1; Yoh. 10:16) Amɛshiɛɔ kɛ ekãa, ni amɛfee klalo hu akɛ amɛbaagba mɛi fɛɛ ni baabo amɛ toi lɛ jeŋ hee ni etsɛŋ ebaaba lɛ he sane. (Mat. 28:19, 20; Kpo. 14:6, 7; 22:17) Kɛ́ ofata asafoku babaoo lɛ he lɛ, ŋwanejee ko bɛ he akɛ, hiɛnɔkamɔ ni oyɔɔ akɛ nibii baahi wɔsɛɛ lɛ kã otsui nɔ waa.

3. Mɛɛ oti ma Satan hiɛ?

³ Abonsam miitao onu he akɛ obɛ hiɛnɔkamɔ. Eetao onu he akɛ Yehowa susuuu ohe ni eyeŋ eshiwoi lɛ anɔ. Satan le akɛ, kɛ́ ehã wɔhiɛnɔkamɔ tã lɛ, wɔnijiaŋ baaje wui ni ekolɛ wɔbaakpa Yehowa sɔɔmɔ po. Nakai pɛpɛɛpɛ eka akɛ ebaafee Hiob. Eka akɛ ebaahã ehiɛnɔkamɔ atã ni ekpa Yehowa sɔɔmɔ.

4. Mɛni he wɔbaasusu yɛ nikasemɔ nɛɛ mli? (Hiob 1:9-12)

⁴ Yɛ nikasemɔ nɛɛ mli lɛ, wɔbaakwɛ nibii ni Satan fee koni ehã Hiob akpa Yehowa sɔɔmɔ. (Kanemɔ Hiob 1:9-12.) Agbɛnɛ hu, wɔbaakwɛ nɔ ni wɔkaseɔ yɛ Hiob sane lɛ mli kɛ nɔ hewɔ ni esa akɛ wɔhã ehi wɔjwɛŋmɔ mli be fɛɛ be akɛ, Yehowa sumɔɔ wɔ ni ebaaye eshiwoi anɔ.

5-6. Yɛ be kukuoo pɛ mli lɛ, mɛni ba Hiob nɔ?

⁵ No mli lɛ, nɔ fɛɛ nɔ miiya nɔ jogbaŋŋ yɛ Hiob shihilɛ mli. Wekukpaa kpakpa yɛ ekɛ Yehowa teŋ, ekɛ eŋa yɛ bii nyɔŋma sɔŋŋ, miishɛɛ yɛ amɛweku lɛ mli, ni eyɛ kooloi babaoo. (Hiob 1:1-5) Shi yɛ gbi kome pɛ mli lɛ, Hiob nibii fɛɛ je edɛŋ. Klɛŋklɛŋ lɛ, ekooloi lɛ fɛɛ je edɛŋ. (Hiob 1:13-17) No sɛɛ lɛ, ebii lɛ fɛɛ gboi. Susumɔ shihilɛ ni etsɔ mli lɛ he fioo okwɛ. Kɛ́ mɔ ko bi gbo lɛ, eyeɔ awerɛho waa. No hewɔ lɛ, kɛ́ okwɛ lɛ, te Hiob kɛ eŋa lɛ baanu he amɛhã tɛŋŋ be ni tsũ kumɔ eshwie amɛbii nyɔŋma lɛ anɔ ni amɛ fɛɛ amɛ gboi lɛ? Ŋwanejee ko bɛ he akɛ, amɛjijaa, ni amɛwerɛ ho amɛhe waa diɛŋtsɛ. Hiob gbála etadei lɛ ni eho ekã shikpɔŋ.​—Hiob 1:18-20.

⁶ Satan hã hela fɔŋ ko mɔ Hiob. Hela lɛ hã ehe fee tãŋ, ni mɛi ebuuu lɛ dɔŋŋ. (Hiob 2:6-8; 7:5) Dani hela nɛɛ baamɔ lɛ lɛ, ekutsoŋbii lɛ buɔ lɛ waa, ni mɛi po baa eŋɔɔ amɛbabiɔ ŋaawoo. (Hiob 31:18) Shi be ni hela lɛ mɔ lɛ lɛ, mɛi baaa eŋɔɔ dɔŋŋ. Lɛ diɛŋtsɛ enyɛmimɛi, etsuji, kɛ enanemɛi bɛŋkɛɛɛ lɛ dɔŋŋ!​—Hiob 19:13, 14, 16.

7. (a) Namɔ ŋɔɔ Hiob yasusu akɛ enaagbai lɛ jɛ? Shi mɛni efeee? (b) Mɛɛ shihilɛ Kristofonyo ko baanyɛ ekɛkpe ni tamɔ nɔ ni Hiob kɛ eŋa lɛ kɛkpe ni wɔnaa yɛ mfoniri lɛ mli lɛ?

⁷ No mli lɛ, Satan miitao Hiob anu he akɛ Yehowa mli efu lɛ ni no hewɔ ekɛ naagbai kpeɔ lɛ. Ani okaiɔ nɔ ni hã shĩa lɛ kumɔ eshwie Hiob bii nyɔŋma lɛ anɔ ni amɛgboi lɛ? Abonsam hã kɔɔyɔɔ wulu ko tswa ni ebashimɔ shĩa lɛ. (Hiob 1:18, 19) Agbɛnɛ hu, ehã la jɛ ŋwɛi bayi shi ni eshã Hiob gwantɛŋi lɛ kɛ etsuji ni kwɛɔ amɛnɔ lɛ. (Hiob 1:16) Bɔ ni kɔɔyɔɔ lɛ tswa ni la lɛ hu jɛ ŋwɛi bayi shi lɛ hewɔ lɛ, Hiob yasusu akɛ ejɛ Yehowa ŋɔɔ, ni no hã enu he akɛ efee nɔ ko ni Yehowa mli efu lɛ. Fɛɛ sɛɛ lɛ, ewieee wiemɔ fɔŋ ko eshiii Nyɔŋmɔ. Hiob na akɛ, Yehowa ehã lɛ nibii kpakpai pii ewala gbii abɔ fɛɛ. No hewɔ lɛ, ŋmɛnɛ lɛ kɛ́ Yehowa ehã nɔ ko fɔŋ enina  lɛ, esa akɛ emɔ mli nakai. Enɛ hewɔ lɛ, ewie akɛ: “Ajie Yehowa gbɛ́i lɛ yi daa.” (Hiob 1:20, 21; 2:10) Be ni Hiob wie sane nɛɛ, no mli lɛ, enibii fɛɛ ahiɛ ekpãtã, ebii fɛɛ egboi, ni lɛ diɛŋtsɛ hu eeye hela ni naa wa. Shi fɛɛ sɛɛ lɛ, ekpako Yehowa sɔɔmɔ. Ani Satan nijiaŋ je wui ni ekpa Hiob naagbamɔ?

8. Mɛni ji nɔ kroko ni Satan fee koni ekɛje Hiob nijiaŋ wui?

⁸ Satan fee nɔ kroko koni ekɛje Hiob nijiaŋ wui. Ehã hii etɛ komɛi ni kɛɛ amɛji Hiob nanemɛi lɛ wie nibii komɛi ni hã Hiob nu he akɛ ehe bɛ sɛɛnamɔ. Hii nɛɛ hã enu he akɛ, efee nibii gbohii komɛi, ni no hewɔ epiŋɔ lɛ. (Hiob 22:5-9) Amɛkɛɛ lɛ hu akɛ, kɛ́ efeko nibii gbohii po lɛ, bɔ ni nibii yaa lɛ lɛ tsɔɔ akɛ Yehowa enaaa nibii kpakpai ni efee lɛ akɛ nɔ ko. (Hiob 4:18; 22:2, 3; 25:4) Nɔ ni amɛfee nɛɛ tsɔɔ akɛ, amɛmiitao amɛkɛɛ Hiob akɛ Yehowa sumɔɔɔ lɛ, esusuuu ehe, ni sɛɛnamɔ bɛ jamɔ ni ejáa lɛ lɛ he. Nibii ni amɛwie lɛ baanyɛ ahã Hiob hiɛnɔkamɔ atã.

9. Mɛni ye ebua Hiob ni efee ekãa ni etee nɔ efi shi yɛ naagbai ni ekɛkpe lɛ fɛɛ sɛɛ?

⁹ Feemɔ shihilɛ nɛɛ he mfoniri okwɛ. Naa Hiob ni eta lamulu mli ni eepiŋ waa. (Hiob 2:8) Mɛi ni kɛɛ amɛji enanemɛi lɛ miiwie amɛmiishi lɛ akɛ ejeee gbɔmɔ kpakpa ni ehe bɛ sɛɛnamɔ. Enaagbai lɛ miisu etsui waa, ni eeye ebii ni egboi lɛ hu ahe awerɛho. Be ni Hiob nanemɛi lɛ wieɔ lɛ, etswaaa esɛŋ. (Hiob 2:13–3:1) Ekolɛ Hiob nanemɛi lɛ yasusu akɛ bɔ ni Hiob efee diŋŋ lɛ tsɔɔ akɛ ebaakpa e-Nyɔŋmɔ lɛ jamɔ. Shi amɛlaka amɛhe kwraa. Ni eshɛ he ko lɛ, ekolɛ Hiob wó eyitso nɔ ni ekwɛ enanemɛi lɛ ni ekɛɛ akɛ: “Miŋmɛŋ minɔkwayeli lɛ he kɛyashi magbo!” (Hiob 27:5) Mɛni hã Hiob fee ekãa ni etee nɔ efi shi yɛ naagbai ni ekɛkpeɔ lɛ fɛɛ sɛɛ? Nɔ ni ye ebua lɛ ji, ekɛ ehiɛ fɔ̃ e-Nyɔŋmɔ ni sumɔɔ lɛ lɛ nɔ akɛ, bɔ fɛɛ bɔ ni  fee lɛ ebaaye ebua lɛ ni ebaafo enaagbai lɛ asɛɛ hu. Ele akɛ, kɛ́ egbo po lɛ, Yehowa baatee lɛ shi.​—Hiob 14:13-15.

10. Mɛni wɔkaseɔ yɛ Hiob sane lɛ mli?

¹⁰ Hiob sane lɛ hãa wɔnaa akɛ, Satan nyɛŋ enyɛ wɔnɔ ni wɔkpa Yehowa sɔɔmɔ, ni akɛ, Yehowa le shihilɛi fɛɛ ni wɔkɛkpeɔ lɛ. Esane lɛ hãa wɔnuɔ nibii krokomɛi hu ashishi jogbaŋŋ. Nyɛhãa wɔkwɛa nibii nɛɛ ekomɛi.

11. Kɛ́ wɔtee nɔ wɔkɛ wɔhiɛ fɔ̃ Yehowa nɔ lɛ, mɛni baajɛ mli kɛba? (Yakobo 4:7)

¹¹ Hiob hã ana akɛ, kɛ́ wɔkɛ wɔhiɛ fɔ̃ Yehowa nɔ lɛ, wɔbaanyɛ wɔfi shi yɛ naagba fɛɛ naagba ni wɔkɛbaakpe lɛ mli, ni wɔbaate shi wɔwo Satan. Mɛni baajɛ mli kɛba? Biblia lɛ hãa wɔleɔ akɛ, Abonsam baajo wɔnaa foi.​—Kanemɔ Yakobo 4:7.

12. Mɛɛ gbɛ nɔ gbohiiashitee hiɛnɔkamɔ ni Hiob yɔɔ lɛ waje lɛ?

¹² Esa akɛ wɔhã hemɔkɛyeli ni wɔyɔɔ akɛ Yehowa baatee gbohii ashi lɛ mli awa waa. Tamɔ awie yɛ nikasemɔ ni tsɔ hiɛ lɛ mli lɛ, bei pii lɛ, Satan kɛ gbeyei ni wɔsheɔ akɛ wɔbaagbo lɛ tsuɔ nii koni ehã wɔkpa Yehowa sɔɔmɔ. Yɛ Hiob sane lɛ mli lɛ, Satan tsɔɔ akɛ Hiob baafee nɔ fɛɛ nɔ kɛbaa ewala yi kɛ́ no baabi ni ekpa Yehowa sɔɔmɔ po. Shi nɔ ni Satan susu lɛ eyabaaa lɛ nakai. Hiob tee nɔ eye Yehowa anɔkwa be ni eehe egbo po. Nɔ ni ye ebua Hiob ji, ehe eye akɛ Yehowa baafee nɔ ni sa, ni ená hiɛnɔkamɔ ni mli wa akɛ Yehowa baajaje nibii fɛɛ wɔsɛɛ. Hiob he eye hu akɛ, kɛ́ Yehowa ejajeee nibii be ni eyɔɔ wala mli po lɛ, kɛ́ egbo lɛ Yehowa baatee lɛ shi wɔsɛɛ. Hiob he eye waa akɛ gbohiiashitee baaba. Kɛ́ bo hu oheɔ gbohiiashitee lɛ oyeɔ waa lɛ, kɛ́ akɛɛ obaagbo po lɛ, okpaŋ Yehowa sɔɔmɔ kɔkɔɔkɔ.

13. Mɛni hewɔ esaaa akɛ wɔhiɛ kpaa nibii ni Satan fee koni ekɛje Hiob nijiaŋ wui lɛ anɔ lɛ?

¹³ Esaaa akɛ wɔhiɛ kpaa nibii ni Satan fee koni ekɛje Hiob nijiaŋ wui lɛ anɔ, ejaakɛ nibii ni tamɔ nakai nɔŋŋ efeɔ ŋmɛnɛ koni ekɛhã wɔkpa Yehowa sɔɔmɔ. Satan wie akɛ: “Gbɔmɔ [jeee Hiob pɛ] kɛ nɔ fɛɛ nɔ ni eyɔɔ baahã yɛ ewala hewɔ.” (Hiob 2:4, 5) Nɔ ni Satan wie nɛɛ tsɔɔ akɛ, wɔsumɔɔɔ Yehowa kɛ wɔtsui fɛɛ, ni kɛ́ akɛɛ abaagbe wɔ kɛ́ wɔkpaaa Yehowa sɔɔmɔ lɛ, wɔbaakpa lɛ sɔɔmɔ. Etsɔɔ hu akɛ, Nyɔŋmɔ sumɔɔɔ wɔ, ni mɔdɛŋ ni wɔbɔɔ koni wɔfee nɔ ni ja lɛ esaaa ehiɛ. Wɔle nɔ ni Satan taoɔ efee lɛ, no hewɔ lɛ, wɔhãŋ elaka wɔ.

14. Kɛ́ wɔkɛ naagbai kpe lɛ, mɛni ebaahã wɔna? Gbaa niiashikpamɔ ko ni tsɔɔ nakai.

¹⁴ Kɛ́ wɔkɛ naagba ko kpe lɛ, esa akɛ wɔna lɛ akɛ hegbɛ ni wɔná ni wɔkɛbaana wɔgbɔjɔmɔi. Naagbai ni Hiob kɛkpe lɛ hã ena egbɔjɔmɔi ni etsu he nii. Akɛ nɔkwɛmɔnɔ lɛ, ena akɛ esa akɛ eba ehe shi waa. (Hiob 42:3) Wɔ hu kɛ́ wɔkɛ naagba ko kpe lɛ, ehãa wɔnaa gbɔjɔmɔi ni wɔyɔɔ ni esa akɛ wɔtsu he nii. Nyɛmi nuu ko ni atsɛɔ lɛ Nikolay * ni miiye hela ko ni naa wa waa ni awo lɛ tsuŋ lɛ wie akɛ: “Tsuŋwoohe lɛ tamɔ X-ray mashiŋ. Ehãa onaa naagbai ni oyɔɔ ni oleee lɛ.” Kɛ́ wɔná wɔle hei ni wɔgbɔjɔmɔi yɔɔ lɛ, ewaaa akɛ wɔbaanyɛ wɔtsu he nii.

15. Namɔ esa akɛ wɔbo lɛ toi? Ni mɛni hewɔ?

¹⁵ Esa akɛ wɔbo Yehowa toi, jeee mɛi ni sumɔɔɔ lɛ lɛ. Be ni Yehowa kɛ Hiob wie lɛ, Hiob bo lɛ toi jogbaŋŋ. Yehowa kɛ Hiob susu nii ahe. Yɛ gbɛ ko nɔ lɛ, ebi lɛ akɛ, ‘Kɛ́ okwɛ nibii ni mibɔ lɛ, ani onaaa akɛ miyɛ hewalɛ?  Mile nibii fɛɛ ni otsɔɔ mli lɛ. Kɛ́ okwɛ lɛ, minyɛŋ maye mabua bo?’ Be ni Yehowa kɛ Hiob susu nii ahe nɛkɛ lɛ, nɔ ni Hiob wie kɛnyiɛ sɛɛ lɛ tsɔɔ akɛ ebaa ehe shi ni ehiɛ sɔɔ nibii kpakpai ni Yehowa efee lɛ. Ewie akɛ: “Mitoii enu ohe, shi agbɛnɛ, miina bo kɛ mihiŋmɛii.” (Hiob 42:5) Eeenyɛ efee akɛ be ni Hiob wie wiemɔi nɛɛ, no mli lɛ eta lamulu lɛ mli lolo, ehe fɛɛ efee fala, ni eeye ebii ni egboi lɛ ahe awerɛho. Fɛɛ sɛɛ lɛ, Yehowa hã Hiob na akɛ esumɔɔ lɛ ni eyɛ ehe miishɛɛ.​—Hiob 42:7, 8.

16. Yɛ nɔ ni aŋma yɛ Yesaia 49:15, 16 lɛ naa lɛ, mɛni esaaa akɛ wɔhiɛ kpaa nɔ kɛ́ wɔkɛ naagbai kpe?

¹⁶ Ŋmɛnɛ hu lɛ, mɛi jɛɔ wɔ ni amɛkɛ wɔ yeɔ tamɔ nɔ ni wɔhe bɛ sɛɛnamɔ. Amɛmaleɔ amɛwieɔ wɔ loo Yehowa asafo lɛ he efɔŋ fɛɛ efɔŋ koni amɛkɛfite wɔgbɛ́i. (Mat. 5:11) Hiob sane lɛ hãa wɔnaa akɛ, Yehowa heɔ eyeɔ akɛ kɛ́ wɔkɛ naagbai miikpe po lɛ, wɔbaaya nɔ wɔsɔmɔ lɛ. Yehowa sumɔɔ wɔ, ni ehiɛ kpaŋ mɛi ni kɛ amɛhiɛ fɔ̃ɔ enɔ lɛ anɔ kɔkɔɔkɔ. (Kanemɔ Yesaia 49:15, 16.) Esaaa akɛ wɔboɔ amalei ni mɛi ni sumɔɔɔ Yehowa lɛ wieɔ lɛ toi. Nyɛmi nuu ko ni atsɛɔ lɛ James ni yɔɔ Turkey, ni lɛ kɛ eweku lɛ kɛ naagbai pii ekpe lɛ wie akɛ: “Wɔna akɛ, kɛ́ wɔbo amalei ni awieɔ yɛ Nyɔŋmɔ tsuji ahe lɛ toi lɛ, wɔnijiaŋ baaje wui. No hewɔ lɛ, wɔkɛ wɔjwɛŋmɔ ma nibii ni Nyɔŋmɔ Maŋtsɛyeli lɛ baafee wɔsɛɛ lɛ anɔ ni wɔtee nɔ wɔkɛ ekãa sɔmɔ Yehowa. Enɛ hewɔ lɛ, wɔmiishɛɛ etãaa.” Bɔ ni Hiob bo Yehowa toi lɛ, wɔ hu esa akɛ wɔbo Yehowa toi. Wɔboŋ amalei ni mɛi ni sumɔɔɔ Yehowa lɛ wieɔ lɛ toi koni wɔhiɛnɔkamɔ akatã.

17. Mɛni wɔkaseɔ yɛ anɔkwafoi ni atsĩ amɛtã yɛ Hebribii yitso 11 lɛ mli lɛ adɛŋ?

¹⁷ Jeee Hiob pɛ ji Yehowa tsulɔ ni fi shi ni fee ekãa be ni ekɛ naagbai kpe. Be ni bɔfo Paulo ŋma wolo eyahã Hebribii lɛ, etsĩ mɛi babaoo tã ni etsɛ amɛ akɛ, “odasefoi babaoo tamɔ atatu.” (Heb. 12:1) Amɛ fɛɛ amɛkɛ naagbai srɔtoi kpe, shi amɛtee nɔ amɛsɔmɔ Yehowa. (Heb. 11:36-40) Ani amɛhiɛ ni amɛmia kɛ shi ni amɛfi lɛ fee efolo? Dabi kwraa. Eyɛ mli akɛ be ni amɛyɔɔ wala mli lɛ jeee nibii fɛɛ ni Yehowa ewo shi akɛ ebaafee lɛ ba mli moŋ, shi amɛtee nɔ amɛsɔmɔ Yehowa. Ni akɛni amɛle akɛ Yehowa yɛ amɛhe miishɛɛ hewɔ lɛ, amɛhe amɛye akɛ nibii fɛɛ ni Yehowa ewo shi lɛ baaba mli. (Heb. 11:4, 5) Kɛ́ wɔkase amɛ lɛ, ebaawaje wɔ koni wɔya nɔ wɔkɛ wɔhiɛ afɔ̃ Yehowa nɔ.

18. Mɛni otswa ofai shi akɛ obaafee? (Hebribii 11:6)

¹⁸ Ŋmɛnɛ lɛ, be ni je miina je miitsɛre lɛ, nibii amli miiwo wu. (2 Tim. 3:13) Satan miika Nyɔŋmɔ webii lɛ lolo. Ekɔɔɔ he eko naagbai ni wɔkɛbaakpe wɔsɛɛ lɛ, nyɛhãa wɔtsua nii waa wɔhãa Yehowa, ejaakɛ “wɔhiɛ kã Nyɔŋmɔ hiɛkãalɔ lɛ nɔ.” (1 Tim. 4:10) Esa akɛ wɔhã ehi wɔjwɛŋmɔ mli akɛ, bɔ ni Yehowa jɔɔ Hiob ehã yɛ naagbee lɛ tsɔɔ akɛ “Yehowa musuŋ tsɔɔ lɛ waa, ni enaa mɔbɔ hu.” (Yak. 5:11) Nyɛhãa wɔ hu wɔyaa nɔ wɔsɔmɔa Yehowa, ejaakɛ wɔle akɛ, “eji mɛi ni kɛ hiɛdɔɔ taoɔ esɛɛ gbɛ lɛ ajwerelɔ.”​—Kanemɔ Hebribii 11:6.