यस संसारको अन्त कहिले हुन्छ भनेर बुझ्न पहिले “संसार” भन्‍ने शब्दलाई बाइबलमा कसरी चलाइएको छ, त्यो बुझ्नुपर्छ। ग्रीक शब्द कोसमोस-लाई प्रायजसो “संसार” भनेर अनुवाद गर्ने गरिन्छ। कोसमोस-ले प्रायजसो परमेश्‍वरको स्तरबमोजिम जीवन नबिताउने मानिसहरूलाई बुझाउँछ। (युहन्‍ना १५:१८, १९; २ पत्रुस २:५) कहिलेकाहीँ भने मानव समाजलाई पनि बुझाउँछ।—१ कोरिन्थी ७:३१; १ युहन्‍ना २:१५, १६. a

“संसारको अन्त” के हो?

 “संसारको अन्त” भन्‍ने वाक्यांशलाई कुनै-कुनै बाइबलले “यस युगको आखिरी समय” वा “यस युगका अन्त्य” भनेर पनि अनुवाद गरेको छ। (मत्ति २४:३; नयाँ संशोधित संस्करण) यसले पूरै पृथ्वी नष्ट हुने वा सबै मानिस नाश हुने कुरालाई बुझाउँदैन तर मानव समाज नाश हुने कुरालाई बुझाउँछ।—१ युहन्‍ना २:१७.

 बाइबलले “कुकर्मीहरू नामेट हुनेछन्‌” र असल मानिसहरू पृथ्वीमा आनन्दित भएर बस्नेछन्‌ भनेर बताएको छ। (भजन ३७:९-११) कुकर्मीहरू ‘महासङ्‌कष्टको’ अन्तमा अर्थात्‌ आरमागेडोनको’ युद्धमा नाश हुनेछन्‌।—मत्ति २४:२१, २२; प्रकाश १६:१४, १६.

संसारको अन्त कहिले हुन्छ?

 येशूले यसो भन्‍नुभयो: “त्यस दिन र समयको विषयमा कसैले जान्दैन, न स्वर्गदूतहरूले न त छोराले तर बुबाले मात्र जान्‍नुहुन्छ।” (मत्ति २४:३६, ४२) अनि अन्तको समयबारे उहाँले अझै यसो भन्‍नुभयो: “तिमीहरूले नचिताएको समयमा” यो आउनेछ।—मत्ति २४:४४

 हामीलाई अन्त ठ्याक्क कुन दिन र कुन बेला आउँछ भनेर थाह छैन। तर संसारको अन्त हुनुअघि कस्तो “चिन्ह” अर्थात्‌ कस्ता घटनाहरू हुनेछन्‌ भनेर येशूले बताउनुभयो। (मत्ति २४:३, ७-१४) ती घटनाहरू हुने समयलाई बाइबलमा “अन्तको समय” र “अन्तको दिन” भनिएको छ।—दानिएल १२:४; २ तिमोथि ३:१-५.

संसारको अन्त भइसकेपछि केही कुरा बाँकी रहनेछ?

 छ। पृथ्वी यहीँ रहनेछ। किनभने बाइबलले यसो भनेको छ: “त्यो आफ्नो ठाउँबाट कहिल्यै डगमगाउनेछैन, सदासर्वदा स्थिर रहनेछ।” (भजन १०४:५) अनि पृथ्वीमा मानिसहरू पनि हुनेछन्‌। यसबारे बाइबलले यसो भनेको छ: “धर्मीहरूले पृथ्वी अधिकार गर्नेछन्‌ र तिनीहरू त्यहाँ सधैँभरि रहनेछन्‌।” (भजन ३७:२९) परमेश्‍वरले सुरुमा जस्तो उद्देश्‍य राख्नुभएको थियो, पृथ्वीमा त्यस्तै अवस्था हुनेछ। जस्तै:

•   पूरै पृथ्वी प्रमोदवन हुनेछ।—यसैया ३५:१; लुका २३:४३.

•   पृथ्वीमा सुरक्षा र संवृद्धि हुनेछ।—मिका ४:४.

•   सबै मानिसले अर्थपूर्ण काम गर्नेछन्‌ र सन्तुष्ट हुनेछन्‌।—यसैया ६५:२१-२३.

•   मानिसहरू बिरामी र वृद्ध हुनेछैनन्‌।—अय्युब ३३:२५; यसैया ३३:२४.