“Ngike ngetama kufundza liBhayibheli, kodvwa bukhulu balo bungicedza emandla!”​—Briana, 15.

 Utiva ngalendlela yini nawe? Lesihloko sitakusita!

•  Kungani kufanele ngifundze liBhayibheli?

•  Ngingalifundza njani liBhayibheli?

•  Loko lokushiwo bontsanga

 Kukucedza emandla yini kufundza liBhayibheli? Nangabe kunjalo, kuyacondzakala. Kungenteka wentiwa kutsi liBhayibheli liyincwadzi lenkhulu, lenemakhasi lamanyenti labhalwe ngemagama lamancane futsi lite netitfombe​—alifani ne-tv nema-video!

 Kodvwa cabanga nganaku: Asesitsi utfola libhokisi lelikhulu lakadzeni lelinemcebo (ancient treasure chest), bewungeke yini ufise kwati kutsi unjani lomcebo longekhatsi?

 LiBhayibheli liyafana nalelibhokisi lelinemcebo. Linemavi lamanyenti lahlakaniphile latakusita kutsi

•   Wente tincumo letikahle

•   Uvane nebatali bakho

•   Utfole bangani labakahle

•   Ulwisane nekucindzeteleka

 Kungenteka njani kutsi incwadzi lendzala kangaka isebente nasesikhatsini setfu? Kungenca yekutsi “yonkhe imiBhalo iphefumulelwe nguNkulunkulu.” (2 KuThimothi 3:​16) Loku kusho kutsi seluleko lesiseBhayibhelini sivela emtfonjeni lomuhle kunayo yonkhe.

 Lenye indlela longalifundza ngayo kusuka ekucaleni kwalo uyofika ekugcineni. Loko kutakuniketa umcondvo wekutsi liBhayibheli likhuluma ngani. Tinyenti tindlela tekufundza liBhayibheli. Cabanga nganati tibonelo letimbili:

•    Ungatifundza tonkhe letincwadzi letingu-66 teliBhayibheli ngekulandzelana kwato, kusuka ku-Genesisi kuya ku-Sembulo.

•    Ungafundza liBhayibheli ngendlela yekulandzelana kwetintfo letenteka ngayo, lokukhulunywa ngato kulo.

 Longakubuka: Sandzisanchazo A7 eHumushweni Lemhlaba Lomusha siveta kulandzelana kwetintfo letenteka ekuphileni kwaJesu ngesikhatsi alapha emhlabeni.

 Lenye indlela yekufundza liBhayibheli kukhetsa indzaba lehambisana nenkinga lobhekene nayo. Nati tibonelo:

•   Ungatsandza yini kutfola bangani longabetsemba? Fundza indzaba yaJonathani naDavide. (1 Samuweli, tehluko 18-​20) Kuze utfole tifundvo longatisebentisa kulendzaba, sebentisa i-worksheet lenesihloko lesitsi “Indlela Yekuthola Abangane Abetsembekile” letfolakala ngesiZulu.

•   Ungatsandza yini kucinisa emandla akho ekumelana netilingo? Fundza indzaba yekutsi Josefa wamelana njani nesilingo. (Genesisi, sehluko 39) Kuze utfole tifundzo longatisebentisa kulendzaba, sebentisa i-worksheet lenesihloko lesitsi “Indlela Yokumelana Nesilingo. . . Josefa​—Incenye 1” naletsi “Umangalelwa Ngamanga! Josefa​—Incenye 2” letfolakala ngesiZulu.

•   Ungatsandza yini kufundza ngendlela umthantazo longakusita ngayo? Fundza ngalokwenteka kuNehemiya. (Nehemiya, sehluko 2) Kuze utfole tifundzo longatisebentisa kulendzaba, fundza i-worksheet lenesihloko lesitsi “UNkulunkulu Wawuphendula Umthantazo Wakhe” letfolakala ngesiZulu.

 Longakwenta: Nawufundza liBhayibheli, ciniseka kutsi usendzaweni lethulile kuze ungaphatamiseki.

 Indlela yesitsatfu yekufundza liBhayibheli kukhetsa indzaba letsite nobe lesinye setihlabelelo, usifundze, bese ucabanga kutsi ungakusebentisa njani ekuphileni kwakho. Nawucedza kufundza, tibute imibuto lenjenganayi:

•    Jehova wakubhalelani loku eBhayibhelini?

•    Kuvetani ngebuntfu baJehova kanye nendlela lenta ngayo tintfo?

•    Ngingakusebentisa njani lokwatiswa ekuphileni kwami?

 Longakwenta: Tibekele umgomo! Bhala phansi lilanga longatsandza kucala ngalo luhlelo lwakho lwekufundza liBhayibheli.